A Kangaa Kukune Aika Boou N Rota Aroia Natim?
E kona ni kangaanga irouia ikawai kamanenaani kukune aika boou. Ma ataei n taai aikai a rangi ni mwaatai riki iai.
E kakoauaaki naba irouia tabeman bwa rooro n rikirake aika kabanea aia tai ni mamataku n te intanete, a . . .
kona n tautoronaki n aia tareboon ke aia kaombiuta.
kona ni kabuta taekaia tabemwaang rinanon te intanete.
kona n nori taamnein te bwaitingako, e ngae ngke bon tiaki nanoia ni kani matakuakin.
TE BAE KO RIAI N ATAIA
TAUTORONAKI
Bwaai tabeua aika kakaraoaki n te intanete, n aron te keim, a kona n tautorona te aba ao ni kangaanga katokaia. E taekinaki n te boki ae Reclaiming Conversation bwa “burokuraem aika n ara tareboon a karaoaki bwa a na katabetabeira n ara tareboon.” A rikirake kaubwaia naake a karin aia katanoata ibukin aia bitineti ni burokuraem aikai, tii mani mamatakuakinaia iroura n ara tareboon ke n ara kaombiuta.
IANGOA AEI: A tautoronaki natim n aia tareboon ke kaombiuta? Ko na kangaa ni buokiia ni kamanena raoi aia tai?—I-EBETO 5:15, 16.
KABUTAN TAEKAIA TABEMWAANG N TE INTANETE
Iai taani kabonganai taabo n reitaki n te intanete aika rikirake n iowawa, ni kamatauninga n aia taetae, ao ni bangaomata. Anua aikai a kona ni kairiko bwa ko na kakani maiubuaka iai nakoia tabemwaang.
Tabeman a kakaraoi aroaro aikai bwa a aonga n reke atongaia ao kinaakia irouia aika bati. Ke ngkana iai ae e namakinna bwa e katinanikuaki, bwa tao e aki kaoaki nakon te botaki teuana, e kona n iangoia bwa e karaoaki te mwakuri n iowawa nakoina.
IANGOA AEI: A bwaina te aroaro ae raoiroi natim ngkana a kamanenai taabo n reitaki n te intanete? (I-Ebeto 4:31) A un ngkana a noria bwa a katinanikuaki ni waaki tabeua?
TAAMNEIN TE BWAITINGAKO
E rangi ni kai reke n te intanete taamnei aika kammaira. A riai n uringnga kaaro are e ngae ngke iai burokuraem tabeua are a kona n tutuoi iai aia tareboon ma aia kaombiuta natiia, ma a boni kona naba n nori baika kammaira natiia.
Kanakoan ke karekean taamnei rinanon te tareboon aika karioa te iangobuaka, e boni kona ni bure i aan te tua. N taabo tabeua, a katuuaaeaki ataei ake a matakuakini ke ni kanakoi taamneia aika kammaira.
IANGOA AEI: Ko na kangaa ni buokiia natim n rarawa ni kaririaki nakoni matakuakinan ke kanakoan taamnei aika kammaira n te intanete?—I-EBETO 5:3, 4.
TE BAE KO KONA NI KARAOIA
KATANEIAIA NATIM
E ngae ngke e bebete irouia ataei n taai aikai kamanenaani kukune aika boou ma a boni kainnanoa naba te ibuobuoki. E kaotaki n te boki ae Indistractable bwa anganakia ataei te tareboon ke bwaai riki tabeua imwain ae a bon rabakau raoi kamanenaaia, “titeboo ma ko a boni kariaia naba bwa a na kiba nako taari ao a tuai ni bwaati n uaua.”
ANA BOTO N REIREI TE BAIBARA: “Reireina te teei ni kataneia n te kawai ae riai n nako iai, ao e na bon aki kitanna e ngae ngkana e a kara.”—TAEKA N RABAKAU 22:6.
Nori iango aikai ngkana ko kani katai, ke korei oin am iango.
N na maroro ma natiu arona ae riai ni kamanenai taabo n reitaki n te intanete
N na buoka natiu ngkana e namakinna ae e katinanikuaki
N na kabanea au konaa ni kamanoa natiu mani baika bubuaka n te intanete
N na tutuoa ana tareboon
N na tiatiana ana tai ni kabongana
N na aki kariaia bwa e na kamanena ana tareboon ke ana kaombiuta n ana ruu n ana tai ni matu
Akea te tareboon ke te kaombiuta n tain te amwarake