Tiina Ngkoa Aika A Riki Bwa Taari ni Koaua n te Onimaki

Felisa: I nako man te utu ae rangi n taua te Aro. Bon 13 mwaitiia ara koraki aika taian tama ke aika iai nakoaia n te Aro ni Katorika. E katabuaki naba iroun te Bobe ae John Paul II, ai mwanen tinau ae te tama are te tia reirei n reirein te Aro ni Katorika. E rangi ni mangori ara utu. Bon te tia mwakuria te biti tamau ao e mwakuri tinau n te tawaana. Waniman mwaitira ao bon te karimoa ngai.

E boo te buaka ae te Spanish Civil War ngke 12 au ririki. Imwin te buaka ao e a karabuutinaki tamau. E aki kukurei te tautaeka ae kairimatoa n ana iango tamau aika riai. E kekeiaki tinau n taraia bwa ti na aki baki, ngaia are e a tuangaki iroun raoraona temanna bwa e na kanakoia tariu aika teniman aika Araceli, Lauri, ao Ramoni, nakon aia tabo tiina i Bilbao i Tibein. A aikoa kona ni baki iai.

Araceli: Ai tibwa 14, 12, ao 10 ara ririki n te tai anne, ao e rangi ni kangaanga te raurenako ma ara utu. Ara mwakuri i Bilbao bon te kaitiaki. Uoua te ririki imwina, a kamwaingira tiina nakon te tabo n tina teuana ae bubura riki i Zaragoza, ae a tabeakinaki iai kaara. Ara mwakuri boni kaitiakan te umwa ni kuuka, ae te mwakuri ae kakua ibukia ataei aika tebwi tabun aia ririki.

Felisa: Ngke a a nako tariu akanne nako Zaragoza, e a iangoia tinau ma ai tamau ae te tama naba n ara kaawa bwa I riai ni mwakuri n te tabo naba n tina anne. A iangoia bwa ngkana I mwaing I a kona iai ni kararoaaki ma te ataeinimwaane n ara kaawa ae iai nanona irou. Kioina ngkai te teinnaine ngai ae I rangi n taua te Aro, I kukurei n te iango are N na tiku n te tabo n tina i nanon tabeua te tai. I irira te Tutia ni katoabong, ao I iaiangoa naba ae N na riki bwa te mitinare n aron temanna ai mwaaneu ae te tari i Aberika.

A aki kaungaa nanou tiina bwa N na beku iroun te Atua n aaba tabeua, ao I a namakinna bwa kaanga I a kabureaki n te maiu n aia tabo tiina. Ngaia are teuana te ririki imwina, I a iangoia bwa N na okira mwengau n tabeakina ai tamau are te tama. Irarikin au mwakuri n te auti, I Rotario ni katoa tairiki ma ngaia. I tatangiria naba ni katauraoi ueen te umwantabu ao ni katamaroai bannani Maria ao naake aongkoa santo ke santa.

Araceli: N te tai anne, e a bitaki maiura n te tabo n tina. Imwin taekinan au moani berita, a iangoia tiina bwa a na kamaenakoira. E tiku Ramoni i Zaragoza, ao e nako Lauri nako Valencia, ao I kanakoaki nako Madrid, ike I a taekina iai au kauoua ni berita. N te tabo n tina i Madrid ao a katauraoaki aia tabo ni maeka ataein te reirei, kaara, ao ai iruwa tabeman riki, ngaia are e rangi ni bati te mwakuri. I mwakuri ngai n aia tabo naake a aoraki.

Ni koauana, I kantaningaia bwa e na kakukurei riki te maiu n tina. I kakariariaa warekan te Baibara ao n ota iai. Ma akea ae e mamaroroakina taekan te Atua ke Iesu, ao ti aki kabongana te Baibara. I tii reiakin tabeua te taetae n Ratine, I kamatebwaia aroni maiuia naake aongkoa santo ke santa, ao I taromauria Maria. Irarikin akanne ai te mwakuri korakora.

I a moanna n namakina te raraoma ao I maroro iai ma te mataniwi n tina. I tuangnga ae akea riain au mwakuri korakora ibukin reken aia mwane tabeman, ma a rangi ni kainnanoa au ibuobuoki au utu. E rokanai n te ruu teuana ao ni kantaningaia bwa e na bitaki iai au iango, ao e aki kaungaai bwa N na kitana te tabo n tina.

N taai aika tenua ao a kaotinakoai tiina bwa a tii kan noria bwa I teimatoa ni kan nako ke I a aki. Ibukina bwa I teimatoa n au iango, a a tuangai bwa N na korea aei: “I kan nako ibukina bwa I tangiria ni beku riki iroun Tatan nakon te Atua.” I mimi n te bae a tangiria aei ao e ngae ngke I rangi ni kani kitana te tabo n tina, ma I bon aki kona ni korei taeka akanne. N tokina ao I a tangiria ni kani maroro ma te tama ae te tia ongoraei taiani kaotibure ao I tuangnga te bwai ae riki. E kanakotaeka nakon te aono ae mena i aan te ebikobo bwa N na kamwaingaki nakon au tabo n tina rimoa i Zaragoza. Imwin tabeua te namwakaina ikekei, e a kariaiakaki nakou. N te tai ae aki maan, a a kitana naba te tabo n tina Lauri ao Ramoni.

E KAMAENAKOIRA TE BOKI AE “TABUAKI” REKENA IROURA

Felisa: Ni waakinakon te tai, I a mare ao ni mwaing nako Cantabria. I teimatoa ni kaakaea te Tutia, ao n te Taabati teuana e a taekinaki te kaongora ae kamimi mai moa. E takarua ma te un te tama ao e taku: “Nora te boki aei!” ao e kotea te boki ae The Truth That Leads to Eternal Life. E reitia n taku: “Ngkana iai ae e anganingkami katotona, anganai ke karenakoa!”

Akea katotona irou ma I tangiria ni karekea ngkekei naba. E bon riki anne, bwa tabeua te bong imwina a a karebwerebwe uoman taani Kakoaua n au mataroa ao a anganai te boki are “tabuaki.” I warekia n te tairiki naba anne, ao ngke a a manga oki aine akanne, I a kukurei n reirei n te Baibara ma ngaiia.

E waekoa n ringaki nanou n te koaua. E bitaki tangiran au Aro rimoa nakon tangiran Iehova ae korakora ao ingaingau n te mwakuri ni minita. I bwabetitoaki n 1973. E ngae ngke e aki bati reken au tai n tibwaa te koaua nakoia au utu, ma I karaoia ni kabanea au konaa iai. N aron are I kabwarabwaraa mai moa, a kakorakoraia ni kaaitarai au koaua, ai moarara riki tariu ae Araceli.

Araceli: E korakora uniu ni baike I rinanoi aika aki raoiroi n te tabo n tina. Ma I teimatoa n irira te Tutia n te Taabati koraki ao I Rotario ni katoabong. E teimatoa ni korakora nanou ni kan ota n te Baibara ao I butiia te Atua bwa e na buokai. Ma ngke e taekin ana koaua aika boou tariu are Felisa n taetae ma te ingainga, ao I taku bwa e a riao. I teimatoa n aki boraoi n iango ma ngaia.

Tabeua te ririki imwina, I a okira Madrid ibukin te mwakuri ao I a mare. Imwina riki, I a moanna n titiribure. I noriia aomata ake a katoatai n ira te Tutia bwa a aki maiuakin reirei ake n te Euangkerio. Ngaia are I a katoka iriran te taromauri. I a aikoa kakoauaia naake aongkoa santo ke santa, te kaotibure, ke te ai ni moone. Ao I a kanakoi naba ni kabane au bouannanti. I aki koaua raoi bwa I karaoa ae eti ke I aki. I namakina te bwarannano ma I teimatoa n tataro nakon te Atua ni kangai: “Buokai bwa I tangiria ni kani kinako!” I uringia Ana Tia Kakoaua Iehova ake a kakawara au auti ma I aki roko n te kauka te mataroa. I a aki onimakini Aaro nako.

Ni moan 1980 tabun, a a moana te reirei n te Baibara ma taani Kakoaua, tariu aika Lauri ao Ramoni, ake a maeka i Buranti ao Tibein. I iangoia bwa tao a a tia ni burebureaki n aron Felisa. Imwina riki, I a kaitiboo ma kaain rarikira ae Angelines, are e a riki bwa raoraou ni kaan. Bon temanna naba Ana Tia Kakoaua Iehova. E okioki neiei ma buuna n tuangai bwa N na reirei n te Baibara. A ataia ae I taka n tangira te atatai man te Baibara e ngae ngke I titiribure. N tokina, I taku nakoia: “E raoiroi. I kukurei n reirei n te Baibara ma ngkoe ma tii ngkana I kabongana oin au Baibara,” ae taekan au Baibara ae te Nácar-Colunga.

E A KATITEUANAIRA TE BAIBARA

Felisa: Ngke I bwabetitoaki n 1973, ao tao 70 taani Kakoaua n te kaawa ae Santander, ae kautun te aono ae Cantabria, i Tibein. E rangi ni bubura ara aono, ngaia are ti mwananga i aon te bwati ao imwina te kaa n uarongorongo ni kabutaa te aono. Ti kawara te kaawa teuana ma teuana ni karokoa ae ti a tia ni kawari kaawa aika bubua ma bubua i aona.

I a tia ni kairi reirei n te Baibara aika bati n ririki aika nako, ao 11 mai buakoia aika bwabetitoaki. Angiina boni Katorika. Ibukina bwa e korakora ngkoa au onimaki iai, I riai n taotaona nanou ao n akoi. I ataia ae a kainnanoa te tai ae maan ibukini kaakan aia koaua ake a rangi ni matoatoa iai, ao e riai n ringaki nanoia n te Baibara ao n taamnein Iehova bwa a na buokaki n ataa te koaua. (Ebera 4:12) E bwabetitoaki n 1979 buu ae Bienvenido ae te bureitiman ngkoa, ao e moana te reirei n te Baibara tinau teutana te tai imwaini matena.

Araceli: I rangi n nanououa ngke I moana te reirei n te Baibara ma taani Kakoaua. Ni waakinakon te wiki, I a noria bwa e a toki namakinan uniu are korakora. Ae anaaki riki iai nanou irouia taani Kakoaua, boni maiuakinan te baere a uarongorongoia. E onikaki te titiribure nakon te onimaki ao I a namakina riki te kukurei. A taku naba nakoiu tabeman kaain rarikiu: “Teimatoa n toua te kawai ane ko rineia anne, Araceli!”

I uringa au tataro aei: “I karabwako Iehova n arom n aki kaaki taekau ao ni karekei aanga aika rangi ni bati bwa N na kunea te bwai ae I kakaaea, ae te atatai ae koaua man te Baibara.” I tuanga tariu are Felisa bwa e na kabwaraa au bure, imwin au taeka aika kammaraki. E oneaki mwin ara kauntaeka nakoni maroro aika kaunganano man te Baibara. I bwabetitoaki n 1989 ngke 61 au ririki.

Felisa: Ai 91 ngkai au ririki, e a tia ni mate buu ao ai tiaki aroni korakorau are mai mwaina. Ma I katoabong ni wareka te Baibara, I kaakaei bobotaki ngkana I marurung, ao I kimwareirei ni kabanea au konaa n uataboa te mwakuri ni minita.

Araceli: Tao ibukina bwa te tina ngkoa ngai, I tatangiria n uarongorongo nakoia taama ao tiina ake I boo ma ngaiia n te mwakuri ni minita. I angania booki aika bati ao a ueke maroro tabeua aika kakannongora. I uringa ana taeka temanna te tama imwin okiokirana irou are kangai: “I kakoauako Araceli, ma N na nakea n rorou aei? E na tera aia taeka kaain au Aro n au aono ao au utu?” I taku nakoina: “Ao e na tera ana taeka te Atua?” E katoua atuna ma te nanokawaki, ma e aki ninikoria ni waakina ana ukeuke ibukin te koaua.

I ururinga te bong ae okoro ni maiuu. Bon te tai are e moan tuangai iai kaainnabau bwa e kan irai nakon te taromauri. E ngae ngke ai 80 tabun ana ririki n te tai anne ma e aki roko n te bwaka kaakaean te taromauri irouna mai imwin anne. E reirei n te Baibara ao e riki bwa te tia uarongorongo ae tuai ni bwabetitoaki. I ururingi taai aika kakukurei n te mwakuri ni minita ma ngaia. E mate uoua te namwakaina imwain te bong are e na bwabetitoaki iai.

Felisa: Te raunnano ae korakora riki ni maiuu bon noraia tariu teniman aika karimwiu ake a moani kakaitaraai, ake a a riki bwa tariu n te onimaki. Ai kakukureira te kaai n ikotaki ni maroroakina taekan Atuara ae Iehova ma ana Taeka! N tokina, I a katiteuanaaki ma tariu n taromauria Iehova.a