Buokaia Aine Aika Karaoaki ae Aki Riai Nakoia

Anne bukina ngke e waakinaki karaoan te kaongora n jw.org ae “Women’s Safety​—The Bible’s Perspective.” Iai te ringki n te kaongora anne ae ko kona ni karekea iai man te intanete n te PDF, ae e kona ni boreetiaki ao n oteaki ni karikaki bwa te turaeki. E kangai te tari te aine ae Stacy man te United States, “I karekei katoton te kaongora aei aika tiraua ao I uotii ngai ma te tari te aine temanna nakon taabo ake a kawakinaki iai aine n aonon ara ekaretia.”

E bubutii te tia mwakuri n te tabo anne ngkana e kona riki n reke katoton te kaongora anne bwa e na angania naake a maeka ikanne. N tokina ao a a nikiraki 40 riki turaeki aikai n ikotaki ma beeban ara atureti ae jw.org aika 30. Ngke ti kawara te tabo aei imwina riki ao e a tangiria te mataniwi n te tabo aei bwa ti na kaota aroni kairan te reirei n te Baibara nakoia aine ake a maeka ikanne.

E nako Stacy ma taari aine aika uoman nakon te tabo riki teuana ae a kawakinaki iai aine ao e butimwaeaki iai katoton aia turaeki aika 5 ao a a manga bubutii riki ae bati. E taku te tia mwakuri temanna, “A na boni buokaki aine ikai n te turaeki aei.” E reitia n taku, “Ti boni kainnanoia.” N rokoia are imwina ao a ikotaki tabeman ake a maeka iai bwa a na nora aroni kabwarabwaraan te reirei n te Baibara, ao iai uoman i buakoia ake a kani kaea te taromauri n te wikeen are imwina n te Tabo n Taromauri.

E taku Stacy: “Ti rangi ni mimi n aroni butimwaean te kaongora ae tamaroa aei. Ngkana ti karaoi katotona ao n oteia, e a riki bwa te anga ae tamaroa ibukin tibwaan rongorongon te Tautaeka n Uea nakoia aine aika karaoaki ae aki riai nakoia. A rotaki nanora n aroni butimwaean te rongorongo aei irouia aomata ao ti ingainga n nora aron Iehova ni kakabwaiaa mwin ara kakorakora ni karokoa te rongorongo ae raoiroi irouia aine aikai.”