MAIURA NI KRISTIAN
Karekea Kimwareireim n Tataekinan te Rongorongo ae Raoiroi
E a tia n reke ae e a kangaanga iroum te uarongorongo? A bati aika aia kaeka iai eng. Bukin tera? Tao ibukina bwa ti katoatai n aitara ma te aki bwerengaki ke te kairiribai n ara aono, ke ti maaku ni maroro ma aika ti aki kinaia. A boni kona baikai ni kakerikaaka kimwareireira. E ngae n anne, ti taromauria te Atua ae kukukurei ao e tangiria bwa ti na beku irouna ma te kimwareirei. (TA 100:2; 1Ti 1:11) Baikara bukina aika raoiroi aika tenua ake ti kona iai ni kimwareirei n te uarongorongo?
Te moan, ti uarongorongoa taekan te kantaninga. E ngae ngke e a tabe ni bua aia kantaninga aomata n taai aikai, ma ti kona ni kaon nanoia n te “rongorongo ae raoiroi ae taekan te bwai ae raoiroi riki.” (It 52:7) Ma e kona te rongorongo ae raoiroi ae taekan Ana Tautaeka n Uea te Atua ni karikirakea naba kimwareireira. Imwain am uarongorongo, kananoa am iango ni kakabwaia ake e na uotii Ana Tautaeka n Uea te Atua nakon te aonnaba.
Te kauoua, a kakabwaiaaki naba aomata n te aro n rabwata ao n taamnei man te rongorongo ae raoiroi. A a rabakau n aki karaoi mwakuri aika karuanikai ao ni karekea kantaningaan te maiu ae aki toki. (It 48:17, 18; Ro 1:16) Ti kona n iangoira bwa ti karaoa te mwakuri ni kakaae ao ni kakamaiu n tain te kabuanibwai. E ngae ngke iai tabeman aika aki kani kamaiuaki, ma ti teimatoa n ukeriia ake a kani kamaiuaki.—Mt 10:11-14.
Te katenua ae te kabanea ni kakawaki, e karineaki Iehova n ara uarongorongo. E kakawaki irouna ara mwakuri n uarongorongo. (It 43:10; Ebr 6:10) Irarikin anne, e tituaraoi n anganira taamneina ae raoiroi ibukini kakororaoan te mwakuri aei. Ngaia are butiia Iehova te kimwareirei, ae uaan naba te taamnei ae raoiroi. (Kar 5:22) Ti kona n tokanikai i aon raraomara n ana ibuobuoki ao n uarongorongo ma te ninikoria. (Mwa 4:31) N aki ongei aia kaeka kaain ara aono, ti na boni karekea kimwareireira n ara mwakuri n uarongorongo.—Etk 3:3.
Tera te aroaro ae ko kani karekea n te mwakuri ni minita? Ko na kangaa ni kaotiota te kimwareirei?
MATAKU N TE TAAMNEI AE KAOKA KIMWAREIREIM RINANON TE UKEUKE N REIREI AO KANANOAN AM IANGO, AO KAEKAI TITIRAKI AIKAI:
E aera bwa ti riai ni moanibwaia anuara ae te ukeuke n reirei, e ngae ngkana ti kabanei aoa aika bati n uarongorongo ni katoa namwakaina?
N te aro raa ae ti riai ni katotonga iai Mary?
N ningai am tai ni kananoa am iango n Ana Taeka te Atua?
Tera ae e karekea kimwareireim ngkana ko uarongorongo?