Ngkana E a Bwara Nanom n te Maiu Aei

E taku Adriana mai Brazil: “E ririkirake ni kakaiaki te namakin aei. Ngaia are irou e a raoiroi riki ngkana I mate.”

KO A TIA n nanamakina te aekaki aei ao ko a aki kani maiu? Ngkana ko a tia ao ko na bae n ota n ana namakin Adriana. E riao raraomana ao e a nanokawaki ma ni bwara nanona. E a reke iroun Adriana te aoraki ae te rawawatannano.

Iangoa naba te I-Tiaban ae Kaoru are tararuaiia ana karo aika kara. E kabwarabwaraa teuaei ni kangai: “N te tai naba anne, I a taonakinako ni baika bati n au mwakuri. Imwina riki ao e a aki rin kanau ao I a aki kona ni matu. Ao I a iangoia ae I bebete riki ngkana I mate.”

E taku te mwaane ae Ojebode mai Nigeria: “I rarawawata ni karokoa ae I bon tang, ngaia are I a kakaaei aanga ae e na toki iai maiuu.” Ma e kakukurei bwa a bon aki bakabureiia Ojebode, Kaoru, ao Adriana. Ma iai bubua ma bubua tenga ni katoa ririki aika a boni bakabureiia.

TI NA KAREKEA IA BUOKARA?

Angia aika a babakabureiia boni mwaane, ao a bati i buakoia mwaane akanne aika rangi ni maamaa ni bubutii buokaia. E taku Iesu bwa a kainnanoa te taokita aomata aika aoraki. (Ruka 5:31) Ngaia are ngkana ko namakina naba anne, taiaoka tai maamaa ni kakaaea buokam. A bati ake a rotaki n te aoraki ae te rawawatannano, ake a a tia ni buokaki n te onnaoraki. A a tia Ojebode, Kaoru, ao Adriana ni buokaki irouia taokita, ao ngkai a a kona riki ni kekeiaki ma aorakia.

A kona taokita ni kabongana te bwainnaoraki ke bon tii te maroro, ke a kaai ni karaoi baikai ni katoka iai te aoraki ae te rawawatannano. Naake a rotaki n te aoraki aei, a kainnanoa naba te boutoka ma te taotaonakinnano, ao tabeakinaia irouia aia utu ao raoraoia. Raoraom ae te kabanea n raoiroi bon Iehova ae te Atua, ae katauraoa te ibuobuoki ae tamaroa rinanon ana Taeka ae te Baibara.

IAI TE ANGA AE E NA MAUNA IAI N AKI TOKI?

A kakainnanoa te bwainnaoraki n te tai ae maan aomata aika rotaki n te aoraki ae te rawawatannano, ao a riai n reireinia aroia ni kekeiaki ma aorakia, n aroia ni bibitii aroni maiuia. Ma ngkana ko kabokorakora ma te aoraki aei, ko kona n kariariai taai aika kakukurei aika imwaira, n aron ae e karaoia Ojebode. E taku teuaei: “I kariariaa kakoroani bukin Itaia 33:24, are taekina te tai ae e nang akea iai ae maeka n te aonnaba ae e na kangai, ‘I aoraki.’” Karekea kabebeteam n aron Ojebode n ana berita te Atua ibukin “te aonnaba ae boou” ike e nang akea iai “te maraki.” (Te Kaotioti 21:1, 4) E nanonaki naba n te berita anne tokin rawawatan te iango ao te namakin. E nang toki marakim n aki toki. A nang “aki manga rin n te iango . . . ao a na aki naba manga rin [i nanom]” namakin aika kammaraki.—Itaia 65:17.

Kibun te Baibara Aika Kona n Ibuobuoki

E ota te Atua n am namakin.

“I rawea baim ae te atai ngai ae Iehova ae Atuam, are . . . kangai nakoim, ‘Tai maaku. N na buokiko.’”—Itaia 41:13.

E ota riki Iehova n ara namakin, nakoia aomata nako ao e kani buokira.

Iaiangoa Ana Taeka te Atua.

“E a bubutii [Eria] bwa e nangi mate. E taku: ‘ . . . Iehova, an anaa maiuu.’”—1 Uea 19:4.

E taku Ojebode: “I buokaki n iaiangoan Ana Taeka te Atua, ao I a ataia iai ae e namakina naba aei ngkoa Eria.”

Karekea reireiam mani katoto aika n te Baibara.

“I a tia [ngai ae Iesu] ni kakorakoraai n tataro ni bubutii ibukim [Betero] bwa e na aki bua am onimaki.”—Ruka 22:32.

Imwin tian te abotoro Betero ni kakeaa Iesu tenua te tai, ao e a rangi n rawawata nanona ao ni korakai n tang. E taku Kaoru: “Te baere e rinanona Betero, e buokai n noria ae Iehova ao Iesu a bon tabeakina ana namakin Betero. I boni kaungaaki iai.”

A nang “aki manga rin n te iango . . . ao a na aki naba manga rin [i nanom]” namakin aika kammaraki.—Itaia 65:17