Tera Ana Reirei te Baibara Ibukin te Taetae n Taetae Aika Kakaokoro?

Ana kaeka te Baibara

“Te taetae n taetae aika kakaokoro” e kaineti nakon te konabwai rinanon te kakai are e reke irouia tabeman Kristian rimoa, are a a kona iai n taetae n te taetae ae a bon tuai n reiakinna mai mwaina. (Mwakuri 10:46, New International Version) E rangi ni mataata ana maroro te tia kabwarabwara irouia naake aia taetae are kabonganaaki. (Mwakuri 2:4-8) Te taetae n taetae aika kakaokoro bon te bwaintituaraoi naba teuana rinanon te taamnei ae raoiroi, are e anga te Atua nakoia Kristian tabeman n te moan tienture.—Ebera 2:4; 1 I-Korinto 12:4, 30.

• E reke mai ia ao e moanaki n ningai te taetae n taetae aika kakaokoro?

• E aera ngke e reke te kakai ae te taetae n taetae aika kakaokoro?

• E reitinako te taetae n taetae aika kakaokoro?

• E toki n ningai te taetae n taetae aika kakaokoro?

• Tera aron te taetae n taetae aika kakaokoro ni boong aikai?

• A na kangaa ni kona ni kinaaki Kristian ni koaua?

E reke mai ia ao e moanaki n ningai te taetae n taetae aika kakaokoro?

E moan riki te kakai aei i Ierutarem n ingabongin aia Toa I-Iutaia are Bentekota n 33 C.E. Tao 120 taan rimwin Iesu ake a botaki ngke “a a bane ni kaonaki n te taamnei ae raoiroi ao a a taetae n taetae aika kakaokoro.” (Mwakuri 1:15; 2:1-4) A ikotaki te koraki n aomata aika bati “man aaba nako aika i aani karawa . . . [ao] a ongo n oin aia taetae ngaiia n tatabemania nako, ake a taetae iai taan rimwin Iesu.”​—Mwakuri 2:5, 6.

E aera ngke e reke te kakai ae te taetae n taetae aika kakaokoro?

1. E kaotaki iai ae e boutokaia Kristian te Atua. N taai aika nako ao e kakaraoi kakai te Atua bwa kakoauaan ae e boni boutokaiia aomata aika kakaonimaki n aroni Mote. (Te Otinako 4:1-9, 29-31; Warekaia Iteraera 17:10) Anne naba bukin te taetae n taetae aika kakaokoro, e oti iai bwa e boni boutokaa te ekaretia ni Kristian are e a tibwa tei n te tai arei te Atua. E korea ae kangai te abotoro Bauro: “Te taetae n taetae aika kakaokoro bon te mwakuri ae kamimi, ae tiaki ibukia ake a onimaki, ma ibukia ake a aki onimaki.”​—1 I-Korinto 14:22.

2. Buokaia Kristian bwa a na karaoa raoi te mwakuri n uarongorongo. A taku naake a ongo aia reirei taan rimwin Iesu n te bong are taini Bentekota: “Ti ongo irouia n oin ara taetae bwa a taekin ana mwakuri te Atua aika moanibaa n tamaroa.” (Mwakuri 2:11) Ngaia are bukin naba te kakai aei ae kakawaki bwa a kona iai Kristian ni “kakororaoa kaotiotan” ao ‘reireinakia aomata mai buakoia botannaomata nako, bwa a na riki bwa taan rimwin Iesu,’ n aron are e tua Iesu nakoia. (Mwakuri 10:42; Mataio 28:19) Tao 3,000 mwaitiia naake a nora te kakai ao n ongora aia kaotioti naake a riki bwa taan rimwini Kristo n te bong naba anne.​—Mwakuri 2:41.

E reitinako te taetae n taetae aika kakaokoro?

E aki. Bwaai n tituaraoi rinanon te taamnei n aron naba te taetae n taetae aika kakaokoro, boni baika aki teimaan. E a kaman taekinna te Baibara ni kangai: “Ngkana iai bwaai n tituaraoi ni kaineti ma te konaa n taetae ni burabeti, ao a na mauna. Ngkana iai bwaai n tituaraoi ni kaineti ma te konaa n taetae n taetae aika kakaokoro ao a na toki.”​—1 I-Korinto 13:8.

E toki n ningai te taetae n taetae aika kakaokoro?

E waakinako te bwaintituaraoi rinanon te taamnei ae raoiroi aei nakoia Kristian ake tabeman riki n aia tai abotoro, man aroia abotoro ni kaaki baia i aoia raoia n onimaki. (Mwakuri 8:18; 10:44-46) E oti bwa naake a karekea te bwaintituaraoi rinanon te taamnei mairouia abotoro, a aki manga anganako nakoia tabeman riki. (Mwakuri 8:5-7, 14-17) Ibukini kaikonakana, e kona n anga te raitienti n te turaiua te tia mwakuri n te tautaeka nakon temanna, ma te aomata are anganaki e aki anganaki te kariaia bwa e na manga anganako te raitienti nakon temanna. E taraa ngkanne n toki te taetae n taetae aika kakaokoro ni mateia abotoro ao naake a a manga anganaki te bwaintituaraoi.

Tera aron te taetae n taetae aika kakaokoro ni boong aikai?

Te bwaintituaraoi ae te taetae n taetae aika kakaokoro n te aro ni kakai, e teretere bwa e toki tao ni banen te moan tienture C.E. Ai akea ngkai ae kona n taku bwa e taetae n taetae aika kakaokoro mani mwaakan te Atua.a

A na kangaa ni kona ni kinaaki Kristian ni koaua?

E taku Iesu bwa a na kinaaki taan rimwina n te tangira are a anga iai boni ngaiia. (Ioane 13:34, 35) N aron naba anne, e reirei te abotoro Bauro bwa e na riki te tangira bwa te bwai ae a na kinaaki raoi iai Kristian ni koaua. (1 I-Korinto 13:1, 8) E kaotia bwa taamnein te Atua e na karini aroaro irouia Kristian ake a reke man “uaan te taamnei” ae te moan iai bon te tangira.​—I-Karatia 5:22, 23.