Reireinia Natim Bwa A na Kaotiota te Kakaitau

E oti n te kakaae ae a kukurei ao ni marurung riki aomata aika kakaitau, a kona ni kaitaraa riki te kangaanga, ao e kaan reitakia ma raoraoia. E taekinna te tia kakaae ae Robert A. Emmons ae bwainan te kakaitau “e kamanoa te aomata man te bakantang, kaikoan te un, te nanonrang ao te kauntaeka ae korakora.”a

A kangaa ni kakabwaiaaki ataei ni bwainan te kakaitau? Ngke e karaoaki te kamatebwai ae maanna 4 te ririki i aoia 700 rooro n rikirake, ao e noraki bwa e kangaanga riki irouia naake a bwabwaina te kakaitau bwa a na babakanikawai n tain te ukeuke, a na kamanenai taian drug ao kamanging n te aro ae riao, ke ni kaotiotii aroaro aika iowawa.

• E kauarerekea te kakaitau te aroaro ae a riai n reke bwaai iroum. A bati ataei aika a iangoia bwa a bon riai n reke irouia baika raraoi aika riki nakoia. E uarereke te nano ni kakaitau ngkana e iangoaki te kakabwaia bwa kaanga te bwakabwai n oneani mwin ae te bwaintangira.

  E a taabangaki te aroaro anne ni boong aikai. E taekinna te tina ae arana Katherine, “Ti reireinaki n ara aonnaba aei bwa a riai aomata ni karekei baika a tangiri. A kaotaki taamneini bwaai ni kabane n te aonnaba aei aika aongkoa ti riai ni karekei ao a riai moa n reke iroura baikanne.”

• E kona ni moantaai ni karikirakeaki te kakaitau. E kangai te tina ae Kaye: “A kai reireinaki ataei. Reireinaia anua aika raraoi ngkai a uarereke kaanga ai aroni kamanenaani kaai aika kateaki i rarikin te aroka bwa e aonga n rikirake ao n aki bwakee.”

Aron reiakinan te kakaitau

• Reireinia te bwai ae a na taekinna. A kona naba ataei aika uarereke n reireinia n taekina ko rabwa ngkana iai temanna ae angania te bwaintangira ke ni kaota te akoi nakoia. Ngkana a tabe n ikawairake ane a nang moanna ni kakaitau riki n aia tituaraoi tabemwaang.

  

  Ana boto n reirei te Baibara: “Kam na kaotiota ami kakaitau.”—I-Korote 3:15.

  “E tatauraoi tibura te mwaane ae tenua ana ririki n taekina ‘ko rabwa,’ ao e aki toki n taekina ‘taiaoka’ ngkana e bubutii te bwai teuana. E reireinaki anne irouia ana karo. A reireinna te kakaitau man aia katei ao n aroia ni kaota aia kakaitau.”—Jeffrey.

• Reireinia te bwai ae a na karaoia. E aera ko aki tuangia natim bwa a na korea aia taeka ni karabwarabwa n te beeba ae uarereke ngkana iai temanna ae angania te bwaintangira? Ngkana ko katannakoia ma aia mwakuri ko na buokiia naba iai bwa a na ataa kakawakin te mwakuri korakora ibukin tararuaan te mwenga.

  

  Ana boto n reirei te Baibara: “E kakukurei riki te anga nakon te anganaki.”—Mwakuri 20:35.

  “A ibuobuoki natira aika uoman aika tebwi tabun aia ririki n aroia ni bairea aron te amwarake, ni kuuka ao ni karaoi mwakuri riki tabeua. A buokaki n anne bwa a na nori ara mwakuri korakora ae ti karaoia ngkai kaaro ngaira, ao ni kakaitau riki ni baikai.”—Beverly

• Reireinia aroaroia. Iangoa te kakaitau bwa kaanga te aroka ae maiureirei n te tano ae raoiroi ae te nanorinano. A ataia aomata aika nanorinano ae a kainnanoa buokaia bwa e aonga n nakoraoi baika a na karaoi ao a kairaki n anne bwa a na kakaitau ngkana a buokaki irouia tabemwaang.

  

  Ana boto n reirei te Baibara: “Kam na nanorinano n iangoia bwa a kakawaki riki tabemwaang nakoimi, ao kam na aki tii tabeakin oin aromi, ma kam na tabeakin naba aroia tabemwaang.”—I-Biribi 2:3, 4.

  “N tabetai ti karaoa ara takaakaro ibukini kaotiotan te kakaitau n ara tai ni katairiki. E riai temanna ma temanna n taekina te bwai ae e kakaitau iai. Ti kaungaaki iai bwa ti na iangoi baika raraoi, iango ni kakaitau n oneani mwin iaiangoani baika aki raoiroi ao ni bangaomata.”—Tamara.

Te taeka n ibuobuoki: Katea te katoto. E na bebete riki irouia ataei n reiakina te kakaitau ngkana a ongongo mairoum ae ko katoatai ni kaotiota am kakaitau nakoia tabemwaang ao bon nakoia naba.