alashi/DigitalVision Vectors via Getty Images
TEIMATOA N TANTANI!
E Aera Ngkai E a Korakora te Riribai?—Tera ae E Taekinna te Baibara?
E a tanoata ongoraeakinan taeka n riribai, mwakuri n iowawa ibukin te riribai, te tiritiri i marenaia reeti aika kakaokoro, ao ai taiani buaka.
“E a bati riki ngkai norakin taeka n riribai i aon te intanete ibukin te itabarara are riki i marenan Iteraera ao Gaza, ao mairouia aomata ake a boutokai mwakuri n iowawa ao ni kairiribai.”—The New York Times, Nobembwa 15, 2023.
“A rina ni birirake mwaitin taeka n riribai ao n iowawa man 7 n Okitobwa ao e riki aei ibukin rikiraken te riribai ae tuai man nonoraki mai mwaina.”—Dennis Francis, te beretitenti n te botaki ae te United Nations General Assembly, Nobembwa 3, 2023.
A aki tibwa kaoti taeka n riribai ma mwakuri n iowawa ao taiani buaka. Ni koauana, e kabwarabwaraa te Baibara taekaia te koraki ngkoa ake “a mamaaire n aia taeka aika kammaraki n ai aroni kanoani kainikatebe” ao te koraki ake a boutokai buaka ao ni karaoi mwakuri n iowawa aika tiritiri. (Taian Areru 64:3; 120:7; 140:1) E ngae n anne, e kabwarabwaraa te Baibara bwa iai manenan ae ti a nora te riribai ni boong aikai.
Te Riribai—Kanikinaean taai aikai
E kaota bukina aika uoua te Baibara bwa e aera ngkai e a taabangaki te riribai ni boong aikai.
1. E a kaman taekina te tai are “e nang kerikaaki [iai] aia tangira angia aomata.” (Mataio 24:12) A nang kaotiotii anua n riribai aomata nako, n oneani mwin are a na kaotiota te tangira.—2 Timoteo 3:1-5.
2. Korakoran te riribai ni boong aikai, e a kaotaki iai rikirakeni buakakan ao iowawaan ana kariri Tatan te Riaboro. E taekinna te Baibara bwa “a bane kaain te aonnaba ni mena i aani mwaakan teuare buakaka.”—1 Ioane 5:19; Te Kaotioti 12:9, 12.
Ma e kaotaki naba n te Baibara bwa e na waekoa te Atua ni kouta wakaan te riribai. Irarikin anne, e nang katoki maraki nako ake a riki man te riribai. E berita te Baibara bwa:
“E na kaoa te rannimata ni kabane [te Atua] mai mataia [aomata], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”—Te Kaotioti 21:4.