“Tai Kamotirawaa Baim ni Karokoa ae Bong”

1-2. E kangaa n irekereke Te Minita 11:6 ma tataekinan te rongorongo ae raoiroi ae taekan te Tautaeka n Uea?

N AABA tabeua, a rangi ni kukurei aomata ni butimwaea te rongorongo ae raoiroi. Bon te bwai ae a ingainga ni kani karekea! Ma n aaba ake tabeua, a aki kan ongora aomata taekan te Atua ke te Baibara. Tera aroia kaain am tabo? N aki ongeia bwa tera, ma e kantaningaira Iehova bwa ti na teimatoa n uarongorongo ni karokoa are e a boni katoka te mwakuri.

² E na bon roko n tokina te mwakuri n uarongorongo n te tai are e baireia Iehova, ao imwina “e a roko naba te toki.” (Mat. 24:14, 36) Ma imwain rokon te tai anne, ti na kangaa n ongeaba n taeka aikai: “Tai kamotirawaa baim”?b​—Wareka Te Minita 11:6.

3. Tera ae ti na rinanona n te kaongora aei?

³ E kaotaki n te kaongora are mai mwaina baika aua aika ti riai ni karaoi bwa ti aonga ni mwaatai n ara beku ae ‘taan akawa aika konara aomata.’ (Mat. 4:19) E na maroroakinaki n te kaongora aei aanga aika tenua ake a kona ni buokira ni kamatoai nanora bwa ti na uarongorongo n aki ongei kangaanga. Ti na noria bwa e aera ngkai e kakawaki bwa (1) ti na kaatuua ara iango n te mwakuri n uarongorongo, (2) ti na bwaina te taotaonakinnano, ao (3) ti na kateimatoa korakoran ara onimaki.

KAATUUA AM IANGO

4. E aera bwa ti riai ni kaatuua ara iango n te mwakuri are e anganira Iehova?

⁴ E a kaman taekin Iesu baika a na riki aika a na kanikinaeaki iai kabaneani boong. A kona naba baikai ni katikiianako taan rimwina mani kakororaoan aia mwakuri n uarongorongo. E kaungaia taan rimwina bwa a na “teimatoa n tantani.” (Mat. 24:42) N ana bong Noa, a bati baike a katabetabeaki iai aomata n te aro are a aikoa butimwaea te kauring are e tataekinna. Ti kona naba ni katikakinako ni baikanne ni boong aikai. (Mat. 24:37-39; 2Bet. 2:5) Anne bukina ngkai ti kani kaatuua ara iango n te mwakuri are e anganira Iehova bwa ti na karaoia.

5. E kangaa Mwakuri 1:6-8 ni kabwarabwaraa raababanakon te mwakuri n uarongorongo?

⁵ Ni boong aikai, ti bon riai ni kaatuua ara iango i aon tataekinan te Tautaeka n Uea. E a kaman taekinna Iesu bwa e na raababanako te mwakuri aei ao n reitinako karaoana imwini matena. (Ioa. 14:12) Imwini maten Iesu ao tabeman taan rimwina a a manga okira aia akawa. Ma imwini kautakina, e a karaoa te kakai ni karekei iika aika bati bwa konaia taan rimwina tabeman. E kamanena te tai anne Iesu ni katuruturua nakoia ae e kakawaki riki mwiokoaia ae taan akawa aika konaia aomata, nakoni mwakuri nako. (Ioa. 21:15-17) Imwain rierakena nako karawa, e tuangia taan rimwina bwa te mwakuri n uarongorongo are e moana karaoana, e na boni karaoaki n taabo aika raroanako ao tiaki tii i aon Iteraera. (Wareka Mwakuri 1:6-8.) N ririki ake imwina ao Iesu e angan te abotoro Ioane te miitara teuana ae kaotaki iai te bwai ae e na riki n “ana bong te Uea.”c E nora naba Ioane te bwai ae kamimi aei: I aan aia kairiri anera, e a tataekinaki “te rongorongo ae raoiroi ae teimatoa n aki totoki,” nakoia “natannaomata nako ao baronga ao taian taetae ao botannaomata.” (TeKao. 1:10; 14:6) E teretere n anne bwa e boni kantaningaira Iehova ni boong aikai bwa ti na uataboa te mwakuri n uarongorongo ae bubura aei, ni karokoa tian te mwakuri.

6. Ti na kangaa ni kona ni kaatuua ara iango n te mwakuri n uarongorongo?

⁶ Ti kona ni kaatuua ara iango n te mwakuri n uarongorongo ngkana ti iaiangoi baika bati ake e karaoi Iehova ibukini buokara. N te katoto, e katauraoa te amwarake n taamnei ae bati rinanoni baika boreetiaki ao ake a katokaaki n te intanete, bwanaa ao taamnei aika raweaki, ao Ana Kanakobwanaa JW. Iangoa aei: A tauraoi kaongora n ara atureti n te intanete n taetae aika raka i aon 1,000! (Mat. 24:45-47) E a korakora te kakaokoroaki n te aonnaba ibukin te waaki n tautaeka, te Aro, ao kaubwaia aomata. Ma e raka i aoni wanua te mirion mwaitiia ana toro te Atua aika katiteuanaaki ni koaua n aia botaki n itaritari ae katobibia te aonnaba. N te katoto, n te Kanimabong, Eberi 19, 2019, a katiteuanaaki taani Kakoaua ni kabutaa te aonnaba ni mataku n te taamnei ae maroroakinaki iai te kibu ibukin te bong anne. N te tairiki anne, a ikotaki aomata aika 20,919,041 ni karaoa te Kauring ibukini maten Iesu. Ti kaungaaki bwa ti na kaatuua ara iango n ara mwakuri n tataekina te Tautaeka n Uea, man iaiangoan ae ti kakabwaiaaki ngkai ti kona n nori baika kamimi aika riki aikai, ao ngkai ti kona n ibuobuoki iai.

7. E kangaa ana katoto Iesu ni buokira bwa ti na kaatuui ara iango?

⁷ Te anga riki teuana ae ti kona iai ni kaatuui ara iango n te uarongorongo, boni man arora ni kakairi n ana katoto Iesu. E aki kariaia te bwai teuana bwa e na katikakinako iai mani kaotiotan te koaua. (Ioa. 18:37) E aki anaaki nanona ngke e anganna Tatan “tautaeka n uea nako n te aonnaba ma tamaroaia”, ao ngke a kani kaueaa aomata. (Mat. 4:8, 9; Ioa. 6:15) E aki mataaiakina naba te kaubwai ke ni maaka te kakaaitara ae korakora. (Ruka 9:58; Ioa. 8:59) Ngkana e kataaki ara onimaki, ti kona n teimatoa ni kaatuua ara iango ngkana ti ururinga ana reirei ni kairiri te abotoro Bauro. E kaumakiia Kristian bwa a na kakairi n ana katoto Iesu bwa a aonga “n aki kua ao a na aki bwara [nanoia]”!​—Ebera 12:3.

BWAINA TE TAOTAONAKINNANO

8. Tera te taotaonakinnano, ao e aera bwa e a kainnanoaki riki ngkai?

⁸ Te taotaonakinnano bon te konabwai n tataninga ma te rau imwain rikin te bitaki. N aki ongeia bwa ti kariariaa tokin te waaki ae buakaka, ke reken te bwai ae ti tangiria ae ti a maan n tataningaia, ma ti boni kainnnanoa te taotaonakinnano. E kariariaa tokin te iowawa i Iuta te burabeti are Abakuka. (Aba. 1:2) A kantaningaia taan rimwin Iesu bwa e na “rina ni kaoti” te Tautaeka n Uea ao ni kamaiuia mai aan Rom. (Ruka 19:11) Ti kariariaa te bong are e nang kamauna iai te buakaka Ana Tautaeka n Uea te Atua, ao ni karokoa te waaki ae boou i aon te aba ae mena iai te raoiroi. (2Bet. 3:13) Ma ti riai n taotaona nanora ao n tataningaa te tai ae e namatia Iehova. Iangoi aanga tabeua ake e reireinira iai Iehova te taotaonakinnano.

9. Taekini katoto aika kaota raoi ana taotaonakinnano Iehova.

⁹ E katea te katoto ae kororaoi Iehova ni kaineti ma te taotaonakinnano. E angan Noa ana tai ae tau ibukini katean te aake ao kakororaoan tabena ae “te tia uarongorongoa taekan te raoiroi.” (2Bet. 2:5; 1Bet. 3:20) E kakauongo Iehova ngke e okioki Aberaam n titirakinna ibukin ana babaire are e na kamaunaia kaaini kaawa aika buakaka ake Totom ma Komora. (KBwaai 18:20-33) I nanon ririki aika bati, e kaotiota Iehova te taotaonakinnano ae rianako nakon te natannaomata ae Iteraera ae aki kakaonimaki. (Neem. 9:30, 31) Ti nora koauan ana taotaonakinnano Iehova ni boong aikai, ngkai e angania aomata nako aia tai “bwa a na rairi nanoia.” (2Bet. 3:9; Ioa. 6:44; 1Tim. 2:3, 4) Ti kaungaaki n ana katoto Iehova bwa ti riai n taotaon nanora ngkai ti teimatoa n uarongorongo ao n angareirei. E reireinira naba te taotaonakinnano n te kaikonaki teuana ae koreaki n ana Taeka.

10. Ni kaineti ma Iakobo 5:7, 8, tera reireiara man ana katoto te tia ununiki?

¹⁰ Wareka Iakobo 5:7, 8. E reke reireiara ibukin te taotaonakinnano man ana katoto te tia ununiki ae uniki ana koraa. Bon iai aroka tabeua aika waekoa n rikirake. Ma angiin aroka, moarara riki ake iai uaaia, a kainnanoa te tai ae maan ao a a tibwa uaa. A rikirake aroka i Iteraera tao i nanon onoua te namwakaina. E uniki ana koraa te tia ununiki imwin te moani karau n tain te aamwaitoro, ao e taia uaana imwini bwakan te karau are imwina riki n tain te aabue. (Mareko 4:28) Ti bia wanawana ni kakairi n ana taotaonakinnano te tia ununiki. Ma e boni kona ni kangaanga anne.

11. Ti na kangaa ni buokaki n ara mwakuri ni minita mani bwainan te taotaonakinnano?

¹¹ N angiin te tai ao aomata aika aki kororaoi a tangiria bwa a na waekoa n nori mwin aia mwakuri. Ma ngkana ti tangira ara onnaroka bwa e na karikiuaa, ti riai ni katoatai n tabeakinna, ni keniken ao n ununiki iai, ao ni kaitiakia ma n tetebokia. E kainnanoaki naba te taningamarau n te mwakuri ni karekeia taan rimwini Kristo. E kainnanoa te tai ae maan koutakin te kairiribai ao te inanonano mai nanoia naake ti reirei ma ngaiia. Ngkana ti taotaona nanora, ti na buokaki iai bwa e na aki bwara nanora ngkana ti kaaitara ma kangaanga. Ngkana a kukurei n ongora iroura tabeman, ti bon riai naba ni bwaina te taotaonakinnano. Ti aki kona ni kairoroa te aomata ae ti reirei ma ngaia n te Baibara bwa e na rikirake n te onimaki. N tabetai, a iremwe naba taan rimwin Iesu n ota n te baere e reireinia iai. (Ioa. 14:9) Ti bia ururingnga are ti ununiki ao ti teboteboki, ma bon te Atua ae karikirakei.​—1Kor. 3:6.

12. Ti na kangaa ni kaota te taotaonakinnano ngkana ti uarongorongo nakoia ara koraki aika tiaki kaain te onimaki?

¹² Te itera riki teuana ae kona ni kangaanga iai iroura bwainan te taotaonakinnano, bon te uarongorongo nakoia ara koraki aika tiaki kaain te onimaki. Ti kona ni buokaki n te boto n reirei n Te Minita 3:1, 7, ae kangai: “Iai . . . te tai ni kainabwabu ao te tai n taetae.” Ti kona n uarongorongo man aroarora aika raraoi e ngae ngke ti aki taetae, ma ti boni kamatairikira naba nakon taai aika angaraoi ake ti kona iai n tataekina te koaua nakoia. (1Bet. 3:1, 2) Ti taotaona nanora nakoia aomata nako n ikotaki ma kaain ara utu, ngkana ti uarongorongo ao n angareirei nakoia ma te ingaingannano.

13-14. Baikara katoto tabeua ibukin te taotaonakinnano aika ti kona ni kakairi iai?

¹³ Ti kona ni karekea reireiara ibukin te taotaonakinnano man aia katoto naake a kakaonimaki ake a karakinaki n te Baibara, ao aika ni boong aikai naba. E kariariaa Abakuka tokin te buakaka, ma e kaota te taotaonakinnano ngke e taku: “N na teimatoa n tei n au tabo n tantani.” (Aba. 2:1) E kaota nanona te abotoro Bauro bwa e kani “katiaa” ana mwakuri ni minita. Ma e ngae n anne, e teimatoa ni “kakororaoa kaotiotan te rongorongoro ae raoiroi.”​—Mwa. 20:24.

¹⁴ Iangoa aia katoto te taanga teuana are a angabeeba man te Kireata ao a mwiokoaki nakon te aba ae a karako iai taani Kakoaua, ao angiia kaain te aba bon tiaki Kristian. A rangi ni karako aomata aika kan reirei n te Baibara. Ni kaitaraan anne ao raoia n reirei n te Kireata ake a beku n aaba tabeua, a kakarakinia aomata aika bati ake a reirei n te Baibara ma ngaiia ao a rikirake. A taotaon nanoia te taanga aei ao a teimatoa n uarongorongo e ngae ngke a karako aika kan ongora n aia aono. Imwin aia uarongorongo i nanoni wanua te ririki n te aono ae taraa n aki karikiuaa, a a kimwareirei n nora aia reirei n te Baibara temanna bwa e a bwabetitoaki. Tera te bwai ae e titeboo iai te katoto aei ma taai ake rimoa? A aki bwara nanoia te koraki aika kakaonimaki aikai ao a aki naba kamotirawai baia, ao e bon angania kaniwangaia Iehova ibukin aia taotaonakinnano. Ti bia “riki bwa taani kakairi irouia te koraki ake a reke tibwangaia n taiani berita, ibukin aia onimaki ao aia taotaonakinnano.”​—Ebera 6:10-12.

KATEIMATOA KORAKORAN AM ONIMAKI

15. Tera te anga teuana ae kona iai te onimaki ni kamatoaa nanora bwa ti na uarongorongo?

¹⁵ Ti onimakina te rongorongo ae ti tataekinna, ngaia are ti ingainga n tibwaia nakoia aomata aika bati. Ti onimakini berita ake n Ana Taeka te Atua. (TaiAre. 119:42; Ita. 40:8) Ti a tia n nori kakoroani bukin taetae ni burabeti man te Baibara n ara bong aikai. Ti a tia naba n noriia aomata aika bitii maiuia nakon ae tamaroa riki, man te tai are a maiuakin iai ana reirei ni kairiri te Baibara. Mani bwaai ni kakoaua aikai, ti a kakoauaa riki iai ae a bon riai aomata nako n ongora te rongorongo ae raoiroi ae taekan te Tautaeka n Uea.

16. Ni kaineti ma Taian Areru 46:1-3, e kangaa onimakinan Iehova ao Iesu ni kamatoaa nanora bwa ti na uarongorongo?

¹⁶ Ti onimakina naba Iehova are Nibwan ara rongorongo ae ti tataekinna, ao ti onimakina Iesu are e kaueaa n te Tautaeka n Uea. (Ioa. 14:1) N aki ongei baike ti kaaitarai, ma e na bon teimatoa n riki Iehova bwa ara tabo ni kamanomano ao korakorara. (Wareka Taian Areru 46:1-3.) Irarikin anne, ti kakoauaa ae e boni kaira te mwakuri n uarongorongo Iesu mai karawa, rinanoni mwaakana ao nakoana ni kairiri are e anganna Iehova.​—Mat. 28:18-20.

17. Taekina te katoto ae oti iai bwa ti riai n teimatoa n uarongorongo.

¹⁷ Ti buokaki n te onimaki bwa ti na kakoauaa riki ae e na boni kakabwaiai ara kakorakora Iehova, n aanga aika ti aki kantaningai. (TeMin. 11:6) N te katoto, nga ma nga aomata aika nakonako rirarikin ara taibora ma ara kaa ni boki ni katoabong. Ma e uaana te anga n uarongorongo aei? Eng! E taekinaki n Ara Mwakuri ni Minita ae bwain Nobembwa 2014, taekan temanna ataein te kuura ae rietata ae e kani korea rongorongoia Ana Tia Kakoaua Iehova. E aki reke iroun te ataeinnaine aei te Tabo n Taromauri, ma e reke irouna te taibora ni boki n aia tabo n reirei, ao e reke naba te baere e kainnanoia ibukini korean ana rongorongo. Imwina riki, e a riki neiei bwa te tia Kakoaua ae e a tia ni bwabetitoaki ao e a beku ngkai bwa te bwaiania ae katoatai. Ti kaungaaki n rongorongo akanne bwa ti na teimatoa n uarongorongo, bwa e oti raoi iai ae bon iai naba aomata aika kan ongora taekan te Tautaeka n Uea.

KAMATOAA NANOM BWA KO NA AKI KAMOTIRAWAA BAIM

18. Ti kangaa ni kakoauaa bwa e na bon tia te mwakuri n tataekina te Tautaeka n Uea n aron ae tangiria Iehova?

¹⁸ Ti kona ni kakoauaa bwa e na bon toki n taina ae riai te mwakuri n tataekina te Tautaeka n Uea. Iangoa te baere riki n ana bong Noa. E kaotia raoi Iehova bwa boni ngaia te tia Taua Mwin te Tai ae kororaoi. E a kamani bairea te tai are e na roko iai te ieka, tao 120 te ririki imwain anne. Imwin ririki aika bati ao Iehova e a mwiokoa Noa bwa e na kabaa te aake. Tao i nanon 40 ke 50 te ririki imwain rokon te Ieka ao e teimatoa ni mwakuri korakora Noa. E ngae ngke a aki kan ongora aomata, ma e teimatoa n tataekina te rongorongo ni kauringia aomata, ni karokoa te tai are e a tuangnga iai Iehova bwa e na karinia maan n te aake. Ao n te tai ae baireaki, “e a kaina te mataroa Iehova.”​—KBwaai 6:3; 7:1, 2, 16.

19. Tera ae ti kona n ingainga ni kariariaa ngkana ti aki kamotirawaa baira?

¹⁹ E a kaan te tai are e nang katoka iai Iehova te mwakuri n tataekina rongorongon te Tautaeka n Uea. E na kamauna ana waaki Tatan ae ngkai ao ni karokoa te waaki ae boou i aon te aba. Mangkai ni karokoa te tai anne, ti bia katotonga Noa, Abakuka, ao tabeman riki, ake a aki kamotirawaa baia. Ti bia kaatuua ara iango n ara mwakuri n uarongorongo, ti na bwaina te taotaonakinnano, ao ni kateimatoa korakoran onimakinan Iehova ma ana berita nako.