A Kangaa Kukune Aika Boou N Rota Am Iraorao?

Ma iai tabeman aika a rangi ni moanibwaia riki kamanenaani kukune aika boou aikai ae  . . .

• a aikoa kaotiota te atataiaomata nakoia raoraoia.

• a namakinna riki bwa a maroaa ao akea manenaia.

• a tii iaiangoiia riki nakoia tabemwaang.

TE BAE KO RIAI N ATAIA

TE ATATAIAOMATA

Te atataiaomata e kainnanoa karekean ara tai ao n taotaona nanora ni kaotiota tabeakinan temanna. E kona ni kangaanga karaoan anne ngkana ti a kabanea ara tai n taabo n reitaki n te intanete, ao ni kanakorongorongo n te tareboon n taai nako.

Ko kona n tautoronaki ni kukune aika boou, ngkana e a riki kaekaan aia kanakorongorongo raoraom ni kabane bwa te bae ko riai ni karaoia. Ao tao ko na aki nora ana rongorongo raoraom temanna are e a kainnanoa raoi te ibuobuoki.

IANGOA AEI: Ko na kangaa n teimatoa ni “kaotiota te atataiaomata” n am tai ni kamanenai kukune aika boou n reitaki iai ma raoraom?—1 BETERO 3:8.

NAMAKINAN AE AKEA MANENAM

E kuneaki n te kakaae teuana bwa a bati aika rawawata riki imwini mamatakuia n taabo n reitaki n te intanete. A noria taani kakaae aikai bwa ngkana e mamataku temanna n taamneia tabemwaang n te intanete ao imwina e kona n “namakina ae akea te bae e a tia ni karaoia ae manena.”

Matakuakinan naba taamneia tabemwaang aika kukurei iai, e kona ni kairiko bwa ko na manga kabotauko ma ngaiia n te aro ae aki raoiroi. Ko kona n iangoia bwa e kabotu maium ni kabotauaki ma ngaiia.

IANGOA AEI: Ngkana ko kamanenai taabo n reitaki n te intanete, ko na kangaa n aki kabotauko ma tabemwaang?—I-KARATIA 6:4.

KO TII IAIANGOIKO MOA

E koreia te tia reirei temanna bwa tabeman ana ataei a bangaomata bwa a tii kani karekeia raoraoia aika a na kakaraoi bwaai ibukia.a Te aeka n reitaki anne e boboto i aon te bae ko tii kona ni karekea man am iraorao. E kona te aomata n iangoia raoraona bwa kaanga ana tareboon ke ana kaombiuta, are e tii kamaiua ngkana e na kamanena ao ni manga kamatea ngkana e aki kainnanoia.

IANGOA AEI: E oti man te baere ko katokaa n te intanete bwa ko kani kaiangatoa ma tabemwaang ke ko tii iaiangoiko moa?—I-KARATIA 5:26.

TE BAE KO KONA NI KARAOIA

TUOA AROM NI KAMANENAI KUKUNE AIKA BOOU

Ngkana a toro iroum kukune aika boou ao ko aki tautoronaki iai, a na buokiko n reitiko ma raoraom ao ni kaan riki ma ngaiia.

Nori iango aikai ngkana ko kani katai, ke korei oin am iango.

• Kabatiaa riki am tai ni maroro ma aomata n itaramata ma ngaiia (ao tiaki tii n te tareboon ke n te meeri)

• Katuka (ke kakeaa tangin) am tareboon ngkana ko maroro ma tabemwaang

• Kauarerekea am tai ni mamataku n te intanete

• Riiki bwa te tia ongora

• Reitaki ma raoraom ae e rinanon te kangaanga