KAONGORA IBUKIN TE REIREI

I nanon ririki aika nga ma nga ao e rereitaki Iehova ma ana toro n taetae aika kakaokoro. A kaotaki ni kaongora aikai bwa e aki tukaki reitakina ma aomata ni kabonganaan taetae aika kakaokoro. Ti na nora naba aron Te Baibara ae Tabu—te Rairai ae te Aonnaba ae Boou, n ikotaki ma are e a manga rinanoaki n 2013, n riki bwa te bwai ni mwakuri ae rangi ni manena ibukini katabuan aran te Atua ao kaotan ana kantaninga.

Te konabwai n taetae bon te bwaintangira ae rangi n tamaroa mairoun te Atua. E maroroakinaki n te kaongora aei itera aika tenua n ara taetaenikawai. Ti kaungaaki naba iai bwa ti na kakairi n ana katoto Iesu ni kabongana te bwaintangira ae rangi ni manena aei ibukini kamoamoaan te Atua ao kakabwaiaaia tabemwaang.

Ti bane n aoaoraki. Ma tera ae ti riai n iangoia ibukini kakamaiu ake a koreaki n te Baibara? Tera ae ti riai n iangoia ngkana a anga taeka n ibuobuoki tabemwaang ibukini bwainnaoraki? E na buokira te kaongora aei ni kaekai titiraki akanne ao ni karaoi oin ara babaire.