Te Koaua ae Maria Bon Tinan te Atua?

Ana kaeka te Baibara

Tiaki ngaia anne, e aki reirei te Baibara bwa Maria bon tinan te Atua, ke ni katerea ae a riai Kristian n taromauria neiei ke ni karinea.a Iangoa aei:

E aki roko n te taekinna Maria ae ngaia tinan te Atua. E kabwarabwaraa te Baibara bwa e bungia neiei “Natin te Atua,” ma tiaki te Atua.—Mareko 1:1; Ruka 1:32.
E aki roko n te taekinna Iesu Kristo ae Maria bon tinan te Atua ke e riai n taromauriaki neiei. Ni koauana, e kaeta te aine temanna Iesu are e taku bwa e kukurei Maria ngkai e riki bwa tinan teuaei, ni kangai: “Tiaki, bwa a a kukurei riki te koraki ake a ongo ana taeka te Atua ma n toua mwina!”—Ruka 11:27, 28.
Bon akea n te Baibara taeka aika “Tinan te Atua” ao “Theotokos” (te aine ae bungia te Atua).
Te taeka n te Baibara ae “Ueannaineni Karawa” e aki kaineti nakoni Maria, ma nakon te atua ni kewe ae te aine ae tataromauriaki irouia I-Iteraera ake a tannako man te taromauri ae koaua. (Ieremia 44:15-19) Tao “Ueannaineni Karawa” aei bon Ishtar (Astarte), are atuaia kaaini Baburon ae te aine.
A aki taromauria Maria Kristian rimoa, ke ni karinea n te aro ae okoro. E taku te tia kororongorongo temanna bwa Kristian rimoa a “rawa nakoia taiani koraki n Aro ao a bae ni maaka naba are ngkana a rangi ni karinea Maria e kona n ueke iai taromauriaia atua ni kewe aika aine.”—In Quest of the Jewish Mary.
E taku te Baibara bwa boni kaman iai te Atua. (Taian Areru 90:1, 2; Itaia 40:28) Kioina ngkai akea moan rikina, e aki kona ngkanne n iai tinana. Irarikina, e aki kona te Atua ni mena i nanoni birotoni Maria, bwa e teretere raoi n te Baibara bwa e aki naba konaa karawa ni kamwaneauaa te Atua.—1 Uea 8:27.

Maria bon Tinan Iesu ao tiaki “Tinan te Atua”

Bon te I-Iutaia Maria ao boni kanoan te Uea ae Tawita. (Ruka 3:23-31) E rangi n akoaki iroun te Atua ibukin ana onimaki ma mamaakan te Atua irouna. (Ruka 1:28) E rinea neiei te Atua bwa e na riki bwa tinan Iesu. (Ruka 1:31, 35) Iai riki natin Maria ma buuna are Ioteba.—Mareko 6:3.

E ngae ngke e kaotaki n te Baibara bwa e riki naba Maria bwa te tia rimwin Iesu, ma e aki rangi n taekinaki riki rongorongona.—Mwakuri 1:14.

E aera ngkai a iangoia tabeman bwa Maria bon tinan te Atua?

E moanaki taromaurian Maria man raabanen te kaaua n tienture C.E. N te tai anne ao e a riki te Aro ni Katorika bwa te Aro n te Embwaea n Rom. Ibukin anne, a bati beekan ngkoa ake a a riki bwa te koraki aika taku bwa Kristian ngaiia. E angareirei naba te Aro aei i aon te Temanna n teniman ae tiaki te reirei man te Baibara.

A kairaki kaain te Aro aika bati man te reirei ae te Temanna n Teniman bwa a na iangoia ae ngkana Iesu bon te Atua, nanona ngkanne bwa Maria bon tinan te Atua. N 431 C.E., ao ana boowi te Aro i Ebeto e a katanoataa bwa Maria bon “Tinan te Atua.” Te waaki ae kakorakoraa karineani Maria, e a butanako imwin te Boowi i Ebeto aei. Ao ngke a a manga kaaina te Aro naake bon taiani beekan, ao bannani Maria ae te Teinnaine e a tabe n ononea mwin atuaia ake aine ake atuan te kakariki n aron Aretemiti (Riana irouia I-Rom) ao Isis.

N 432 C.E. ao e tua te Bobe ae Sixtus III bwa e na kateaki te umwantabu i Rom ibukini karinean “Tinan te Atua.” E kateaki n uakaan ma nnen te tembora rimoa are kateaki ibukini karinean Nei Lucina ae atuaia I-Rom ae irekereke ma bungiakin te teei. E kabwarabwaraa te tia korea te boki temanna, bwa te umwantabu aei e riki bwa “te bwai ni kanuringa ibukin te reitaki i marenan te Tina ae Kakannato ae taromauriaki irouia beekan, ao taromauriani Maria ae rikirake imwin te tai are e riki iai Rom bwa te kaawa ni Kristian.”—Mary—The Complete Resource.

a A angareirei Aaro tabeua bwa Maria bon tinan te Atua. A taekina neiei bwa “Ueannaineni Karawa” ke Theotokos, ae te taeka ni Kuriiti ae nanona “te aine ae bungia te Atua.”