Urui Iango n Rarabakau Aika Kauntabaa te Atatai Ibukin te Atua!

1. Tera te kauring are e koreia te abotoro Bauro nakoia Kristian aika kabiraki?

E ANGA te kauring aei te abotoro Bauro: “Katoka.” Tera ae e na katokaki? “Katoka katotongan aron te waaki ae ngkai i aon te aba.” (IRom 12:2) E korei taeka akanne Bauro nakoia Kristian ake n te moan tienture. E aera bwa e anga te kauring ae matoatoa aei nakoia mwaane ao aine ake a a tia ni katabui maiuia nakon te Atua ao ni kabiraki n te taamnei ae raoiroi?​—IRom 1:7.

2-3. E na kangaa Tatan ni katannakoira mairoun Iehova, ao ti na kangaa ni kanakoi baika “nene wakaaia” n ara iango?

² E tabeaianga Bauro ibukina bwa iai tabeman Kristian aika kairaki n iango n rarabakau ao karioiango aika aki raraoi, aika karikirakeaki n ana aonnaba Tatan. (IEbe. 4:​17-19) E kona naba n riki aei nakoira. Ibukin nanon Tatan ae atuan te waaki ae ngkai ni kani katannakoira mairoun Iehova, e a kabonganai aanga aika kakaokoro. Teuana mai iai bon arona ni kabongana tangiran te kani kakannato ke te kani kamoamoaaki ni mwamwanaira iai. E kona naba ni kabonganai baike ti a tia n rinanoi ni maiura, ara katei, ke ara reirei, bwa ti aonga n iango n aron are e tangiria.

³ Ti kona ni kanakoi baika “nene wakaaia” n ara iango? (2Kor. 10:4) Nora ana taeka Bauro iai: “Ti urui iango n rarabakau ma aaro ni kainikatonga nako ake a kauntabaa te atatai ibukin te Atua, ao ti kataenikai iango ni kabane bwa a na ongeaba iroun te Kristo.” (2Kor. 10:5) Eng, man ana ibuobuoki Iehova, ti kona ni kanakoi iango n rarabakau aika aki raraoi. N aron te bwainnaoraki ae kona ni kanakoa mwin te boitin, e kona naba Ana Taeka te Atua ni buokira ni kanakoi mwin nako ana boitin ana aonnaba Tatan.

“KABOOUI AMI IANGO”

4. Baikara bitaki ake ti karaoi ngke ti moani butimwaea te koaua?

⁴ Iangoi bitaki ake ko karaoi ngke ko moani butimwaea te koaua man Ana Taeka te Atua ao ko motinnanoia bwa ko na beku iroun Iehova. Ibukini karaoan aei, a bati i buakora ake a kitan aroaroia aika buakaka. (1Kor. 6:​9-11) Ai kakaitaura ngaira n ana ibuobuoki Iehova bwa ti a kona ni kitan aroaro aika buakaka aikai!

5. Baikara baika uoua aika ti riai ni karaoi aika taekinaki n I-Rom 12:2?

⁵ Ma ti aki riai n iangoia bwa ti nang aki manga karaoi riki bitaki. E ngae ngke ti a tia ni katoki karaoani buure aika kakaiaki imwaini bwabetitoara, ma ti riai ni kakorakoraira n rawa nakon te bwai ae ti kona ni kaririaki iai bwa ti na manga okiri arora rimoa. Ti na kangaa ni karaoa anne? E taku Bauro: “Katoka katotongan aron te waaki ae ngkai i aon te aba, ma kam na onikaki n aromi ni kabooui ami iango.” (IRom 12:2) Ngaia are ti riai ni karaoi baika uoua. Te moan, ti riai ni “katoka katotongan” te aonnaba aei ke kairakira iai. Te kauoua, ti riai n “onikaki” n arora ni kabooui ara iango.

6. Tera reireiara n ana taeka Iesu ake ni Mataio 12:​43-45?

⁶ E bati riki ae nanonaki n te baere e taekinna Bauro nakon tii bitakin taraakira. E rotii arora ni kabane. (Nora te bwaoki ae “Te Onikaki ni Koaua ke te Mwamwanaa te Aba?”) Ti riai ni bitii raoi ara iango ae taekan nanora, ara namakin, ao baike ti tatangiri. Ngaia are ti riai n titirakinira ni kangai: ‘Bitaki aika I karaoi bwa I aonga n riki bwa te Kristian, I karaoi tii ibukini kan taraakiu ke e nako raoi mai nanou?’ E riai n otara te kaokoro iai. N ana taeka Iesu ake ni Mataio 12:​43-45, e taekina te bwai ae riai ni karaoaki. (Warekia.) E reke te reirei ae kakawaki n taeka akanne: E aki tau tii kanakoan iango aika aki raraoi, ma ti riai naba ni kaon ara iango n ana iango te Atua.

“KABOOUI NANOMI AE NGAIA AE KAIRA AMI IANGO”

7. Ti na kangaa ni bita nanora ao ara iango?

⁷ Ti kona ni bitii baika kairi ara iango ke nanora aika raba? E kangai Ana Taeka te Atua: “Kam riai n teimatoa ni kabooui nanomi ae ngaia ae kaira ami iango, ao kam riai ni karina te aroaro ae boou ae karaoaki ni kaineti ma nanon te Atua ao e boraoi ma te itiaki ni koaua ao te kakaonimaki ni koaua.” (IEbe. 4:​23, 24) Eng, ti boni kona ni karaoa te bitaki nakon nanora ae raba, ma e aki bebete karaoana. E bati riki ae ti riai ni karaoia nakon tii te rarawa nakon tangirani baika aki raraoi ao katokani mwakuri aika bubuaka. Ti riai ni bita ‘nanora ae ngaia ae kaira ara iango.’ E irekereke aei ma bitakini baika ti tatangiri, anuara, ao bukini karaoani bwaai iroura. E kainnanoaki te kakorakora ae teimatoa.

8-9. E kangaa rongorongon te tari te mwaane temanna ni kamataataa riaini karaoan te bitaki nakon nanora ae raba?

⁸ Ti na iangoa ana katoto temanna te tari ae rangi n iowawa ngkoa. Ngke e a tia ni katoka te moi manging ao te unun, e a katauaki nakon te bwabetito. Bon te bwai ni kaotioti ae tamaroa aei nakoia kaain ana kaawa. Ma n te tairiki teuana tabeua te tai imwini bwabetitoana, e a kaaitara ma kataakina ae e aki kantaningaia. E roko n ana auti te mwaane ae manging ao e kakaotinakoa. E taotaona nanona n te moantai te tari aei. Ma ngke e a taekina aran Iehova n te aro ae aki riai teuare manging, e a aki kona n taona nanona ao e a otinakoia naba ni batiboia. Tera raoi te kangaanga? E ngae ngke e a tia te tari aei ni buokaki n ana reirei n te Baibara bwa e na taobaraa unna, ma e tuai ni bita nanona ae ngaia are kaira ana iango. N taekana teuana, e tuai ni bita raoi nanona ae raba.

⁹ Ma e ngae n anne, e aki kabwaraa nanona te tari aei. (TaeRab. 24:16) E teimatoa ni karaoi bitaki ao n ririkirake man aia ibuobuoki unimwaane. N tokin te tai, e a tau n riki bwa te unimwaane. N te tairiki teuana i tinanikun te Tabo n Taromauri, e a manga aitara naba ma te kangaanga are e a tia n rinanona n ririki ake mai mwaina. Iai temanna te manging ae e nang orea temanna unimwaanen te ekaretia. Tera ae e karaoia te tari aei? E maroro ma te bwanaa n akoi ao te nanorinano nakon te manging arei, e karaua nanona ao e buokia ni kairia nakon ana auti. Tera ae riki? E a tia te tari aei ni bita nanona are ngaia ae kaira ana iango. E a riki bwa te aomata ae rangi n rau ao n nanorinano, ao e neboaki iai Iehova!

10. Tera ae kainnanoaki ibukini karaoani bitaki nakon nanora ae raba?

¹⁰ A aki kona n riki bitaki aikai n te tai ae tawe ke n akea te kakorakora. Ti riai ni kabanei ‘korakorara’ ni karaoi bitaki i nanon ririki aika bati. (2Bet. 1:5) Tiaki nanona bwa ngkana ti a maan ni beku ibukin Iehova ao ti a kona ni bitaki. Ti riai ni kabanea ara konaa ni karaoa te bitaki nakon nanora ae raba. A bati aanga aika kona ni buokira ni karaoa aei. Ti na neneri tabeua mai iai.

ARORA NI BITA NANORA AE NGAIA AE KAIRA ARA IANGO

11. E kangaa te tataro ni buokira bwa ti na karaoa te bitaki nakon nanora ae ngaia ae kaira ara iango?

¹¹ Te tataro bon te moani mwaneka ae kakawaki. Ti riai n tataro n aron te tia areru are kangai: “Karika i nanou te nano ae itiaki, ngkoe ae te Atua, ao karina i nanou te iango ae boou, ae teimatoa.” (TaiAre. 51:10) Ti riai ni butimwaea ae ti kainnanoa bitakin nanora ae ngaia ae kaira ara iango ao ni butiia Iehova ana ibuobuoki. Ti na kangaa ni kakoauaa bwa e na boni buokira Iehova? Ti kona ni kaungaaki n ana berita Iehova ibukia tibun Iteraera aika matoatoa nanoia ake n ana tai Etekia, ae kangai: “N na angania te nanoteuana, ao N na karina i nanoia te iango ae boou, . . . ao n angania te nano ae maraurau [ae taekan ae e kai butimwaea ana kairiri te Atua].” (Etek. 11:19; kbn.) E kukurei Iehova ni buokiia tibun Iteraera akanne bwa a na karaoi bitaki, ao e kukurei naba ni buokira.

12-13. (a) Ni kaineti ma Taian Areru 119:​59, tera ae ti riai ni kananoa ara iango iai? (b) Baikara titiraki aika ko riai n titirakiniko iai?

¹² Kananoan te iango bon te kauoua ni mwaneka ae kakawaki. Ngkana ti karaurau ni wareka Ana Taeka te Atua ni katoabong, ti riai ni karekea ara tai ni kananoa ara iango iai ke ni kaatuua iangoana bwa ti aonga n atai ara iango ao ara namakin ake ti riai ni bitii. (Wareka Taian Areru 119:59; Ebera 4:12; Iak. 1:25) Ti riai n atai ara iango ao ara namakin ake a kairaki n aia iango kaain te aonnaba. Ti riai ni butimwaea ae iai kabwakara ao ti na kakorakoraira ni kanakoi.

¹³ N te katoto, titirakiniko ni kangai: ‘Iai irou tamrurun nako te nanonibwi ke te bakantang?’ (1Bet. 2:1) ‘Iai irou te kamoamoa ibukin abau, au reirei, ke kaubwaiu?’ (TaeRab. 16:5) ‘I kakeai bongaia naake akea irouia baika iai irou ke a kaokoro aia reeti ma ngai?’ (Iak. 2:​2-4) ‘E anaaki nanou ni baike a kona n reke n ana aonnaba Tatan?’ (1Ioa. 2:​15-17) ‘I tatangiri kaakibotu aika kammaira ao n tiritiri?’ (TaiAre. 97:10; 101:3; Amota 5:15) Am kaeka nakon titiraki aikai, ko a kona n atai iai itera ake ko riai ni mwakuria. Man arora ni buakani iango n rarabakau aika taraa n “nene wakaaia” i nanora, ti a kakukureia iai Tamara are i karawa.​—TaiAre. 19:14.

14. E aera bwa e rangi ni kakawaki rineaia raoraora aika raraoi?

¹⁴ Rineaia raoraora aika raraoi bon te katenua ni mwaneka ae kakawaki. E ngae ngke ti ataia ke ti aki, ma ti bon rotakibuaka irouia naake ti iraorao ma ngaiia. (TaeRab. 13:20) N te tabo ni mwakuri ke n te tabo n reirei, ti bae ni mena i buakoia naake a na aki buokira bwa ti na iaiango n aron te Atua. Ma ti kona ni karekeia raoraora aika raraoi n ara bobotaki ni Kristian. Ikanne are e a kona ni kaumakaki ke ni kauekeaki i nanora “te tangira ma mwakuri aika raraoi.”​—Ebera 10:​24, 25, kbn.

“KATEIMATOAAKI N TE ONIMAKI”

15-16. E kangaa Tatan ni kataia ni bita arora n iaiango?

¹⁵ Ma uringnga are e motinnanoia Tatan bwa e na bita arora n iaiango. E kabonganai iango n rarabakau nako n urua iai ara iango ae raoiroi ae reke man Ana Taeka te Atua.

¹⁶ E teimatoa Tatan n tabeka te titiraki are e tabekia ngkoa nakon Ewa n te onnaroka are i Eten, ae kangai: “Te koaua ae e taku te Atua bwa . . . ?” (KBwaai 3:1) N te aonnaba ae e tautaekanna Tatan ti aki toki n ongongo titiraki aika ti kona n nanokokoraki iai n aron aikai: ‘Te koaua bwa e aki kariaia te Atua te mare i marenan te mwaane ma te mwaane ao te aine ma te aine? Te koaua bwa e aki tangiria te Atua bwa ko na bukamarui Kiritimati ao rekenibong? Te koaua bwa e kantaningaiko te Atua bwa ko na rawa ni karinraraa? Te koaua bwa e kantaningaiko te Atua ae tatangira bwa ko na aki reitaki ma aika kabaneaki aika tangiraki iroum?’

17. Tera ae ti riai ni karaoia ngkana ti aitara ma titiraki aika ti kona n nanokokoraki iai n ara koaua, ao tera uaana ae kaotaki n I-Korote 2:​6, 7?

¹⁷ Ti aki riai n nanokokoraki n ara koaua. Ngkana ti aki kakaaei kaekaan titiraki ibukin ara koaua, ti nang moanna n nanououa n ara onimaki. N tokina, e kona ni kamaabubuaki iai ara iango ao n urua ara onimaki. Tera ngkanne ae ti riai ni karaoia? E tuangira Ana Taeka te Atua bwa ti na onikaki n arora n iaiango, bwa ti aonga ni kakoauaa raoi i bon iroura “bwa tera nanon te Atua ae raoiroi ma n riai ao ni kororaoi.” (IRom 12:2) Man ara katoatai n ukeuke n reirei, ti a kona iai ni kakoauai koaua ake ti reiakin man te Baibara. Ti kona n aki nanokokoraki bwa a bon eti ana kaetieti Iehova. Ao n aron te aroka ae nene wakaana, a na kaneneaki naba wakaara ao ti na “kateimatoaaki n te onimaki.”​—Wareka I-Korote 2:​6, 7.

18. Tera ae e na buokira ni kanakoa mwin te boitin man ana aonnaba Tatan?

¹⁸ Akea ae e kona ni kanenea wakaan am onimaki ibukim. Ngaia are teimatoa ni kabooua nanom ae ngaia ae kaira am iango. Tataro n taai nako ao bubutii te ibuobuoki rinanon taamnein Iehova. Kananoa raoi am iango ao teimatoa n tuoa am iango ao bukini karaoani bwaai iroum. Kakaaeia raoraom aika raraoi ake a na buokiko ni kanakoraoa arom n iaiango. Ni karaoani baikai, ko a kona ni kanakoa mwin te boitin man ana aonnaba Tatan, ao ni kona n urui “iango n rarabakau ma aaro ni kainikatonga nako ake a kauntabaa te atatai ibukin te Atua.”​—2Kor. 10:5.