“I Aikoa Manga Tautoronaki n te Iowawa”

AROU RIMOA

I bungiaki ni kaawan Calgary i Alberta, Kanata. A raure au karo ngke te merimeri ngai ao I a mwaing ma tinau ni maeka irouia ana karo. A rangi n tatangiriira ana karo tinau, ao e rangi ni kakukurei uarerekeu. I aki kona ni mwaninga arou ae kakukurei ngke te teei ngai.

A manga iooki au karo ma ni manga okira tekatekaia n taanga ngke ai itiua au ririki, ao ti a mwaing nako St.Louis, Missouri, n te United States ike e a bitaki iai maiu nakon ae aki raoiroi. I a ataia imwina bwa e kona n rangi ni iowawa tamau. N te katoto, n okiu man te reirei, ao e a ataia tamau ae iai taan iowawa aika oreai, ma I aki kaoka kaiu. E rangi n un iai n te aro are e a oreai riki ni kammarakai nakoia raou n reirei akekei. I taua i nanou reireiau aei ao imwina I a nako n oro ma ataei akekei.

E a bon rarawawata naba tinau n aroaron tamau ae te unun, ao n angiin te tai, a a bon tatakarua naba ngkana a kauntaeka. Ngke 11 au ririki ao I a moana kamanenaan te drug ma te kamanging. I ririkirake ni kiunun ao I a bon ororo naba ma aomata. N raabanen au kauarinan, ao I a riki bwa te aomata ae rangi n iowawa.

Ngke 18 au ririki, I a kaaina te taanga ni buaka ae te U.S. Marine Corps. Ikanne are I a reireinaki iai arou n tiriaomata. Imwin nimaua te ririki ao I a kitana te taanga ni buaka bwa N na reirei n te psychology, bwa e aonga n reke au mwakuri n te Federal Bureau of Investigation. I moana au reirei ae rietata n te United States ao I a manga reitia i Kanata.

I nanon au tai n reirei n te reirei ae rietata, ao e a rangi ni bwara nanou n aroaroia te botannaomata. E rangi ni korakora te bangaomata, akea uaan te mwakuri korakora, ao taraan ae e aki kona n toki aia kangaanga aomata. E boni bwara nanou n iangoan ae e kona ni kanakoraoaki te aonnaba irouia aomata.

Ibukina bwa I iangoia bwa akea uaan te maiu, I a moana kamanenaan te kamanging, taian drug, I nanonrang n tangira te mwane ae bati, ao te wene ni bure. I a bon iaiangoia naba bwa te party raa ae N na kaea, ke antai te aine ae na wene ni bure ma ngaia. Ao ibukina naba bwa I onimakina au kataneiai n te taanga ni buaka, I a unun ma aomata. I irira oin au eti ao I kakaitaraa ane I taku bwa e iowawa nakoia ake tabeman. Ma ni koaua I bon tautoronaki n te iowawa.

ARON TE BAIBARA NI BITA MAIU

N te bong teuana I a drug ma raoraou temanna n ruun au auti mai nano, ao ti katauraoi mwaruana aika a na kaboonakoaki, ngke e a tii titirakinai naba raoraou aei bwa I kakoauaa te Atua, ke I aki. I taku nakoina, “Ngkana e karikii kangaanga n te aonnaba aei te Atua, ao I aki kan reiakina taekana!” N te bong are imwina, ngke I a nako ni mwakuri n au tabo ni mwakuri ae boou, ao temanna raou ni mwakuri ae kaain Ana Tia Kakoaua Iehova, e a titirakinai naba ni kangai, “N am iango, e riai ni bukinaki te Atua n rawawata aika riiriki n te aonnaba?” I rangi ni kubanako n tain rokon te titiraki aei ao I kaota te kan ongora. Ti maroroakini bwaai aika bati i nanon onoua te namwakaina, ao e kakamanena te Baibara ni kaekai iai au titiraki aika kangaanga ibukin te maiu.

Au kabae are I maeka ma ngaia n te tai anne, e rawa n ongo baike I reiakin. N te Taabati teuana, I a tuanga neiei bwa I kaoia taani kakoaua nakoni mwengara bwa a na reirei n te Baibara ma ngaira. N te bong are imwina ngke I a oki ni mwakuri, ao I a noria bwa e a tia neiei n anai bwain ara auti ni kabane ao ni kitanai. I a otinako ao n tang i tinaniku. I tataro naba nakon te Atua ao ni bubutiia bwa e na buokai. Bon anne au moantai ni kamanena aran te Atua ae Iehova n au tataro.​—Taian Areru 83:18.

Uabong imwina, I a moana au reirei n te Baibara ma taani Kakoaua aika taanga. Imwin nakoia, ao I a reita au wareware n te boki are a reirei iai ma ngai ae, You Can Live Forever in Paradise on Eartha ao I kabanea ni warekia n te tairiki anne. E ringaki nanou n te baere I reiakinna ibukin Iehova ma natina are Iesu Kristo. I a ataia ae e rangi n nanoanga Iehova, ao e rawawata ngkana ti rawawata. (Itaia 63:9) E rangi n ringaki nanou n ana tangira te Atua ibukiu ao n ana karea Natina are e a tia n anga ibukira. (1 Ioane 4:10) I ataia ae e a tia n taotaona nanona Iehova nakoiu “ibukina bwa e aki tangira kamaunaan temanna ma e tangiriia aomata nako bwa a na rairi nanoia.” (2 Betero 3:9) I namakinna ae tangirai Iehova bwa N na riki bwa raoraona.​—Ioane 6:44.

N te wiki anne ao I a moana irirakini bobotaki n te ekaretia. E boni mwarairai irau, I taabia, ao I taraa ni kakamaaku, ma a taraai taani Kakoaua bwa kangaa ai aron aia koraki ae bua. A kaota raoi te aroaro ni Kristian ni koaua. I bon namakinna bwa ai aron ae I a manga mena irarikiia tibuu n uarerekeu ngkoa, ma e a tamaroa riki ngkai.

N te tai ae waekoa ao e a moanna ni bitaki maiu imwin reiakinan te Baibara. I a korea irau, I katoka kakaraoan te wene ni bure, ao I katoka naba kabonganaan te drug ma te kamanging. (1 Korinto 6:​9, 10; 11:14) I tangiria ni kani kakukureia Iehova. Ngaia are ngkana I a ataia bwa iai te bwai ae I kakaraoia ae e ribaia Iehova, ao I aki kataia ni karekea angau iai. Ma I rangi n rawawata iai. I aki toki n iaiangoa aei, ‘E aera ngkai I kariaia bwa N na bwabwaina te aroaro ni maiu aei?’ Ao i nanon te tai ae waekoa, I a kataia ni biti aroaroni maiu ma arou n iaiango. N tokina, I a moanna n nori kakabwaia aika reke man kakaraoani baike e tangiri Iehova. N Turai 29, 1989​—onoua te namwakaina imwin reireiu n te Baibara​—I a bwabetitoaki bwa temanna kaain Ana Tia Kakoaua Iehova.

AROU NI KAKABWAIAAKI

E buokai te Baibara ni biti anuau. Ngkoa ao I aki toki ni kakaitaraa te aomata ae kairiribai ma te iowawa. Ma ngkai, I a kakorakoraai ni “karekea te rau ma aomata ni kabane.” (I-Rom 12:18) I karabwaa Iehova ibukini mwaakan ana Taeka, ao taamneina ae raoiroi ae e ibuobuoki ni bitii maiuia aomata.​—I-Karatia 5:​22, 23; Ebera 4:12.

I aikoa ngkai manga tautoronaki n te drugs, te iowawa, ao te aroaro ae kammaira, ma I a kakorakoraai ni kakukureia Iehova ae te Atua, ao n anganna au kabanea ni konaa. I kataia naba ni buokiia tabemwaang bwa a na kinaa. Tabeua te ririki imwini bwabetitoau, I a mwaing nako iteran te aonnaba are teuana, nakon te tabo ae kainnanoaki iai te ibuobuoki n te mwakuri ni minita. N taai akanne, I rangi ni kukurei ni karaoi reirei aika bati, ao n nora aron te Baibara ni kanakoraoi maiuia aomata. I rangi ni kukurei naba bwa e a tia n riki tinau bwa temanna kaain Ana Tia Kakoaua Iehova, ibukina bwa e nora bitakini maiu.

N 1999 ao I a angabeeba n te reirei ae te Kuura Ibukia Taan Uarongorongoa te Tautaeka n Uea i El Salvador. I reireinaki raoi iai arou ni kaira te uarongorongo, ao arou n reireinia ma ni kaungaia tiibu n te ekaretia. Imwina riki n te ririki anne ao I a mare ma buu ae Eugenia. Ti kaai ni beku bwa taan uarongorongo aika kabwanina aia tai i Guatemala.

Ngkai, e aikoa manga bwara nanou n te maiu aei ao I a karekea te kukurei ae bati. Maiuakinan ana reirei te Baibara e a kainaomataai man te wene ni bure, te iowawa, ao e anganai te maiu ae onrake n te tangira ni koaua ao te rau.