KARAKI 11

Moan Otin Nei Wirara

KO ATAA te moanibwai are e karaoia Noa ngke e a otinako ma ana utu man te aake? E angakarea nakon te Atua ke e anga ana bwaintangira. Ko kona n noria ni karaoa aei n te taamnei ae i nano. E anga te bwaintangira aei Noa bwa e na karabwaa te Atua, ibukin kamaiuana ma ana utu man te ieka ae korakora.

N am iango e kukurei Iehova n te bwaintangira? Eng, e kukurei. Mangaia are e berita nakon Noa bwa e na aki manga urua te aonnaba riki n te ieka.

N te tai ae waekoa ao e a mwau aontano, ao a a moana maekaia Noa ma ana utu i tinanikun te aake. E kakabwaiaia te Atua ao e taku nakoia: ‘Kam na kariki. Kam na kabatiaia natimi ni karokoa maekanakin te aonnaba ni kabutaa irouia aomata.’

Ma imwina riki, ngke a ongongo taekan te ieka ae korakora aomata, ao a kona ni maaku iai bwa mwina e a manga roko naba. Mangaia are e anga te bwai ni kauring nakoia aomata te Atua, ibukin ana berita are e na aki manga iekaki riki te aonnaba ni kabutaa. Ko ataia bwa tera are e angania bwa te bwai ni kauring? Bon Nei wirara.

E nonoraki Nei wirara i karawa ngkana e oti taai imwin bwakan te karau. E bati karan nako Nei wirara aika rangi n titikiraoi. Ko a tia n noria? Ko nora teuana ae mena n te taamnei?

E taku ana taeka te Atua: ‘N na aki manga tiringia aomata ma maan n te ieka. N na katea Nei wirara i buakon te nang. Ngkana e kaoti Nei wirara ao I noria, ao N na uringa au berita iai.’

Mangaia are ngkana ko nora Nei wirara, tera ae e na kauringko? Eng, ana berita te Atua are e na aki manga kamaunaa riki te aonnaba n te ieka ae korakora.

Karikani Bwaai 8:​18-22; 9:​9-17.