Karikirakean te Kakaitau Ibukin Aroaron Iehova Aika Rianako
1 N ara mwakuri ni minita ao a mwaiti bwaai aika ti reireinia iai aomata irarikini moan reirei man te Baibara. Ti buokiia aomata bwa a na kinaa Iehova bwa kaanga bon te aomata ao ni kaboraoi maiuia ma aroarona aika rianako. Ngkana a reiakina te koaua ibukin te Atua aomata aika raoiroi nanoia, a kona ni kairaki bwa a na bitii maiuia bwa a aonga “n nakonako n te aro ae tau i matan Iehova ni karekea iai kakukureiana.”—IKoro. 1:9, 10; 3:9, 10.
2 Ara Boki n Reirei: E kairira moan rongorongon te boki ae Ana Reirei te Baibara bwa ti na ataa aroaron Iehova. E kaekai titiraki aikai moani mwakoron te boki aei: Te koaua bwa e mumutiakiniko te Atua?, Tera aroarona? ao E kona n rangi ni kaan te reitaki ma te Atua? E katuruturuaki n te mwakoro aei tabun Iehova (bar. 10), ana kaeti-taeka ao ana nanoanga (bar. 11), ana tangira (bar. 13), mwaakana (bar. 16), ana atataiaomata, ana akoi, nanona ni kani kabwarai buure, ana taotaonakinnano, ao ana kakaonimaki (bar. 19). E kamataata barakirabe 20 ni kangai: “Kabatiaan reiakinan taekan Iehova, ai boni kakorakoraan naba kinaakina iroum, ao ikanne are e kona n ririkirake naba tangirana ao namakinan ae ko rangi ni kaan ma ngaia.”
3 Ti na kanga ni kabongana te boki ae Ana Reirei te Baibara ni buokiia aomata ake ti reirei ma ngaiia bwa a na kaania riki Iehova? Imwin iangoan te barakirabe are ti reirei iai taekan aroaron te Atua teuana, ti kona n titirakina te aomata ni kangai: “Tera aroaron Iehova ae kaotaki ikai?” ke “E kanga ni kaotaki ikai bwa e bon tabeakiniko te Atua?” Ngkana ti kabonganai aeka n titiraki aikai n taai tabetai rinanon te reirei, ti reireinia iai aomata bwa a na kananoi aia iango i aoni bwaai ake a reiakin ao ni buokiia bwa a na karikirakea te kakaitau ibukin aroaron Iehova aika rianako.
4 Kabongana te Bwaoki ni Kauring: N tokini mwakoro nako, ao tuanga te aomata ae reirei bwa e na anga oin ana taeka ni kaineti ma baika mena i nanon te bwaoki ae “Ana Reirei te Baibara.” Kaatuui riki kiibu aika a kaotaki. Kaungaa te aomata ae reirei bwa e na kaota nanona rinanon tabekan te titiraki ae “Tera am iango ibukin ana reirei te Baibara i aon te reirei aei?” Ni karaoan anne, ko aki tii kaatuui booto n iango mani mwakoron te boki anne ma ko karekea naba am atatai i aon ana koaua te aomata are ko reirei ma ngaia. E na buoka naba te aomata are ko reirei ma ngaia bwa e na karikirakea ana iraorao ma Iehova.