Kamatairikiko ni Karekei Reirei n te Baibara
1. Tera ae irekereke ma kakoroani bukin te mwioko are e tua Iesu ni Mataio 28:19, 20?
1 E anganira te mwioko Iesu bwa ti na “reireinia aomata. . . , ao ni bwabetitoia.” (Mat. 28:19, 20) Ngaia are ti tangiria ni kamatairikira ni karekei reirei n te Baibara n taai nako, tiaki tii teuana te tai n te wikeen are ti a tia ni kaokoroa ibukini kairan te reirei n te Baibara iai. A kona n rangi n ibuobuoki reirei aika imwina.
2. Antai aika ti kona ni kaongoia te babaire ibukin te reirei ma ngaiia n te Baibara?
2 Kaoia Aomata Bwa A na Reirei n te Baibara: Ngkana ti kabatiaa riki ara tai ni kaoia aomata bwa a na reirei n te Baibara ma ngaira, ti a kona ni karekea iai ara reirei n te Baibara ma temanna. (TeMin. 11:6) Ko a tia ni kataa te anga aei? E kakorakora te kurubu n te ekaretia teuana n te United States ni karaoa aei i nanon te namwakaina teuana. Ai kimwareireira ngaiia ngke a a moani kairan reirei n te Baibara aika boou aika 42 mwaitiia! Tai iangoia bwa te koraki aika a kaota te kan ongora ake ko kawariia a ataia ae ko kukurei n reirei n te Baibara ma ngaiia. E aera bwa ko aki kaongoa te aomata anne n okim bwa ko kona n reirei ma ngaia? Ngkana a aki butimwaeia, akea te kangaanga iai. Ko kona n reitaanako karikirakean te kan ongora. Ko a tia n titirakinia kaain rarikim, am utu, raom ni mwakuri ao raom n reirei bwa a tangiria ni kan reirei n te Baibara ma ngkoe? Ko kona naba n titirakinia aomata ake ko reirei ma ngaiia n te Baibara bwa iai raoraoia ke aia utu aika kan reirei n te Baibara.
3. Tera te bwai n ibuobuoki ae kakawaki ibukini moanakin te reirei n te Baibara ae iai iroura, ao n ningai ae ti kona ni kabongana iai?
3 Te Bwai n Ibuobuoki ae Kakawaki: Te bwai n ibuobuoki ae kakawaki ibukini moanakini kairan reirei n te Baibara bon te turaki ae Ko Kan Ataa te Koaua? Ko kona n angania kaain te auti e ngae ngkana a butimwaei booki tabeua ke a aki. E kona ni kamanenaaki ngkana ko mwakuri n taabo ni bitineti, ngkana ko uarongorongo i rarikin te kawai, te kororeta ao ni manga okiraia aomata. Tao e kona naba ni katukaki n auti ake a nakonako kaaia. E aera bwa ko aki uouotia i aoni baao ni mwamwananga, ngkana ko boobwai ao n am tai ni mwakuri? E kabwarabwaraaki ni kakimototoaki ni bukini baana aroni baireani karaoan ara angareirei n te Baibara ao e kaota te boki ae Ana Reirei te Baibara.
4. Ti na kanga ni kabongana te turaeki ae Ko Kan Ataa te Koaua ibukini moanakin te reirei n te Baibara?
4 Imwin anganakin te aomata te turaeki, ko kona ni kotei titiraki ake ni moanibaan te turaeki ao titirakinna bwa, “E nga mai buakon titiraki aikai ae ko rangi n tangiria n ongora iai?” Ngkanne uaia n rinanon te kaeka man te turaeki ao wareka ke taekina te iteraniba are mai buki n oin am taeka ae e kabwarabwaraaki iai bairean ara reirei n te Baibara. Ko kona ni kaota nakoina te tabo are e na reke riki iai rongorongon te reirei anne n te boki ae Ana Reirei te Baibara, anganna te boki ao bairea manga okirana ao reitaanako te maroro.
5. E aera ngkai ti riai ni kamatairikira ni karekei reirei n te Baibara?
5 Bon iai naba aomata n ara aono ake a teimatoa n ingainga ni kan reiakina ana reirei ni koaua te Baibara. Ti na buokaki ni karikirakea namakinan te kimwareirei ni buokaia aomata bwa a na toua te kawai nakon te maiu, ngkana ti kamatairikira ni karekei reirei n te Baibara.—Mat. 7:13, 14.