Ara Bwaoki ni Mwakuri Ibukin te Angareirei
1. A kangaa Kristian aika taan tataekina te rongorongo ae raoiroi ni katotongia taani karaobwai aika mwaatai?
1 A kabonganai aekan nako bwaai ni mwakuri taani karaobwai aika mwaatai. E ngae ngke a kabonganaaki n taai tabetai bwaai ni mwakuri tabeua ibukini mwakuri aika onoti, ma iai tabeua aika a taneiai ni kakabonganaaki. A riai taani karaobwai aika mwaatai ni kaaki baikai i nanon aia bwaoki ni mwakuri n taai nako, ao aikai ake a rangi ni mwaatai ni kabonganai. E kaungaaki temanna ma temanna te Kristian n te Baibara bwa e na karaoa ae aron aei n te mwakuri ni minita, ao e na riki bwa ‘te tia mwakuri ae akea kamaamaeana n te bwai teuana.’ (2 Tim. 2:15) Tera te bwai ni mwakuri ae te kabanea ni kakawaki n ara bwaoki ni mwakuri? Bon Ana Taeka te Atua ae moanibwai kabonganaana iroura ibukin ‘reiakinaia aomata bwa a na riki bwa taan rimwini Kristo.’ (Mat. 28:19, 20) Mangaia are, ti riai ni kakorakoraira n riki bwa taani mwakuri aika mwaatai ni “kabwarabwaraa taekan te koaua n te aro ae eti.” Ma, iai riki bwaai ni mwakuri tabeua n ara bwaoki ni mwakuri ibukin te angareirei ake a okioki kabonganaaia, are a riai Kristian n reireinia iai bwa a na mwaatai n reiakinia iai aomata te koaua.—TaeRab. 22:29.
2. Baikara ara bwai n angareirei aika kakawaki?
2 Ara Bwai n Angareirei Aika Kakawaki: Baikara riki bwaai ni mwakuri ake ti riai ni kabonganai irarikin te Baibara? Te moani bwai ni mwakuri ibukin reiakinani koaua man te Baibara, bon te boki ae Tera Ana Reirei ni Koaua Te Baibara? Imwini banen te reirei ma temanna n te boki aei, ti na kabongana “Kawakiningkami n te Aro ae Kam na Teimatoa n Tangiraki Iai Iroun te Atua” n reireinna iai bwa e na maiuakini booto n reirei man te Baibara. Ngaia are, ti riai ni mwaatai ni kabonganai booki aikai. A riai naba ni mena boroutia aika katauaki n ara bwaoki ni mwakuri ibukin te angareirei. Te Rongorongo ae Raoiroi Mairoun te Atua! bon teuana mai buakon ara bwai ni mwakuri ae kakawaki ibukini moanakin taian reirei n te Baibara. Ngkana iai n ara aono aomata aika a aki rangi ni bwaati ni wareware, ke naake a kabongana te taetae ni booki ake iai iroura aika tii tabeua ke bon akea, ngkanne ti kona naba ni kabongana Ongeaba Iroun te Atua ke Ongeaba Iroun te Atua ao Ko na Maiu n Aki Toki. Te bwai n angareirei teuana ae kakawaki ibukini kairaia ake a reirei n te Baibara nakon ana botaki te Atua, bon te boroutia ae Antai Aika A Kakaraoa Nanon Iehova ni Boong Aikai? Iai viteo ake a ibuobuoki ni karekeaia taan rimwini Kristo, n aron ae E Aera Ngkai E Raoiroi te Reirei n te Baibara?, E Kangaa Aroni Kairan te Reirei n te Baibara? ao Does God Have a Name?, aika bwaai ni mwakuri ake ti riai naba n reireinira ni kabonganai.
3. Tera ae ti na buokaki bwa ti na karaoia ni kaongora aika imwina n Ara Mwakuri ni Minita?
3 Ti kona ni buokaki ni kaongora aika imwina n Ara Mwakuri ni Minita, bwa ti na mwaatai ni kamanenai booki tabeua aika kakawaki n ara bwaoki ni mwakuri ibukin te angareirei. Ngkai ti kakorakoraira ni kamwaataira ni kabonganai bwaai ni mwakuri aikai, ti a ongeaba n ana reirei ni kairiri te Atua aei: “Teimatoa n tarataraa raoi arom ao aron am angareirei. Teimatoa ni baikai, bwa ngkana ko karaoa aei, ko kamaiuko iai ma ake a ongo iroum.”—1 Tim. 4:16.