Kateimatoa Reiakinaia Aomata Bwa A na Riki Bwa Taan Rimwini Kristo
1. Tera ae kainnanoaki bwa a aonga ni kamaiuaki aomata?
1 E oti n te ribooti imwin te mwakuri n te ririki 2014, ingaingaia ana aomata te Atua ao nanomwaakaia n tataekina te rongorongo ae raoiroi ibukin te Tautaeka n Uea. (Mat. 24:14) A bati riki aika ti roko irouia ma rongorongon te Baibara nakon are mai imwaina, rinanon te mwakuri n auti teuana ma teuana, mwakuri aika okoro ibukini kabutan turaeki ma beeba ni kakao, ao aanga n uarongorongo n ana tabo te botannaomata. Mangaia are, ngkana a na kamaiuaki aomata, ti riai ni buokiia bwa a na riki bwa taan rimwin Iesu, man reiakinan te Baibara ma ngaiia.—1 Tim. 2:4.
2. Baikara titiraki aika ti na titirakinira iai, ake a na buokira n tauraoi n taai nako ni kaira te reirei n te Baibara?
2 Tauraoi n Taai Nako ni Kaira te Reirei n te Baibara: Ngkana e kaota te kan ongora te aomata, ko kakorakorako ni karekea ana atureti ao n okiria n te tai are e tangiria ni uaakina te reirei n te Baibara? N ningai am kabanea n tai are ko kataia ni kaira te reirei n te Baibara ni moan rokom? N ningai am kabanea n tai ni moana te reirei n te Baibara ma naake ko ninikiri aia maekatin? Ko a tia ni kaotii birim aika E Aera Ngkai E Raoiroi te Reirei n te Baibara? ao E Kangaa Aroni Kairan te Reirei n te Baibara? nakoia raom ni mwakuri, raom n reirei, kaain rarikim, am koraki ao tabeman riki? Ngkana ko kabongana te taibora ae a katokaaki iai booki ma maekatin, ko kakorakorako n tuangia naake a anaa te boki, ae e kona ni karaoaki te reirei iai n te Baibara n akea boona?
3. Tera ae kainnanoaki bwa e aonga n uaana iai reiakinan te koaua?
3 Te Ibuobuoki Mairoun Iehova ao Iesu: Ngke e moana taekinan ana tua Iesu ma te taeka ae “naako,” ibukin ‘reiakinaia aomata bwa a na riki bwa taan rimwina,’ e a katerea iai bwa ti riai ni kakorakoraira ao ni kaotiota te biririmoa. E ngae n anne, e aki katikuira i bon iroura ma e berita bwa e na memena iroura. (Mat. 28:19, 20) Irarikin anne, e anganira Iehova taamneina ae raoiroi, bwaai ni mwakuri ao te reirei ni kataneiai are ti kainnanoia ibukin reiakinaia aomata taekan te koaua. (Tek. 4:6; 2 Kor. 4:7) Ti kona n tataro ibukin ‘nanora ma ara mwakuri’ ni boutokaa te mwakuri ae kakawaki aei.—IBir. 2:13.
4. E aera bwa ti na kateimatoa reiakinaia aomata bwa a na riki bwa taan rimwini Kristo?
4 E karikirakea riki kukureira tataekinan te rongorongo ae raoiroi. Ma, e rikirake kimwareireira ngkana ti reiakina temanna taekan te koaua, ao ni buokia bwa e na raonira n toua “te kawai ae tiki nakon te maiu.” (Mat. 7:14; 1 Tet. 2:19, 20) Ae kakawaki riki, ngkana ti kateimatoa reiakinaia aomata bwa a na riki bwa taan rimwini Kristo, ti a kakukureia iai Iehova are “e aki tangira kamaunaan temanna ma e tangiriia aomata nako bwa a na rairi nanoia.”—2 Bet. 3:9.