Arora ni Buokiia Ara Koraki Aika Tiaki Kaain te Onimaki

1-2. Tera ae kona n rota ara iraorao ma ara koraki ngke ti moan reiakina te koaua?

E TAKU Iesu nakon te mwaane are e kan riki bwa te tia rimwina: “Okira mwengam ao kaongoraeia am koraki bwaai ni kabane ake e karaoi Iehova ibukim.” (Mareko 5:19) Ngke e taekina anne Iesu e atai raoi aroia aomata ae ti tatangiria n tibwaa te rongorongo ae raoiroi nakoia naake ti tangiriia.

² Ko uringnga bwa tera am namakin ngke ko moan reiakina te rongorongo ae raoiroi? Ko bae n aki kan taua iroum! Ma a na kona n aki kukurei iai am koraki aika tangiraki iroum. Ke arom n taekina te koaua nakoia e kona ni karika te aki boraoi n iango i marenam ma ngaiia. Ngkana e riki anne, ko na kangaa ni kateimatoa ke ni kaoka am iraorao ae nakoraoi ma am koraki ao n aki kakeaa te kaetieti ibukia Kristian?

3. Tera ae ti na maroroakinna n te kaongora aei?

³ N te kaongora aei, ti na noria bwa: (1) E kangaa te nanoanga ni kona ni kairira bwa ti na kaota tabeakinaia ara koraki aika tiaki kaain te onimaki,a e ngae naba ngkana a aki kan ataa taekan Iehova; (2) arora n tarariaoi aia taeka ao aia mwakuri aika aki raraoi; (3) arora ni kona buokiia ara koraki ngkana ti taotaon nanora ao n teimatoa ni kantaningaia bwa a na beku iroun Iehova imwina riki; ao (4) arora ni kona ni kaotia ae ti tangiriia.

KARIAIA TE NANOANGA BWA E NA KAIRIKO BWA KO NA BUOKIIA

4. Tera aron Iesu nakoia naake a aki kan ongo ana rongorongo?

⁴ E aki waekoa Iesu ni kabwaraa nanona irouia naake a aki kan ongo ana rongorongo. E kabotaua i bon irouna Iesu ma te tia mwakuri n te nne ni kureebe ae katai aanga aika bati aika kakaokoro bwa e aonga n reke uaan te aroka ae te biiku ae aki karikiuaa. (Ruka 13:6-9) Ngke e anga Iesu te kaikonaki anne, e a tia ni kataia ni karikirakea aia onimaki raona n I-Iutaia i nanon tenua tabun te ririki. Bukin tera ngke e teimatoa ni kataia ni buokiia? E nanoangaiia aomata Iesu ao anne ae buokia bwa e na taotaona nanona nakoia.

5. Tera are e kaira Iesu bwa e na kaota nanoangaaia raona n I-Iutaia?

⁵ E nanoangaiia raona n I-Iutaia Iesu ibukina bwa a kabwaka mataniwin Aaro ni buokiia ni karikirakea irouia onimakinan raoi te Atua. E noria Iesu bwa a riki aomata bwa “ai aroia tiibu aika akea te tia kawakinia.” (Mareko 6:34) Teutana te tai imwaini maten Iesu, ao e tang naba ibukin Ierutarem bwa e ataia ae angiina taani maeka iai a na boni mate ibukina bwa akea aia onimaki. (Ruka 19:41-44) Ngkana ti karikirakea iroura te aeka n nanoanga anne ibukia ara koraki, ane ti na kairaki bwa ti na buokiia.

6. Bukin tera bwa ti riai n taotaona nanora nakoia ara koraki aika tiaki kaain te onimaki? (I-Karatia 6:9)

⁶ Wareka I-Karatia 6:9. E ngae ngkana a aki kan ongo ara koraki n ara koaua, ti riai n taotaon nanora nakoia ao n aki kabwarai nanora ni “karaoan ae raoiroi.” Ti ataia ae e anaa te tai ae maan iroun te aomata bwa e na tokanikai i aon ana koaua are matoatoa iai ao ni karikirakea ana onimaki. Anne naba arom ngkoa mai mwaina ngke ‘ko maeka n te aonnaba n akea am kantaninga ao n akea ataakin te Atua iroum’? (IEbe. 2:12) Ngkana eng, akea te nanououa bwa iai temanna ae buokiko. Tiaki ko kairaki naba bwa ko na buokiia am utu n reiakina taekan Iehova, ngkana ko konaa?

TARARIAOI TAEKA AO MWAKURI AIKA AKI RARAOI

7. Tao tera ae tukiia tarin Iesu bwa a na aki onimakinna?

⁷ A bae n ongo tarin Iesu taekani kakai ake e karaoi Iesu i Kariraia. (Ruka 4:14, 22-24) Ma n te moantai, a aki onimakinna. (Ioa. 7:5) Bukin tera? E aki taekinaki n te Baibara. Ma e oti iai baika uoua aika a tukiia I-Iutaia tabeman bwa a na riki bwa taan rimwin Iesu. Tabeman a maaka ae a na ribaaki irouia aomata. (Ioa. 9:18-22) Tabeman a kinaa Iesu man uarerekena ao e kangaanga irouia bwa a na iangoia ae te tia tei ibukin te Atua. (Mareko 6:1-4) A bae naba n rotaki tarin Iesu n te aeka n iango aei. A kona naba n rotaki ara koraki aika tangiraki iroura n aeka n iango akanne?

8. Tao tera ae e kairiia ara koraki aika tiaki kaain te onimaki bwa a na taekini ke ni karaoi baika aki kaota te akoi nakoira?

⁸ Iaiangoi bukina ngkai a taekini ke ni karaoi bwaai. A bae ni mena tarin Iesu i buakoia ana koraki ake a taekinna ngkoa bwa “e a mino.” (Mareko 3:21) Bukin tera ngke a taekina anne? E kaotaki ni bwaninin te rongorongo bwa e rangi n tabetabe Iesu n uarongorongo ao ni kamarurungia aomata n te aro are e a aki naba reke ana tai n amwarake. (Mareko 3:20) A iangoia ana koraki bwa e a rangi n riao ana mwakuri? Eng. A kona n iangoia ara koraki bwa e a rangi n riao arora n taua te Aro. Ngkana anne aia iango ibukira, ti wanawana ngkana ti kaotia n ara taeka ao n ara mwakuri bwa ti aki taua ma nanora n te aro ae riao.

9. Tera ae kona ni buokiia ara koraki bwa a na bita aia iango ibukira? (1 Betero 3:1, 2) (Nori naba taamnei.)

⁹ Kaotia bwa te aeka n aomata raa ngkoe man aroarom. A kona ara taeka aika kaota te akoi ao ara mwakuri ni kairiia ara koraki bwa a na bitii aia iango ibukira. (Wareka 1 Betero 3:1, 2.) E kona te buu te mwaane ae tiaki kaain te onimaki ni waekoa n namakinna bwa e katinanikuaki ke e un, ngkana e kaei bobotaki n taromauri n te ekaretia buuna ke te mwakuri ni minita. Ibukina bwa e aki tangiria neiei bwa e na namakina anne buuna e bae ni kaangaraoi ana babaire ibukin ana onimaki bwa e aonga ni kabanea riki ana tai ma ngaia. N te katoto, e kona n uataboa te mwakuri ni minita ngkana e tabetabe buuna ke ngkana akea ngaia ni mwengana. Ngkana e karaoi aeka ni bitaki akanne te buu te aine, e kona ni buoka buuna ni bita ana iango ibukia taani Kakoaua.

10. Ti na kangaa ni kakairi iroun Iesu ngkana ti kabuakakaaki?

¹⁰ Tai iangoia bwa ko riai ni kaekai kabuakaka ni kabane. E aki kaeka Iesu ngke e bukinaki bwa e amwamwarake ao ni momoi. Ma e kaungaia aomata bwa a na ataa raoi te koaua. (Mat. 11:19) E kaotia naba n ana katoto bwa e iangoa te maiu n te aro ae riai. (Kabotaua ma Ioane 2:2, 6-10.) N aron anne, tai iangoia bwa ko riai ni kaekai kabuakaka ni kabane. Ma kaotia nakoia am koraki n am mwakuri bwa ko bwaina te iango ae riai ao ko kukurei, ao kariaia bwa a na taekin oin aia iango. A na bae ni kairaki bwa a na rawa nakon rongorongo aika kairua ake a ongo ibukira.

TEIMATOA N TAOTAONA NANOMI AO KAKANTANINGA

11. Tera aron Iesu nakoia tarina ake tiaki kaain te onimaki?

¹¹ E kabwarabwaraaki n taian Euangkerio bwa e teimatoa Iesu n taotaona nanona nakoia tarina. N te katoto, ngke e karaoa ana moan kakai Iesu i Kana ao e kakoauaaki bwa a boni mena naba tarina i rarikina. (Ioa. 2:11, 12) N aron ae oti mai imwaina, a aki onimakina Iesu tarina aikai. Ma e ngae n anne, e aki katoka Iesu reitakina ma ngaiia. E kaotaki n te Baibara bwa tao tenua te ririki imwin ana moani kakai Iesu i Kana, ao e kataetaeia tarina ma te akoi.—Ioa. 7:5-8.

12. Tera ae kona ni buokira ni kateimatoa kantaningaan ae a na boni bitaki nanoia ara koraki tabeman?

¹² Ngkana ti ota raoi n ana nanoanga Iehova, ti na kona ni buokaki iai ni kateimatoa ara kantaninga ae raoiroi. Ngkana a a roko n tokia Aaro aika kewe, a kona ara koraki n uringi baike ti a kaman taekin ibukin te tai anne.b (TeKao. 17:16) A na manga kona n raonira n te taromauri ae itiaki imwini moanakin te rawawata ae korakora. Ao ngkana iai moa aia kangaanga ngkai ara koraki aika kaaitarai, ti na boni kabanea ara konaa ni buokiia. Tao a na kani butimwaei riki koaua man te Baibara ngkana a nora koauan ara tangira ao ara akoi.

KAOTIA AE KO TANGIRIIA

13. Tera ae ti riai n taratara raoi iai e ngae ngke ti tatabetabe n ara beku iroun Iehova?

¹³ E ngae ngke ti tatabetabe n ara beku iroun Iehova, ma ti aki tangiria bwa a na iangoia ara koraki bwa ai akea ara tai ibukia ke tao ti a aki tangiriia. (Mat. 7:12) Ti na kangaa ni kaotia ae ti tabeakinia? Iangoi aanga tabeua aikai.

14-15. Tera te anga teuana ae ti kaotia iai bwa ti tangiriia ara koraki aika tiaki kaain te onimaki? Aanga te katoto.

¹⁴ Kateimatoa reitakim ma ngaiia ao kaota tangiraia. Ti kaotia ae ti tangiriia ara koraki n arora ni katoatai ni kaota nakoia te bae ti kakaraoia. N te katoto, ti kona n text nakoia ao ni kanakoi taamnei tabeua ake ti rawei n ara tai ni motirawa, ni mwamwananga, ke n ara botaki ma raoraora. Te bwaintangira ae tau ke te reta ae kaota te akoi bon te bae e kainnanoaki ibukini kanakoraoan te reitaki. Ngkana ti biririmoa ni karaoi aanga aikai, ti a kaotia iai ae ti tangiriia.

¹⁵ Iangoa ana katoto Anna, ae te tari te aine i Armenia. A aki toki n ikoikotaki ana utu neiei, moarara riki n taian rekenibong ao boong ni motirawa. Ngke e butimwaea te koaua Anna, ao a a moanna n raraoma ana utu neiei bwa e na tera aron rotakin aia reitaki ma ngaia n ana onimaki ae boou aei. A raraoma naba bwa e na tera aron rotakina n taai aika imwaina ngkana e motinnanoia bwa e na riki bwa te tia Kakoaua. E kangaa Anna ni kabebetea raraomaia? E taku neiei, “Ngkana I kawariia au koraki, I taekina nakoia te bwai ae riki ni maiuu ao te bwai ae I teimatoa ni kakatabetabeai iai. I kaoia naba nakon au auti ao a ikikina ma raoraou. N tokina, angiina au koraki a a kinaia riki naake I kaan ma ngaiia ao a aikoa maamaa irouia.” E reitia n taku neiei: “A bati au koraki aika a taekinna bwa I kukurei ao a aki manga raraoma irou.”

16. E kangaa Iesu ni kaota tabeakinan tarina ae Iakobo? (Nora naba te kabwarabwara mai nano.)

¹⁶ Kaotia ae ko kan ataa te bae a kakaraoia. Imwini mangautin Iesu ao e kaota tabeakinan tarina ae Iakobo ngke e kaoti nakoina. (1Kor. 15:7) Ko kona n iangoa aron ana namakin Iakobo ngke e a ataia ae e aki kabwaraa nanona Iesu irouna? E a bae ni kakoauaa Iakobo n te tai anne ae Iesu bon te Mesia. Imwini kaitibooia anne, e bae ni buokiia ana utu tabeman Iakobo bwa a na kinaa raoi Iesu.c—Mwa. 1:14.

17. Ti na kangaa ni maiuakina te boto n reirei are n I-Rom 12:15? (Nora naba te taamnei.)

¹⁷ Wareka I-Rom 12:15. Ngkana ti kaota tabeakinaia naake a tangiraki iroura n te tai are a kainnanoia riki, n taai aika nakoraoi ao n taai aika a aki naba, ti kona ni buokiia iai ni bita aroia nakoira.d N te katoto, ti kona n taekinna nakoia ae ti kukurei ngkai e a reke natiia ao n angania te bwaintangira ni kaotia iai bwa ti raonia ni kukureia. Ngkana iai kaain ara utu ae bua ae tangiraki irouia n te mate, ti kona n taetae ni kabebetei nanoia, n anga te ibuobuoki ae manena, ke ni korea te reta ae uarereke ni karaui nanoia. Ao ti kona ni kakawariia, moarara riki ngkana a kaaitara ma taai aika kangaanga.

18. Ti na kangaa ni kakairi iroun Anterea are te tia rimwini Kristo?

¹⁸ Kairiia bwa a na ikikina ma raora n te onimaki. E ingainga Anterea are te tia rimwini Kristo ni kaira tarina are Betero nakon Iesu, ngke e a ataia ae Iesu bon te Mesia. (Ioa. 1:40-42) Ti kona ni karaoa ae aron anne? N te katoto, ti kona n tabetai ni kaoa ara koraki nakon te taromauri ke ngkana ti amwarake ma raoraora? Ngkana ti kairia nakoia raora n te onimaki, e na noria ae bon titeboo arora ma aomata ao ti akoi.

19. Tera ae ti riai ni karaoia nakoia ara koraki e ngae ngkana a aki ota raoi n ara koaua tabeua? (1 Betero 3:15)

¹⁹ Wareka 1 Betero 3:15. A kona n aki ota raoi ara utu bwa e aera ngkai ti rawa ni karaoi bwaai tabeua, ma a na teimatoa n ururingi ara akoi ao ara karinerine. A kona naba ni kakaitau n ara kakorakora ni karekea ara tai ma ngaiia e ngae ngke ti aki kona n raonia iai ni botaki tabeua. N te katoto, ti aki kona n uataboi bukamaru ao katei aika aki boraoi ma te Baibara ma ti kona ni kawariia, n amwarake ma ngaiia, ao n anga ara bwaintangira n taai riki ake tabeua.

TAI KABWARAA NANOM IROUIA AM KORAKI

20. Bukin tera ngkai ti kaungaaki n ana katoto Iakobo?

²⁰ E aki reke ana tai Iakobo n raona Iesu n ana mwakuri ni minita, ma e riki imwina bwa te tia rimwini Kristo. (IKar. 1:18, 19; 2:9) E ngae ngke e aki riki Iakobo bwa temanna i buakoia taani moan rimwini Kristo, ma e maiuakin raoi ana angareirei Iesu. N te katoto, i aani kairana n te taamnei ae raoiroi ao e korea ana reta ae taekini iai kanoan te Kabwarabwara i aon te Maunga.e

21. Bukin tera bwa ti aki riai ni kabwarai nanora irouia ara koraki aika tiaki kaain te onimaki?

²¹ E ngae ngkana ti kabanea ara konaa ni kaota tabeakinaia ara koraki aika tiaki kaain te onimaki, ma a kona n aki kan ongora n te koaua ke n rawa ni butimwaeia. Bukin tera bwa ti aki riai ni kabwarai nanora irouia? Ibukina bwa ni katoatai are ti kaota te akoi nakoia ara koraki, ti a kakairi iai iroun Atuara ae nanoanga ae Iehova ao Natina ae Iesu. (Ruka 6:33, 36) Ni waakinakon te tai, a kona ni kairaki bwa a na bitii aia iango ibukira man arora n tatangira. A kona naba n ururingi koaua ake ti tibwai nakoia n taai aika nako. Ngkana ti aki kabwarai nanora irouia, ti na bae ni kimwareirei n noraia ara koraki tabeman aika tangiraki iroura n raonira n te taromauri ae koaua!