Tera Bukin Neneran te Baibara?

TE BAIBARA BON RONGORONGON RIMOA AE ETI RAOI

Eric: I riai n tuangko ae I aki rangi n taua te Aro. Ngaia are N au iango, akea te bwai ae ti riai ni maroroakinna.

Brian: I karabwako ngkai ko kaongoai anne. E ngae n anne, arau Brian ao antai ngkoa aram?

Eric: Eric.

Brian: I kukurei ni kaitiboo ma ngkoe, Eric.

Eric: Ngai naba.

Brian: Ko kariaia ngkana I titirakiniko bwa ko ikawairake n te mwenga ae a taua te Aro kaaina?

Eric: Eng. Ma ngke I a rin n te kauarinan, I a aki manga iaiangoa te Aro.

Brian: Anaia Nao. Ao tera ae ko reiakinna n te kauarinan?

Eric: Bon te Social studies ae reiakinani baika irekereke ma te reitaki ma aomata ao te history ae rongorongon rimoa. I rangi n tatangira te history ni kaineti ma rikirakeia aomata.

Brian: E kona n rangi n anainano te history. Ma n aron ae ko ataia ibukin te Baibara, bon te boki ae taekini baika riki rimoa ao ngkai. Ko a tia ni kabongana te Baibara n am kakaae?

Eric: I tuai. Ma I ataia bwa bon te boki ae tamaroa ao I tuai man iaiangoia bwa e taekini baika riki rimoa ao ngkai.

Brian: Ko taraa ni kai butimwaei iango. Ngkana ko mwaawa tabeua te miniti ao I tangiria ni kaotii nakoim tabeua katoto, n rongorongon rimoa aika eti raoi man te Baibara.

Eric: E raoiroi anne ma akea au Baibara.

Brian: Akea te kangaanga. I kona ni kaotia man au Baibara. Te moani katoto e kaotaki n 1 Rongorongo mwakoro 29, kibuna 26 ao 27 (BG). A kangai kiibu akanne: “Ao e uea Tawita are natin Iete i aoia Iteraera ni kabaneia. Ao ana bong ake e uea iai i aoia Iteraera angaun te ririki; e uea i Eberon iti ririki, ao e uea i Ierutarem teningauni ma ten ririki.”

Eric: E kangaa n riki anne bwa te katoto ae eti raoi ibukin rongorongon rimoa?

Brian: Ni koauana, n te tai teuana a a tia taani kakaaitara n taekinna ae akea te Uea ae Tawita.

Eric: Eng? Ao bukin tera bwa a nanououa n anne?

Brian: Ibukina bwa e karako te bwai ni kakoaua, irarikin ae taekinaki n te Baibara bwa bon te aomata ni koaua. Ma e ngae n anne, n 1993 ao a a tia taan rabakau ni bwain aantano ni kunea te atibu rimoa ma te koroboki i aona ae kangai rairana: “Ana Auti Tawita.”

Eric: Ai kakaongorara.

Brian: Temanna riki te aomata n te Baibara bon Bontio Birato ae te kowana are e kairiri n ana tai Iesu, are a nanououa naba bwa iai ke akea. E taekinaki rongorongona n Ruka mwakoro 3, kibuna 1—bwa ngaia mai buakoia tabeman bwakuakun te tautaeka n te tai arei.

Eric: Eng, I ataia. E taekinaki iai ae kangai: “Ngke e kowana Bontio Birato i Iutaia, ao e tautaeka Erote n te aono ni Kariraia.”

Brian: E koaua. A a tia n nanououa i nanon ririki aika bati taan rabakau tabeman bwa bon iai ke akea te aomata ae Bontio Birato. Imwina, e a kuneaki te atibu ma arana ae kakaaraki ni katereaki raoi i aona, tao 50 te ririki n nako i Maiaki-maeaon Atia ao Aberika Meang.

Eric: Anaia Nao. I aki ongongo anne mai mwaina.

Brian: I rangi ni kukurei n tibwai rongorongo aikai nakoim.

Eric: Ni koauana, I aki toki n iangoa te Baibara bwa te boki ae koreaki irouia aomata, ma akea ataakina irou ae iai kakawakina nakoira n ara bong aikai. Tao a eti raoi rongorongon rimoa ake iai, ma n au iango bon akea manenana nakoira.

TE BAIBARA BON TE BOKI AE E A MAAN TAINA MA E IREKEREKE MA TAAI AIKAI

Brian: A rangi ni bati aomata aika a inanoi ma anne. Ma e kaokoro anne ma au koaua. Aio bukina: Akea bitakini baika a kainnanoi aomata man te moani karikibwai. N te katoto, ti aki toki ni kainnanoa te amwarake, te kunnikai ao mwengara. Ti aki toki naba ni kainnanoa reitakira ma aomata nako ao ni karekea ara utu ae kakukurei. E aki ngkanne koaua ae a rangi ni kakawaki baikai ni kabane?

Eric: E eti anne.

Brian: Ti kona ni buokaki man te Baibara ni kaineti ma itera akanne ni kabane. Anne are ti bae n aranna bwa te boki ae e a maan taina ma e irekereke ma taai aikai naba.

Eric: Tera ae ko nanonna?

Brian: N na taekinna n te anga teuana: Iai naba n te Baibara booto n reirei aika rangi ni kakawaki, aika titeboo manenaia n te tai are a koreaki iai n tienture aika nako ma boong aikai.

Eric: Anaia. N itera raa?

Brian: Ti kona ni buokaki ni booto n reirei ake iai, ngkana ti iangoa ae riai ibukin te mwane ke te utu ae kakukurei ke rikira bwa te rao ae raoiroi. Titeboo te boki aei ma ara mwabe ibukini kanakoraoan ara utu. N te katoto, ko aki ngkanne kakoauaa ae bon te bwai ae kangaanga kanakoraoan ana kairiri te buu te mwaane ao atun te utu ni boong aikai?

Eric: Tao, eng, I kakoauaa anne. I a tia n tekateka n taanga ma buu n te maan ae kaania teuana te ririki ao e aki bebete n taai nako te boraoi n iango i marenara.

Brian: E koaua anne. Ma iai booto n reirei man te Baibara aika a kai ota aika a uaana. N te katoto, nora I-Ebeto mwakoro 5. Ti na wareki kibuna aika 22, 23, ao 28. Taiaoka ma wareki.

Eric: Ngaia. Ao e kangai: “Ke a aantaeka buuaine nakoia buuia, n aroia n aantaeka nakon te Uea, ibukina bwa te buu te mwaane bon atuni buuna, n aron naba te Kristo ngkai atun te ekaretia, are rabwatana, are te tia kamaiu iai.” Ao e kangai kibuna 28: “N aron aei, a riai naba buumwaane n tangiriia buuia n aron tangiran oin rabwataia. Ane tangira buuna ao e tangiria naba i bon irouna.”

Brian: E rabwa anne. E aki ngkanne koaua bwa ngkana a kaai ni maiuakina te reirei ni kairiri ae kai ota anne taanga, tiaki bwa e na nakoraoi iai aia utu?

Eric: Eng, tao ngaia anne. Ma e bebete riki taekinana nakoni karaoana.

Brian: E koaua anne, bwa akea ae kororaoi. Ni koauana, n te mwakoro anne ao ti kaungaaki ni kibuna teuana bwa ti riai ni wanawana.a E kainnanoaki te nanoraoi irouia taanga n aaro n reitaki ni kabane. I noria ma buu bwa ti buokaki n te Baibara n anne.

Eric: E eti anne.

Brian: Iai aia atureti Ana Tia Kakoaua Iehova n te intanete ae a kona n reke iai rongorongo tabeua aika raraoi ibukin te mare ao te utu. Ngkana ko mwaawa tabeua te miniti ao I kona ni kaota te katoto nakoim.

Eric: E raoiroi. E mwaawa au tai.

Brian: Ko rabwa. Te atureti ibukin anne bon www.jw.org. Aio ae ko kona n noria n te moan iteraniba te intanete.

Eric: I rangi ni mataaiakin taamneina.

Brian: Akanne taamnein aron waakinan te mwakuri ni minita ae ti kakaraoia ni katobibia te aonnaba. Aa, ae ti a roko iai. E kangai atun te iteraniba i: “Couples and Parents.” Ao i aan te atu anne, iai kaongora tabeua aika kimototo ni kaineti ma kangaanga nako. Iai teuana ae e anaaki nanom iai?

Eric: Iai, ae: “Solving Problems in Your Marriage.” I tangiria ni kabongana anne!

Brian: E kabwarabwaraaki n te kaongora aei aanga aika aua ibukini kanakoraoani kangaanga. Nora te barakirabe aei. Ko kona ni warekia?

Eric: Ngaia. E kangai: “Ngkai e kabotauaki te itoman n te mare bwa te raraa ae te maiu, ngkanne te tangira ao te karinerine n te iraorao ai aron te buroo ao te maamaa.” Aa, e tikiraoi kabwarabwaraana anne.

Brian: Ko rabwa n am wareware. Iai kibun te Baibara ae kaotaki ikai. Ko kona n noria tii mani koteana n aron aei.

Eric: Ngaia, e a reke irou. E taekinaki n I-Ebeto 5:33: “Ke e tangira oini buuna temanna ma temanna n arona n tangiria i bon irouna, ao ai arona naba bwa e riai te buu te aine ni korakora karineani buuna irouna.”

Brian: Ko noria bwa e kamatataaki iai taekan te anga are e kantaningaia temanna bwa e na karekea?

Eric: I aki ota n te bwai ae ko nanonna.

Brian: Taraia, e aki ngkanne koaua ae e tangiria te mwaane bwa e na karineaki irouni buuna. Ao ibukin anne, e aki naba tangiria te aine bwa e na kakoauaa n taai nako ae e tangiraki irouni buuna?

Eric: Eng. I boraoi n iango ma anne.

Brian: Ngkana e kakaaei aanga ibukini kaotiotan tangirani buuna, te buu te mwaane, tiaki e na bebete riki karineana irouni buuna?

Eric: E taraa n ae e na nakoraoi anne.

Brian: Ngaia are e ngae ngke e koreaki kibun te Baibara aei tao e kaania 2,000 te ririki n nako, ma a mwaneweaki baika a kainnanoi taanga ni mare ao e anga naba te reirei n ibuobuoki ae e na uaana ngkana e maiuakinaki. E na kateimatoa nakoraoin te mare te “buroo ao te maamaa” ae te kaikonaki are ti warekia mai mwaina.

Eric: I riai ni kakoauaa bwa e bati riki ae kamatataaki n te Baibara nakon ae I kona n iangoia.

Brian: I kukurei n ongo anne. Ma I tangiria bwa ti na okirikaki bwa N na ongora n am iango n te atu ae: “Four Steps to Solving Problems” ae oti naba n te kaongora aei n te intanete n ara atureti.b

Eric: Ngaia. N na rinanona ma buu.