Kamanoaia Aine—Ana Iango Iai te Baibara

“E katoabong mwaaneu ni batiboai ao ni mwamwangaingai nakoiu ngke te teei ngai. E teimatoa tinani buu ni bwainikirinai imwin ieiniu. A karikai, ngaia ma buuna, bwa kaanga aia kaaunga. E rereke n au iango are N na bakabureai.”—Madhu,a Inria.

E kamatoaa ni kangai te botaki ae te World Health Organization: “Te iowawa nakoia aine bon te kangaanga ae taabangaki n te aonnaba.” E katautauaki bwa e na bae temanna mai buakoia teniman aine, n rinanon te bwainikirinaki n oreaki ke n tauaki ma te iowawa i nanoni maiuna.

Ngkana e a tia n riki anne nakoim, ko na bae n iangoia bwa e na kakaraoaki aekan anne nakoim n taabo ake ko nako iai. Ibukini bwainikirinaia aine ma te iowawa ao te aki ako nakoia, ko na bae n iangoia ae angiia aomata, a na iangoa aei: “A aki kakawaki aine.” Ma a kakawaki aine i matan te Atua?

Tera ana iango te Atua ibukia aine?

Kibu: “E karikiia [te Atua] bwa te mwaane ao te aine.”—Karikani Bwaai 1:27.

Nanona: E karika te mwaane ao te aine te Atua. E iangoiia naakai bwa a tau ni karineaki. I rarikin anne, e kantaningaa te buumwaane bwa e na “riai n tangira buuna . . . n arona n tangiria i bon irouna” ao n aki kataia n taumatoaia n taeka aika bubuaka ke n te iowawa bwa e na iraki ana eti. (I-Ebeto 5:33; I-Korote 3:19) E teretere bwa e kakawaki i matan te Atua kamanoaia aine.

“I tauaki irouia oin au koraki ngke te teei ngai. Ngke ai 17 au ririki ao e kakamaakai au tia kammwakuri n taku bwa e na kabaneai ngkana I aki wene ni bure ma ngaia. Ngkai I a ikawai, a aki toki ni bwainikirinai ni kamangorai buu, au karo ao kaain rarikiu. N tokin te tai, I a reirei taekan Iehova ae,b te tia Karikiriki. E iangoia aine n te aro ni karinerine. Aei are e a karauaki iai nanou n ataakin ae e tangirai ao I kakawaki i matana.”—Maria, Argentina.

Tera ae e na buoka marurungin am iango ma am namakin?

Kibu: “Iai te rao ae nimnim riki nakon te tari.”—Taeka N Rabakau 18:24.

Nanona: E na boutokaiko te rao ni koaua. Bunra nanom nakon ane ko onimakinna, ngkana e reke iai buokam.

“Akea temanna ae I a tia n taetae nakoina i nanon 20 te ririki ni kaineti ma tauakiu. Ibukin anne ao I namakina te aki kukurei, e riao tabeaiangau ao rawawatau. Ma e korakora kabebeteakiu ngke I a tia ni bunra nanou nakon temanna ae kukurei ni kakauongo nakoiu.”—Elif, Türkiye.

Kibu: “Kabanei ami iango n raraoma ni kaaki i aona [te Atua], ibukina bwa e mumutiakiningkami.”—1 Betero 5:7.

Nanona: E kakauongo raoi nakoim te Atua ngkana ko tataro. (Taian Areru 55:22; 65:2) E kona ni buokiko n ota ni kaineti ma kakawakim ibukina bwa e mumutiakiniko.

“Reiakinan taekan Iehova, e tabe ni kabebetea korakain au namakin imwini mwakuri aika karaoaki nakoiu. I a kona ngkai ni bunra nanou ma au namakin nakon te Atua n te tataro. Titeboo ngaia ma te rao ni koaua ae rangi n ota n au namakin.”—Ana, Belize.

E na katoka bwainikirinaia aine te Atua?

Kibu: “Iehova . . . Ko na karaoa te kaetitaeka ae riai nakoia ataei aika akea tamaia, ao nakoia te koraki ake a karawawataaki, bwa e aonga n aki manga kakamaakuia te aomata ae mamate ae karaoaki man te tano.”—Taian Areru 10:17, 18.

Nanona: E na waekoa te Atua ni kamaunai ribuaka ni kabane, n ikotaki ma te aki ako ao te iowawa nakoia aine.

“E riki bwa kaanga te bwainnaoraki ae kamarurungai ataakin ae e na waekoa Iehova ni katoka bwainikirinaia aine aika ikawai ma ataei. E kabebeteaki iai nanou ma au iango.”—Roberta, Mexico.

Ngkana ko kan reiakina riki aron te Baibara n anganiko te kantaninga ma bukina ngkai ko riai n onimakin ana berita nako, ao aroia Ana Tia Kakoaua Iehova ni katauraoa buokam man te Baibara n te bong aio, bubutii kawaram n aki kabooa.