Teimatoa n Ataa Kakawakin ae Ko “Kainnanoa te Atua”

1. Baikara bwaai tabeua aika a kainnanoi aomata? (Mataio 5:3)

E KARIKIIA aomata Iehova ma baika kainnanoi ni maiuia. N te katoto, ti kainnanoa te amwarake, kunnikaira, ao kamanoara ibukini kateimatoaani maiura. E kona ni kangaanga maiura ngkana e aki naba reke teuana mai buakoni baikai i nanon tabeua te tai. E aki tii karikira Iehova ma kainnanoani bwaai n rabwata aikai, ma e karikira naba ma kainnanoan te Atua ni maiura. (Wareka Mataio 5:3.) Ngkana ti kani kukurei ni koaua, ti riai n ataa kainnanora anne ao n teimatoa ni karerekea.

2. Ko na kangaa ni kabwarabwaraa nanon ae ko ‘ataa kainnanoan te Atua’ iroum?

² Tera ae nanonaki n ae ti ‘ataa kainnanoan te Atua’ iroura? N te moan taetae are kabonganaaki iai te kibuntaeka aei ao e nanonaki iai taekan te tia bubutii ibukin te taamnei. Karaua iangoa te aomata ae te tia bubutii. Iangoa te aomata ae e burinana ao ni kunnikaia n ae raemengamenga ao e torotoro i rarikin te kawai. Akea korakorana bwa akea kanana, e katinanikuaki ibukin taraakin teina ao e mena i aan te riringa ae korakora n te ngaina ao te kamwaitoro n te tairiki. E ataia raoi te tia bubutii aei ae e na kainnanoa te ibuobuoki ngkana e kani kanakoraoa aroni maiuna. N aron anne, e na kainnanoa buokana te aomata ae ataa kainnanoan te Atua irouna, ae te tia bubutii te taamnei, bwa e aonga ni kanakoraoa arona. Ngaia are e ingainga ni kamanenai raoi baika katauraoaki ibukin te onimaki aika e anga Iehova nakoia te koraki aika a tangiria.

3. Tera ae ti na maroroakinna n te kaongora aei?

³ N te kaongora aei, ti na maroroakina moa reireiara mairoun aineni Boinike are e bubutiia Iesu buokana. E katuruturuaki n te rongorongo aei aroaro aika tenua aika a riai ni karikirakei naake a ataa kainnanoan te Atua irouia. Imwina ti na maroroakin aia katoto te abotoro Betero ao Bauro n ikotaki naba ma te Uea are Tawita, aika mwaane aika korakora aia onimaki.

TE KATOTO N TE NANORINANO, TE BOTUMWAAKA, AO TE ONIMAKI

4. Tera are e tangiria aineni Boinike mairoun Iesu?

⁴ N te tai teuana ao e kawara Iesu temanna aineni Boinike. E “korakora taniakin [natina] te aine n te taimonio.” (Mat. 15:​21-28) E katorobubua te aine aei ao e bubutiia Iesu buokana. E kaotiotii aroaro aika rianako aineni Boinike aei ngke e kawara Iesu. Iangoi tabeua mai iai.

5. Baikara aroaro aika e kaotiotii te aine aei ao tera are e karaoia Iesu? (Nora naba te taamnei.)

⁵ E kaotiota te nanorinano ni koaua aineni Boinike. E aera bwa ti taekina anne? Ibukina bwa e aki un ngke e kabongana Iesu te kaikonaki ae taraa ni kabotaua iai neiei ma te kamea ae uarereke, ae tao te aeka ni man ae maninaki irouia kaain te utu n Tientaire. Tera ae ko na karaoia ngke arona bwa e taekina anne Iesu nakoim? Ko na un iai ao ko a aki naba kani bubutiia buokam? Tiaki anne aron aineni Boinike. E aki tii kaotiota te nanorinano ma e botumwaaka naba. E teretere aei man arona n teimatoa ni bubutiia Iesu buokana. Tera ae kairia bwa e na karaoa aei? E onimakina Iesu. Ni koauana, e ringaki nanon Iesu n ana onimaki neiei ao e karaoa te bwai ae kamimi. E ngae ngke e a tia n taku Iesu ae kanakoaki bwa e na tii buokiia “tiibu aika bua aika tibun Iteraera,” ma e boni kanakoa naba te taamnei ae buakaka mairoun natin te aine ae te Tientaire aei.

6. Tera reireiara man rongorongon aineni Boinike?

⁶ Ngkana ti kani kakabwaiaaki man ana kairiri Iehova, ti riai ni karikirakei naba aroaro aikai. Ti riai n nanorinano, ni botumwaaka, ao ni karekea ara onimaki ae korakora. Bon tii te aomata ae nanorinano ae e na botumwaaka ni bubutiia te Atua buokana. E riai naba ni korakora onimakinani Kristo Iesu iroura ao onimakinaia naake e kabonganaia ni kaiririia iai taan rimwina. (Mat. 24:45-47) A kukurei Iehova ao Iesu ni kairirira ngkana ti kaotiotii aroaro aikai. (Kabotaua ma Iakobo 1:5-7.) Ti na nora ngkai aron Iehova ni kairirira ao n anganira baika ti kainnanoi bwa ti aonga ni kukurei. Ti na noria bwa tera ae ti riai ni karaoia ni karekei baika ti kainnanoi aikai ngkana ti nori aia katoto te abotoro Betero ao Bauro n ikotaki naba ma te Uea are Tawita.

TEIMATOA NI KANUAIKO N TE AMWARAKE N TAAMNEI N ARONI BETERO

7. Tera mwiokoani Betero are e anganaki, ma tera ae e riai naba ni karaoia? Kabwarabwaraa. (Ebera 5:14–6:1)

⁷ Iangoa ana katoto te abotoro Betero. Boni ngaia temanna i buakoia I-Iutaia ake a moani kakoauaa ae Iesu bon te Mesia, are e kabongana Iehova ni kanuaia Ana aomata n “taeka aika kairiri nakon te maiu are aki toki.” (Ioa. 6:66-68) Imwain rieraken Iesu nako karawa imwini kautana, e angani Betero te mwioko aei: “Kaamwarakeia au tiibu aika uarereke.” (Ioa. 21:17) E kakaonimaki Betero ni kakororaoa te mwioko anne, ao e kabongana naba Iehova ni korei reeta aika uoua ake a a riki bwa kanoan te Baibara. Ma e riai naba Betero ni kanuaia n amwarake n taamnei. N te katoto, e ukeuke i aon reeta ake e korei te abotoro Bauro ni kairana n te taamnei ao n riki bwa kanoan te Koroboki ae Tabu. E ataia Betero ae iai tabeua baike e korei taekaia Bauro ake “e kangaanga te ota iai.” (2Bet. 3:15, 16) Ma e botumwaaka Betero n onimakinna ae e na boni buokia Iehova n iaiangoi, ke n ota ao ni maiuakina “te amwarake ae matoatoa” ake e korei Bauro n ana reta ni kairana n te taamnei.—Wareka Ebera 5:14–6:1.

8. Tera aroni Betero nakon te oota ae boou are e kaotia te tia tei ibukin te Atua?

⁸ E kaotia Betero bwa e onimakina Iehova n arona n ongeaba n te kaetieti are e anganaki. N te katoto, ngke e mena ni matabaiawan te kaawa ae Iobe, ao e nora te miitara Betero ike e tuangaki iai iroun te tia tei ibukin te Atua bwa e na tiringi ao ni kang maan aika aki itiaki i aan te Tua Rinanoni Mote. E na boni kamimi te kaetieti anne nakoia I-Iutaia. N te moantai e kaeka Betero ni kangai: “Te Uea, tiaki ngaia anne, ibukina bwa I tuai mani kana te bwai teuana ae kamwara ao ae aki itiaki.” Imwina e a manga tuangaki aei: “Katoka atongani baike e a tia ni kaitiakii te Atua bwa a kamwara.” (Mwa. 10:9-15) E ongeaba Betero ao e bita ana iango. Ti kangaa n ataia? Ngke e tia naba ngkekei n roko te miitara irouna ao a roko teniman mwaane mairoun te Tientaire ae Korenerio ao a kaoa Betero bwa e na kawara aia toka ao n taetae ma ngaia. N etina, e na bon rawa Betero n rin n ana auti te Tientaire. A iangoia I-Iutaia bwa a aki itiaki Tientaire. (Mwa. 10:28, 29) Ma e waekoa Betero ni butimwaea te oota ae boou are e kaotia Iehova nakoina. (TaeRab. 4:18) E uarongorongo nakoni Korenerio ma kaaini batana ao e kimwareirei n noriia naakai ni butimwaea te koaua, ni karekea te taamnei ae raoiroi, ao ni bwabetitoaki.—Mwa. 10:44-48.

9. Baikara aanga aika uoua aika ti kona iai ni kakabwaiaaki mani karikirakeani bwaruan amwarake n taamnei aika matoatoa?

⁹ N aroni Betero, ti riai ni katoatai ni kamarikeira n te rannimamma ke moani koaua n Ana Taeka te Atua. Ti riai naba ni karikirakea bwaruan amwarake n taamnei aika matoatoa, aika koaua aika e kangaanga riki te ota iai. Ti riai ni kamwaawa ara tai ao ni kukurei ni kakorakoraira ni kananoa otara n Ana Taeka te Atua. Bukin tera? Ti kakabwaiaaki iai n aanga aika uoua: Te moan, ti reiakina iai taekan Iehova aika kakorakoraa tangirana iroura ao karineana, ao te kauoua, ti a kaungaaki riki iai bwa ti na tuangia tabemwaang taekan Tamara are i karawa ae kamimi ma ni kakamaaku. (IRom 11:33; TeKao. 4:11) E reke reireiara riki teuana n ana katoto Betero: Ngkana ti karekei bitaki i aon otara n Ana Taeka te Atua, ti riai ni waekoa ni bitii ara iango ao baika ti kakaraoi. Tii anne te anga ae ti na teimatoa iai ni kanuaaki n te amwarake n taamnei ao ni manena iroun Iehova.

TEIMATOA NI KARINA TE AROARO AE BOOU N ARONI BAURO

10. Tera ae nanonaki n ae ti na karina i aora kunnikaira n te onimaki? (I-Korote 3:8-10)

¹⁰ Ngkana ti kani kakukureia te Atua, ti riai ni kamanena raoi te bwai ae e katauraoia naba ibukira Iehova: ae kunnikaira n te onimaki. Tera nanon anne? E koreia te abotoro Bauro bwa ti riai ni “buuta te aroaro nikawai” ao ni karina i aora “te aroaro ae boou.” (Wareka I-Korote 3:8-10.) E kainnanoa te tai ao te kakorakora karikirakean te aroaro ae kukurei iai te Atua. Iangoa ana katoto Bauro. E mwakuri korakora mangke e uarereke ni karekea akoana iroun te Atua. (IKar. 1:14; IBir. 3:4, 5) Ma e aki ataa te atatai ae eti ibukin ana kantaninga te Atua ao ibukin anne e mamaara ana onimaki. Ibukina bwa e kakeai ana angareirei Kristo ao e kamoamoa, e a riki iai bwa “te mwaane ae . . . kainikatonga” ae karina i aona te aroaro ae aki raoiroi.—1Tim. 1:13.

11. Tera kabwakani Bauro are e riai ni mwakuri korakora n tokanikai iai? Kabwarabwaraa.

¹¹ Imwain rikini Bauro bwa te Kristian, ao e rangi ni kakaiun. E kaotaki n te rongorongo n te boki ae Mwakuri bwa e rangi n un Bauro irouia taan rimwin Iesu ao e ‘teimatoa ni kakamaakuia ao e korakora nanona ni kan tiringia.’ (Mwa. 9:1) E boni bae Bauro ni mwakuri korakora ni buuta aroarona ni kawai aei imwin rikina bwa te Kristian. (IEbe. 4:22, 31) Ma e ngae n anne, ngke e kauntaeka Bauro ma Barenaba, ao e riki bwa “te kauntaeka ae korakora.” (Mwa. 15:37-39) E a manga bwaka naba Bauro ma e aki kabwaraa nanona. E teimatoa ni ‘kammaraka rabwatana’ ni buakana aki kororaoina bwa e aonga ni karekea akoana iroun Iehova.—1Kor. 9:27.

12. Tera ae e buoka Bauro n tokanikai ni buutii aroarona aika aki raraoi?

¹² E tokanikai Bauro ni buutii aroarona aika aki raraoi ao ni karina i aona te aroaro ae boou ibukina bwa e aki onimakina oini korakorana. (IBir. 4:13) N aroni Betero, e onimakina “te korakora are reke mairoun te Atua” Bauro. (1Bet. 4:11) Ma bon iai naba taai ake e namakinna iai Bauro bwa e kabwaka. Ma ngke e bwara nanona, ao e iaiangoi baika raraoi ake e a tia ni karaoi ibukina Tamana are i karawa, ao anne are e a kakorakoraa iai ana motinnano bwa e na teimatoa ni kekeiaki.—IRom 7:21-25.

13. Ti na kangaa ni katotonga Bauro?

¹³ Ti kona ni katotonga Bauro ngkana ti ataia ae n aki ongeia bwa maanra ngaira ni beku iroun Iehova, ma ti riai n teimatoa ni mwakuria buutan te aroaro nikawai ao ni karina te aroaro ae boou ae kunnikaira n taamnei ae katauraoia te Atua. Ngkana ti a manga bwaka, n aron ae ti a manga un ke n taetae ma te aki akoi nakon temanna, ti aki riai n iangoira bwa ti kabwaka. Ma ti riai n teimatoa n uaiakina tiara ae ti na onikaki n ara iango ao n ara mwakuri. (IRom 12:1, 2; IEbe. 4:24) Ma ngkana ti karaoa anne, ti riai n ururinga te koaua ae kakawaki aei: Ti riai ni kaangaraoira bwa e aonga n tau ara kunnikai n te onimaki ae katauraoia Iehova, tiaki n aron te kunnikai ni koaua ae riai ni manga karaoaki bwa e aonga n tau i aora. E bon riai iroura bwa ti na bitii arora ni kaangaraoia ma te bae tangiria te Atua mairoura.

TEIMATOA NI KAMANOAKI RAOI N TE ONIMAKI N ARON TAWITA

14-15. E kangaa Iehova ni katauraoa te kamanomano n te onimaki ibukia ana aomata? (Taian Areru 27:5) (Nora naba te taamnei ni te maekatin.)

¹⁴ Ngkana ti na kukurei ni koaua, ti kainnanoa riki ae bati nakon amwarake n taamnei ao kunnikaira n te onimaki. Ti kainnanoa naba kamanoara n te onimaki. Tera te baenne ao ti na kangaa n taraia raoi bwa ti na teimatoa ni kamanoaki iai?

¹⁵ E taekina taekan te kamanomano n te onimaki ae katauraoia Iehova te Uea are Tawita. (Wareka Taian Areru 27:5.) E kamanoia ana aomata Iehova mairoun temanna ke te bwai teuana ae kona n uruana onimakinan Iehova irouia. E kangaa Iehova ni kamanoia ana toro mani baika kakamaaku? E berita bwa akea te bwai ni buaka ae karaoaki n ekianako ae e na tokanikai. (TaiAre. 34:7; Ita. 54:17) E ngae ngke a korakora Tatan ma ana taimonio, ma a aki kona ni kammarakira n aki toki. E ngae ngkana a tiringira ma e na kaoka maiura Iehova n te mangauti. (1Kor. 15:55-57; TeKao. 21:3, 4) E buokira naba Iehova ni kabokorakora ma te raraoma ae riao ae kona ni kammarakira n aki toki. (TaeRab. 12:25; Mat. 6:27-29) E katauraoa naba ara utu n te onimaki Tamara ae tatangira, ae kaainaki irouia taari mwaane ao aine aika boutokaira ao unimwaane aika kawakinira. (Ita. 32:1, 2) Ngkana ti botaki n taromauri, ti a kakauringaki iai aanga aika ti kona ni kabongana raoi ana kamanomano Iehova.—Ebera 10:24, 25.

16. E kangaa Iehova ni kamanoa Tawita?

¹⁶ E kamanoaki Tawita man te kabuanibwai are riki nakoia ake a karaoa ae bure n oin nanoia, ngke e ongeaba iroun Iehova. (Kabotaua ma Taeka N Rabakau 5:1, 2.) Ni kaitaraan anne, e aki kamanoa Iehova mani mwin ana mwakuri ngke e kakeai ana kaetieti te Atua Tawita. (2Tam. 12:9, 10) Tera aron taai ake e karawawataaki iai Tawita ma e aki karaoa ae kairua? E bunra nanona Tawita nakon Iehova n te tataro ao e kabebetea raraoman Tawita n arona ni karaua nanona ae E rangi n tangiria ao e na bon tabeakinna.—TaiAre. 23:1-6.

17. Ti na kangaa ni katotonga Tawita?

¹⁷ Ti kona ni katotonga Tawita ngkana ti ukera ana reirei ni kairiri Iehova ni karaoan ara motinnano. Ti ataia naba ae ti kona ni karawawataaki n tabetai, tiaki ibukin ae e kabwaka Iehova ni kamanoira, ma ibukina bwa ti karaoi motinnano aika aki raraoi. (IKar. 6:7, 8) Bwa e ngae naba ngkana ti ongeaba iroun Iehova, ma n tabetai ti karawawataaki i aani bukina tabeua ngaia are ti bunra nanora nakon Iehova n te tataro n onimakinan ae e na boni kawakin nanora ma ara iango.—IBir. 4:6, 7.

TEIMATOA N ATAA KAKAWAKIN AE KO KAINNANOA TE ATUA

18. Tera te kangaanga ae ti boo ma ngaia, ao ti na kangaa n teimatoa n onimakina ana kairiri Iehova? (Nori naba taamnei.)

¹⁸ E kangai ara kibu n te ririki 2026: “A a kukurei akana ataia bwa a kainnanoa te Atua.” E a rangi ni kainnanoaki riki anne ngkai. Bukin tera? Ibukina bwa ti otabwaniniaki irouia aomata aika aki kukurei aika a kakeaa kainnanoia aei ke a kataia ni karekea kainnanoia aei i bon irouia rinanoia Aaro aika kewe ke wanawanaia aomata. Ti aki riai ni kariaia te aeka n aroaro anne bwa ti na rotaki iai. N te aro raa? N arora ni kanuaira raoi n amwarake n taamnei aika e katauraoi Iehova, ni kunnikainira n te aroaro ae boou, ao n ukera kamanoara n ana kamanomano Iehova ae katauraoia.