Te Koaua Ibukin Taai Aika Imwaira
Ko a tia n iaiangoi kanoan taai aika imwaira? A kaotaki n te Baibara baika kakawaki ake a nang waekoa n riki aika a na rotaki iai aomata nako n te aonnaba aei.
E kabwarabwaraa Iesu te bae ti na “ataia iai bwa e a kaan ana Tautaeka n Uea te Atua.” (Ruka 21:31) E taetae ni burabetina ae a na riki naba buaka aika korakora, mwaeiein te aba aika kokorakora, roongo, ao aoraki aika kamamate, ae baika ti a bon nori ngkai.—Ruka 21:10-17.
E kaotia naba te Baibara bwa e na kanikinaeaki ‘kabaneani bongin’ aia tautaeka aomata, n rikirakeni buakakan aroaroia aomata. Ko kona ni wareka taekana n 2 Timoteo 3:1-5. Ngkana ko a nori aroaro ma mwakuri aikai ni boong aikai, ko na boni bae ni kakoauaa ae e boraoi te taetae ni burabeti man te Baibara aei ma baika a riki ngkai.
Tera nanon aei? E a kaan te tai are e nang karaoi iai bitaki aika korakora Ana Tautaeka n Uea te Atua ibukini kanakoraoan te maiu n te aonnaba. (Ruka 21:36) E beritani baika raraoi te Atua n te Baibara ibukin te aonnaba ao ibukia aomata ake a na maeka iai. Nori katoto tabeua aikai.
TE MWAAKA N TAUTAEKA AE RAOIROI
“Ao e anganaki teuaei [taekan Iesu] te mwaaka n tautaeka, te karineaki, ao te tautaeka n uea, bwa a aonga ni beku irouna botannaomata, natannaomata, ao taian taetae. Mwaakana n tautaeka bon te mwaaka n tautaeka ae akea tokina ae e na aki nako, ao e na bon aki kamaunaaki ana tautaeka n uea.”—TANIERA 7:14.
Ae nanonaki iai: Ko kona ni kukurei ni maiu i aan te tautaeka ae e na kairiri n te aonnaba ni kabutaa, are e kateia te Atua are e na Uea iai Natina.
TE MARURUNG AE NAKORAOI
“Akea te tia maeka iai ae e na kangai: ‘I aoraki.’”—ITAIA 33:24.
Ae nanonaki iai: Ko nang aki aoraki ke ni mwauku, ao ko nang maiu nako naba n aki nora te mate.
TE RAU AE AKEA TOKINA
“E katoki buaka ni kabutaa te aonnaba.”—TAIAN ARERU 46:9.
Ae nanonaki iai: Ai akea manga kakamaakun te buaka ao rawawata nako man te buaka.
E NA ON TE AONNABA IROUIA AOMATA AIKA RAOIROI
“A nang akea aomata aika buakaka . . . A na abana te aonnaba akana nimamannei.”—TAIAN ARERU 37:10, 11.
Ae nanonaki iai: A nang akea aomata aika buakaka, ma ai tii aomata aika kan ongeaba iroun te Atua.
E NANG RIKI TE AONNABA NI KABUTAA BWA TE BWARETAITI
“A na katei auti ao a na maeka i nanoia, ao a na uniki kureebe ni nne ni kureebe ao ni kang uaaia.”—ITAIA 65:21, 22.
Ae nanonaki iai: E nang katamaroaaki te aonnaba. E nang kakororaoi ara tataro te Atua, ni kaineti ma kakororaoan nanona “n te aonnaba.”—Mataio 6:10.