Antai ke Tera “te Arebwa ao te Omeka”?

Ana kaeka te Baibara

E tei “te Arebwa ao te Omeka” ibukin Iehova ae te Atua ae Moan te Mwaaka. E oti te taeka aei tentai n te Baibara.​—Te Kaotioti 1:8; 21:6; 22:13.a

E aera te Atua ngke e taku bwa ngaia “te Arebwa ao te Omeka”?

Arebwa ao omeka bon te moani man ao te kabane n te koroboki n te taetae ni Kuriiti, are te taetae are e koreaki iai mwakoron te Baibara ae ataaki n arana ae te Nu Tetemanti, ae kanoana naba te boki ae Te Kaotioti. Te maranga i marenani manin te koroboki n te taetae ni Kuriiti aikai, a kabonganaaki ni kaotia ae Iehova bon te moa ao te toki. (Te Kaotioti 21:6) Boni ngaia te Atua ae Moan te Mwaaka ma ngkoangkoa, ao e na teimatoa n riki bwa te Atua ae Moan te Mwaaka n aki toki. Bon tii ngaia ae ‘akea moana ma tokina.’​—Taian Areru 90:2.

Antai “te moan ao te kabane”?

A kaai ni kabonganaaki taeka aikai n te Baibara ibukin Iehova ae te Atua ao Natina ae Iesu, ma a kakaokoro ae a nanonaki iai. Iangoi katoto aika uoua aikai.

• N Itaia 44:6 ao e taku Iehova: “Boni ngai te moan ao te kabane. Akea riki te Atua temanna bwa tii ngai.” E katuruturua ikai Iehova bwa boni ngaia te Atua ni koaua ae akea tokina, ao bon akea riki temanna i rarikina. (Te Tua-Kaua 4:​35, 39) Ibukin aei ao te taeka ae “te moan ao te kabane” titeboo ae nanonaki iai ma “te Arebwa ao te Omeka.”

• Irarikina, te taeka ae “te Moan [pro’tos, ae tiaki te arebwa] ao te Kabane [e’skha·tos, ae tiaki te omeka]” a oti n Te Kaotioti 1:17, 18 ao 2:8. E oti ni kiibu ake irarikini kiibu aikai bwa teuare taekinaki iai e boni mate, ma e a manga kautaki. Ngaia are a aki kaineti kiibu aikai nakon te Atua bwa e aki kona ni mate te Atua. (Abakuka 1:12) Ma e a tia ni mate Iesu ao ni kautaki. (Mwakuri 3:13-15) Boni ngaia te moan aomata ae kautaki man te mate nakon te maiu n taamnei ae akea te mate iai i karawa, are e a maeka iai ngkai “n aki totoki.” (Te Kaotioti 1:18; I-Korote 1:18) Bon Iesu ae karaoi kautiuti ni kabane ake imwina. (Ioane 6:40, 44) Ngaia are boni ngaia te kabane n aomata ae kautaki iroun Iehova. (Mwakuri 10:40) Ibukin anne, e bon tau n aranaki Iesu bwa “te Moan ao te Kabane.”

Te koaua bwa e oti n Te Kaotioti 22:13 bwa Iesu bon “te Arebwa ao te Omeka”?

E aki. E aki kaotaki bwa antai ae taekin taeka aika koreaki n Te Kaotioti 22:​13, ao a boni kakaokoro taan taetae n te mwakoro aei. E korea ae kangai te tia Rabakau ae William Barclay ni kabwarabwaraa mwakoron te boki ae Te Kaotioti aei: “A aki koreaki taekani baika riki ni kaineti ma taia ake a riki iai . . . ao e kangaanga ataakin ae antai ae e taekini baika koreaki ni kibun te mwakoro aei tabeua.” (The Revelation of John, Volume 2, Revised Edition, iteraniba 223) Ngaia are “te Arebwa ao te Omeka” ae n Te Kaotioti 22:​13, bon Teuare e anganaki naba te nakoa aei ni kibun Te Kaotioti tabeua, ae taekan Iehova ae te Atua.