Tera Ae E Taekinaki n te Baibara Ibukini Kabuanibwai Aika Karina?
Ana kaeka te Baibara
Bon tiaki te Atua ae karikii kabuanibwai aika karina aika riki ni boong aikai, ma e rangi n tabeakinia aomata ake a rotakibuaka iai. Kabuanibwai aika karina bon teuana naba bukin rikin te rawawata, are e na kamauna Ana Tautaeka n uea te Atua. Ma ngkai moa, e katauraoa te kabebetenano te Atua ibukia naake a rotakibuaka ni kabuanibwai aika karina.—2 I-Korinto 1:3.
E aera ngkai ti kakoauaa ae kabuanibwai aika karina bon tiaki te katuuaa mairoun te Atua?
Te koaua bwa kabuanibwai aika karina boni kanikinaean ae ti a maeka ni kabaneani boong?
E kangaa te Atua ni buokiia naake a rotakibuaka ni kabuanibwai aika karina?
E kona te Baibara ni buokira n tauraoi imwain rikini kabuanibwai aika karina?
Kibun te Baibara aika a na kabebetei nanoia naake a rotakibuaka ni kabuanibwai aika karina
E aera ngkai ti kakoauaa ae kabuanibwai aika karina bon tiaki te katuuaa mairoun te Atua?
A kaokoro kabuanibwai aika karina ma ana katuuaa te Atua ake a karakinaki n te Baibara.
A mate ao a kabuanibwai aomata nako n rikini kabuanibwai aika karina. Ni kaitaraan anne ngkana e kabonganai baika korakora aika bwain te aonnaba te Atua ni katuuaa iai, e taraia raoi bwa a na kamaunaaki tii aika a buakaka. N te katoto, ngke e kamaunai kaawa rimoa ake Totom ao Komora te Atua, ao e kamaiuia aika a raoiroi are te mwaane are Rota ma natina aine ake uoman. (Karikani Bwaai 19:29, 30) E nori naano te Atua ao e kamaunaia naake a boni buakaka.—Karikani Bwaai 18:23-32; 1 Tamuer 16:7.
A aki kona n ataaki rikini kabuanibwai aika karina. Ni kaitaraan anne, e anganga te kauring te Atua nakoia aika a buakaka imwaini karokoan ana katuuaa i aoia. Aomata ake a mutiakina te kauring a bon reke aia tai ni kamanoia man te kabuanibwai.—Karikani Bwaai 7:1-5; Mataio 24:38, 39.
Bon aomata naba aika karikii kabuanibwai aika karina. N te aro raa? N aroia n urua te otabwanin ao n aroia ni kateitei n taabo ake a kai rorotaki n te mwaeiei, n te ieka, ao n te angibuaka ae korakora. (Te Kaotioti 11:18) E aki riai ni bukinaki te Atua n aia waaki aomata aikai.—Taeka N Rabakau 19:3.
Te koaua bwa kabuanibwai aika karina boni kanikinaean ae ti a maeka ni kabaneani boong?
Eng, bwa e oti n taetae ni burabeti aika n te Baibara bwa a na riki kabuanibwai aika karina n tain “tokin te waaki ae ngkai i aon te aba,” ke “ni kabaneani boong.” (Mataio 24:3; 2 Timoteo 3:1) N te katoto, e taku Iesu ni kaineti ma ara tai aikai: “A na roko roongo ma mwaeiein te aba n te tabo teuana ma teuana.” (Mataio 24:7) E na waekoa te Atua ni kamaunai man te aonnaba aei baika karika te maraki ao te rawawata, n ikotaki naba ma kabuanibwai aika karina.—Te Kaotioti 21:3, 4.
E kangaa te Atua ni buokiia naake a rotakibuaka ni kabuanibwai aika karina?
E kabebetei nanoia te Atua n ana Taeka ae te Baibara. E karaui nanora te Atua bwa e mumutiakinira ao e nori rawawatara. (Itaia 63:9; 1 Betero 5:6, 7) E kaotaki naba iai ana berita ibukin te tai are a nang akea iai kabuanibwai aika karina.—Nora “Kibun te Baibara aika a na kabebetei nanoia naake a rotakibuaka ni kabuanibwai aika karina.”
E buokiia te Atua rinanoia taan taromauria. E kabonganaia taan taromauria aika i aon te aba te Atua, bwa a na kakairi n ana katoto Iesu. E taetae ni burabetinaki bwa e na kabebetei nanoia “akana uruaki nanoia” ao “aomata nako aika nanokawaki” Iesu. (Itaia 61:1, 2) A kakorakoraia ni karaoa naba anne taan taromauria te Atua.—Ioane 13:15.
E kabonganaia naba taan taromauria bwa a na karaoa te mwakuri n ibuobuoki nakoia naake a rotakibuaka ni kabuanibwai aika karina.—Mwakuri 11:28-30; I-Karatia 6:10.
Ana Tia Kakoaua Iehova ngke a karaoa te mwakuri n ibuobuoki nakoia naake a rotakibuaka imwin te angibuaka i Puerto Rico
E kona te Baibara ni buokira n tauraoi imwain rikini kabuanibwai aika karina?
Eng. E ngae ngke te Baibara bon tiaki te boki n ibuobuoki ibukini katauraoara imwain rikini kabuanibwai aika karina, ma iai booto n reirei iai aika kona n ibuobuoki. N te katoto:
Moantaai ni katauraoiko imwain rikini kabuanibwai aika karina. E kangai te Baibara: “E nora te kabuanibwai ane e ataibwai ao e karabaa.” (Taeka N Rabakau 22:3) Ti wanawana ngkana ti moantaai ni kakaaei aanga ibukini kamanoara n tain te kangaanga. N aroni karekeani bwainnaoraki ibukini kangaanga aika kona n riki, ao katauraoaia ara utu ni kaineti ma te tabo ae ti na kaitiboo iai ngkana iai te bwai ae riki.
E kakawaki riki te maiu nakoni bwaikoraki. E boni kangai naba te Baibara: “Ti aki uabwai nako aon te aba, ao ti aki kona naba n uabwai mai aon te aba.” (1 Timoteo 6:7, 8) Ti riai n tauraoi ni kitana mwengara ao ara bwai n tain te kabuanibwai ae karina. Ti wanawana ngkana ti ururinga ae a kakawaki riki maiura nakoni bwaikoraki.—Mataio 6:25.