E Taekinaki n te Baibara te Mare Irouia Naake Titeboo Aroia ni Mwaane ao n Aine?

Ana kaeka te Baibara

E a kamani katei tuua ara tia Karikiriki ni kaineti ma taekan te mare, imwain ae a karaoi tuua iai kaain te tautaeka. Ti tuangaki ae kangai ni moani bokin te Baibara: “E na kitana tamana ma tinana te mwaane ao e na nim ma buuna ao a na riki n tii te irikona naakai.” (Karikani Bwaai 2:24) Te taeka n Ebera ae “buuna” ni kaineti ma te Vine’s Expository Dictionary of Biblical Words, “e kaineti nakon te aine.” E kamatoaa n taekinna Iesu bwa naake a riai ni kaai n reitaki n te mare bon “te mwaane ao te aine.”—Mataio 19:4.

Ngaia are e kantaningaia te Atua bwa e na riki te mare bwa te bwai ae e na teimatoa ao a na kaaniaki iai te mwaane ao te aine. A karaoaki mwaane ao aine bwa a na riki bwa raao ni koaua i marenaia bwa a aonga ni kona ni kakukureia temanna ma temanna irouia n aia namakin ao n te wene n taanga ao ni karikaia natiia.