Ana Reirei te Baibara Ae E Borababaua te Aonnaba?

Ana kaeka te Baibara

Tiaki, e aki angareirei te Baibara bwa e borababaua te aonnaba.a Te Baibara bon tiaki bokin te rabakau n aonnaba. Ao akea naba te reirei n te Baibara ae kaitaraa te rabakau n aonnaba. “E kona n onimakinaki n taai nako [te bae taekinaki n te Baibara], ngkai ao n aki toki.”​​—⁠Taian Areru 111:⁠8.

• Tera ae e nanonna te Baibara n te taeka ae “maninganingan te aonnaba ake aua”?

• Tera aron ana kariri te Riaboro nakon Iesu?

Tera ae e nanonna te Baibara n te taeka ae “maninganingan te aonnaba ake aua”?

Tiaki nanona bwa mani kabonganaan taeka aika “maninganingan te aonnaba ake aua” ao “tabon nako aonnaba” n te Baibara, e nang iangoaki iai bwa e bon tikuea te aonnaba ke iai tabona nako. (Itaia 11:12; Iobi 37:⁠3) N oneani mwin anne, bon taiani kabotau baikai ake a kaineti nakon aon te aonnaba ni kabutaa. E kabonganai te Baibara iteran te kambwati ake aua “mai mainiku ao maeao ao meang ao maiaki,” n aron naba anne.​​—⁠Ruka 13:29.

Te taeka n Ebera ae rairaki bwa “maninganingan” ke “tabon nako” e taraa n ae bon te taetae ni karariki ae boto i aon te taeka ibukini “bain te mannikiba ni kiba.” E taku te boki ae The International Standard Bible Encyclopedia, bwa “ibukina bwa e kakabongana baina te mannikiba n rabunia iai bunna, e kabwarabwaraaki ngkanne n [te taeka n Ebera aei] tabon te bae e aroraki nako.” E reitia naba te boki aei n taku bwa n Iobi 37:3 ao n Itaia 11:​12, “e nanonaki n te taeka aei mataniwin te aba, ke tian te aba ae te kabanea n raroa i aon te aonnaba.”b

Tera aron ana kariri te Riaboro nakon Iesu?

Ibukini karirian Iesu, e “kairia te Riaboro nakon te maunga ae rangi n rietata, ao e kaotii nakoina tautaeka n uea nako n te aonnaba ma tamaroaia.” (Mataio 4:⁠8) A taku tabeman bwa te rongorongo man te Baibara aei, e nanonaki iai bwa taabo nako i aon te buraneti ae borababaua aei, a kona ni bane n noraki n te mata man te tabo teuana i aon te aonnaba. Ma e ngae n anne, te taeka ae “te maunga ae rangi n rietata” bon tii te kabotau ao tiaki te tabo raoi ni koaua. Iangoia bwa bukin tera ngkai e raoiroi iangoan anne.

• Akea te maunga n te aonnaba ae a kona ni bane n noraki mai iai tautaeka n uea nako n te aonnaba.

• E aki tii kaotii tautaeka n uea nako te Riaboro nakon Iesu ma e kaotii naba “tamaroaia.” A aki kona n noraki baikanne man te tabo ae raroanako, ngaia are e taraa n ae e kabongana te Riaboro te aeka ni miitara are e na kaotii iai baikai nakon Iesu. Aei naba aron te aomata ni kabongana te bwai ni kaoti taamnei ngkana e na kaotii taamnein taabo aika kakaokoro nako n te aonnaba.

• Te rongorongo ae titeboo ma anne ae n Ruka 4:5 e taekinna bwa te Riaboro e kaotii nakon Iesu “tautaeka n uea nako n te aonnaba ni kabutaa i nanon tii teuana te tekan,” ae te bae aki kona n noraki raoi n te taratara. E oti n aei bwa e karaoa te kariri aei te Riaboro nakon Iesu rinanon aanga tabeua aika aki kona n noraki ni mataia aomata.