Kananoan te Iango ao te Tataro—E Riai Ibukia Minita Aika A Ingainga Nanoia
1. Tera ae e buoka Iesu n totokoa katabetabeana mani karaoan ana mwakuri ae kakawaki riki?
1 E kabanea te moan tairiki Iesu ni kamaiuia iai aoraki ao ni kaotinakoia taimonio. Ngke a a noria n te bong are imwina ana abotoro, ao a taku: “A bane n ukoukoriko aomata.” A taekina aei ni kaumaka Iesu bwa e na reitaanako ana mwakuri ni kakai. Ma e ngae n anne, e na aki katabetabeaki Iesu man ana mwakuri ae kakawaki ae tataekinan te rongorongo ae raoiroi. E kaeka ni kangai: “Ti a nako nakon taabo tabeua riki, nakoni kaawa aika uakaan, bwa I aonga n uarongorongo naba iai, bwa ngaia aei bukin nakomaiu.” Tera ae e buoka Iesu ni kateimatoa kaatuuan ana iango n ana mwakuri? E a kaman uti n tataro n te karangaina ao ni kananoa ana iango. (Mareko 1:32-39) E na kanga kananoan te iango ao te tataro ni kona ni buokira naba n riki bwa taan uarongorongo aika ingainga nanoia?
2. Tera ae ti na kona ni kananoa ara iango i aona bwa e na buokira ni kateimatoa ingaingan nanora ibukin te mwakuri ni minita?
2 Kananoan te Iango i Aon Tera? E noriia aomata Iesu bwa a “karawawataaki ma ni kananoanga, ao a kamaenakoaki n aroia tiibu aika akea te tia kawakinia.” (Mat. 9:36) N aron naba anne, ti kona ni kananoa ara iango i aoni korakoran kainnanoan te rongorongo ae raoiroi irouia aomata. Ke ti kona n iangoa kakawakin taai aika ti a maeka i nanona ngkai bwa e a kaan te toki. (1Kor. 7:29) Ti kona n iaiangoa ana mwakuri Iehova ao raoiroina, ao kakabwaiaakira ngkai ti a riki bwa Ana Tia Kakoaua Iehova, ao reireiara ae kakawaki ni kaineti ma te onimaki man Ana Taeka te Atua ae a teimatoa n aki ataia aomata aika n ara aono.—TaiAre. 77:11-13; Ita. 43:10-12; Mat. 13:52.
3. Tao n ningai te tai ae ti na kananoa iai ara iango?
3 N Ningai ae Ti Kona ni Karekea Iai Ara Tai ni Kananoa Ara Iango? A utimwaaka tabeman n te karangaina are akea iai te karongoa n aron are e karaoia Iesu. A kunea tabemwaang bwa moan te raoiroi kananoan te iango n te tairiki imwaini matuia. (KBwaai 24:63) E ngae ngkana ti tabetabe, ma ti kona ni karekea ara tai ibukini kananoan ara iango. A karaoa anne tabeman ngkana a toka ni bao ni mwamwananga ibukia te botannaomata. Tabeman a kabongana iteran aia tai ni katawanou n taabo aika rau ibukini kananoan aia iango. A mwaiti aika kunea bwa kananoan aia iango imwaini karaoan aia mwakuri ni minita e ngae ngke tii tabeua te miniti, e buokiia bwa a na uarongorongo ma te ingaingannano ao te ninikoria.
4. Bukin tera bwa ti riai ni kananoa ara iango?
4 E na karikirakea i nanora te kani beku ibukin Iehova kananoan te iango ao te tataro. E na buokira bwa ti na iaiangoia bwa ara taromauri bon te bwai ae rangi ni kakawaki ni maiura, ao ni motinnanoia bwa ti na kateimatoa ara uarongorongo. E kakabwaiaaki Iesu ae ana Minita te Atua ae Moan te Kakawaki mani kananoan ana iango, ao ti na kakabwaiaaki naba.