A Kakoauaa Iesu Ana Tia Kakoaua Iehova?

MOAN TE KAKAWAKI KAKOAUAAN IESU

Anthony: Mauri, Tim. I kukurei ni manga kaitiboo ma ngkoe.

Tim: Ao ngai naba.

Anthony: I uouotii maekatin aika boou ibukim ae Te Taua-n-Tantani ao te Awake! Au kantaninga bwa ko na boni kukurei ni kanoan maekatin aikai.

Tim: Ko rarabwa. I kukurei n rokom ngkai bwa iai te bwai ae I kan titirakiniko.

Anthony: E tikiraoi ao tera?

Tim: N te bong teuana ao I maroro ma raou ni mwakuri. I taekin nakoina maekatin ake ko anganganai ao kakukurein te wareware iai. Ma e tuangai bwa I aki riai ni wareki ibukina bwa a aki kakoauaa Iesu Ana Tia Kakoaua Iehova. E koaua anne? I bon tuanga raou ni mwakuri anne bwa N na titirakiniko ngkana ko a manga roko.

Anthony: I kukurei ngkai ko titirakinai. E raoiroi bwa ko bon tuangai. Ni koauana, tera te anga ae raoiroi riki ngkana ko kan ataa te bwai ae kakoauaa te aomata irarikin ae ko bon titirakinna?

Tim: I bon iangoa naba anne.

Anthony: N etina, a boni kakoauaa raoi Iesu Ana Tia Kakoaua Iehova. Ni koauana, ti namakinna bwa e rangi ni kakawaki kaotiotan onimakinan Iesu ibukin te kamaiuaki.

Tim: I bon iangoa naba anne, ma ngke e tuangai raou ni mwakuri bwa kam aki kakoauaa, e a kiriuriu iai nanou. N au ururing, I bon tuai ngkoa ni mamaroroakinna raoi ma ngkoe.

Anthony: I kona ni kaotii kibun te Baibara tabeua aika a katereterea kakawakini kaotiotan onimakinan Iesu? Aikai kiibu aika a aki toki ni kamanenai Ana Tia Kakoaua Iehova n aia mwakuri ni minita.

Tim: E tamaroa.

Anthony: E raoiroi bwa ti na moanna man ana taeka Iesu aika n Ioane 14:6. Bon aei naba kanoan ana maroro Iesu nakon temanna mai buakoia ana abotoro. Ti wareka iai ae kangai: “E taku Iesu nakoina: ‘Boni ngai te kawai ao te koaua ao te maiu. Akea ae e na nakon te Tama ma tii ane rirou.’” Ni kaineti ma te kibu anne, tera te kawai ae tii teuana ae ti kona ni kawara iai te Tama?

Tim: Bon rinanon Iesu.

Anthony: E eti anne. Ao a kakoauaa raoi anne Ana Tia Kakoaua Iehova. Ni koauana, I kona n titirakiniko aei: Tera ae ko ataia ibukini baike e tangiri te Atua mairoura ngkana e tataro temanna, e na tataro rinanon aran antai?

Tim: Rinanon aran Iesu.

Anthony: I boraoi n iango ma ngkoe. Ao anne bukina ae I kawaerakei au tataro ni kabane rinanon aran Iesu. A boni karaoa naba anne Ana Tia Kakoaua Iehova n aia tataro ni kabane.

Tim: I kukurei n ataa anne.

Anthony: Te kibu teuana riki ae ti kona ni maroroakinna bon Ioane 3:16. E rangi ni kakawaki te kibu anne n te aro ae e a atongaki bwa oin raoi nanon te Euangkerio. Te iango iai bwa ngkana ko kona n ikotii bwaai ni kabane aika koreaki ibukini maiun Iesu i aon te aba ma ana mwakuri ni minita ao ni botii n teuana te kibu, ao bon aei raoi nanona. Ko bae ni kani wareka te kibu aei.

Tim: Ngaia. E kangai: “Bwa e rangi n tangiriia kaain te aonnaba te Atua, n te aro are e a anga Natina ae te rikitemanna, bwa e aonga n aki kamaunaaki ane onimakinna, ma e na reke irouna te maiu are aki toki.”

Anthony: Ko rabwa. Ko a tia n ongongo te kibu aei?

Tim: Eng, e a bati au tai n ongongoraea n au Aro.

Anthony: Bon te kibu ae rangi n ataaki. Ngkana ko karaua n iangoia, nora ana taeka iai Iesu: E taekinna bwa man ana tangira te Atua a a kona aomata ni karekea te maiu are aki toki—ma tii ngkana ti karaoa tera?

Tim: Kaotiotan te onimaki.

Anthony: Eng. Ae moamoa riki bon onimakinan te Nati ae te rikitemanna ae Iesu Kristo. Ao te reirei aei ae onimakinan Iesu, e na kauka te kawai nakon te maiu are aki toki—ao e taekinaki ikai n iteraniba 2 n te maekatin ae I uotia nakoim aei. Ni kaineti ngkanne ma manenan Te Taua-n-Tantani, e taekinaki n te maekatin bwa i buakoni bwaai riki tabeua e “boutokaa onimakinan Iesu Kristo are e mate bwa ti aonga ni kona ni karekea te maiu are aki toki, ao are e a tautaeka bwa te Uea n Ana Tautaeka n Uea te Atua.”

Tim: Bwa ngaia anne. Bon iai n ami maekatin te bwai ni kakoaua ae a kakoauaa Iesu Ana Tia Kakoaua Iehova.

Anthony: E rangi n eti anne.

Tim: Ma bukin tera ngkanne ngkai a taku aomata bwa kam aki kakoauaa Iesu?

Anthony: E bae ni bati bukina ngkai a taekina anne aomata. Bukina tabeua, a tii taekinna tabeman ibukina bwa a a tia n ongongo mairouia tabemwaang. Ke tao a a tia n reireiaki te iango ae kairua aei irouia aia mitinare.

Tim: N na iaiangoia moa—tao a taekinna aomata tabeman bwa kam aki kakoauaa Iesu ibukina bwa kam araningkami bwa Ana Tia Kakoaua Iehova ao tiaki Ana Tia Kakoaua Iesu.

Anthony: Tao ngaia naba anne bukina.

Tim: Bukin tera bwa e rangi ni bati am tai n tataekina Iehova?

“I A TIA NI KAOTIOTA ARAM”

Anthony: Bukina teuana, ti kakoauaa bwa e kakawaki kamanenaan aran te Atua ae Iehova n aron naba are e karaoia Natina ae Iesu. Iangoa ana taeka Iesu n ana tataro nakon Tamana. E koreaki n Ioane 17:26. Ko kona ni warekia taiaoka?

Tim: Eng. E kangai: “I a tia ni kaotiota aram nakoia ao N na boni manga kaotia, bwa e aonga ni mena i nanoia te tangira are ko tangirai iai, ao N na katiteuanaaki ma ngaiia.”

Anthony: Ko rarabwa. Noria, e taekinna Iesu bwa e a tia ni kaotiota aran te Atua. N am iango, e aera ngke e karaoa anne?

Tim: Aa. I a aki koaua raoi iai.

Anthony: Tao e raoiroi ngkana ti nora te kibu riki teuana ae kamataataa raoi bukina. I iangoa Mwakuri 2:21. Ti wareka iai ae kangai: “Ane taboa aran Iehova e na kamaiuaki.” Ngkai I ataia raoi bwa ko boraoi n iango ma ngai bwa ngkana ngaia bwa e kainnanoaki taboan aran Iehova ibukin te kamaiuaki, akea te nanououa bwa Iesu e bon ataa riaini karaoan aei.

Tim: Eng, ngaia anne.

Anthony: Ai ngaia are kamaiuaia taan rimwina bon teuana bukina ae kakawaki iroun Iesu bwa a na ataa aran te Atua ao ni kamanena. Ao bon anne bukina teuana ae moan te kakawaki ngkai ti kabatiaa ara tai n tataekina Iehova. Ti namakinna bwa e kakawaki kaotiotan aran te Atua ao buokaia aomata bwa a na taboa te ara anne.

Tim: E ngae ngke a aki ataa aran te Atua aomata ke ni kabongana, ma a bon ataa ae a taetae nakoina ngkana a mwanewea te Atua.

Anthony: Tao e koaua anne. Ma ngkai ko tuangira aran te Atua, e a bon tia ni karekea te anga ae bebete riki ibukini kaaniara nakoina.

Tim: Tera ae ko nanonna?

Anthony: Iangoia n te aro aei: Ti aki riai n ataa arani Mote. Ti kona n ataia ngkoa bwa bon tii te mwaane ae katabwenaa Taari ae Uraura ke te mwaane ae anganaki Tuua Ake Tebwina. N aron naba Noa, e aera bwa ti riai n ataa arana? E kona naba n tia n taekinaki bwa te mwaane are e kabaa te ake ao ni kamaiuia ana utu ao maan. Ibukin anne, e kona naba n tia n ataaki Iesu Kristo bwa teuare e roko mai karawa ao ni mate ibukin ara bure. Ngaia anne?

Tim: Tao ngaia anne.

Anthony: Ma e taraia raoi te Atua bwa ti na atai araia aomata akanne. Ibukin ataakin araia, e a rangi ni koaua riki te rongorongo iroura. E ngae naba ngkai ti tuai mani kaitiboo ma Mote, Noa, ke Iesu, ma ataakin araia mwaane aikai titeboo ma ti a rangi ni kinaia.

Tim: I tuai man iangoia n aron anne mai mwaina, ma e taraa n eti irou!

Anthony: Ao anne bukina riki teuana ngkai a kabatiaa kamanenaan oin aran te Atua Ana Tia Kakoaua Iehova. Ti kani buokiia aomata bwa a na karikirakea onimakinan Iehova ae te Atua bwa kaanga te Aomata ni koaua are a kona ni kaania. N te tai naba anne, ti kaatuua riki mwiokoan Iesu ibukini kamaiuara. Tao ti kona ni wareka te kibu riki teuana ae kamataataa raoi te reirei aei.

Tim: Ngaia.

Anthony: Mai mwaina ao ti wareka Ioane 14:6. Uringa ana taeka Iesu ae boni ngaia “te kawai ao te koaua ao te maiu.” Ti na okiri kiibu tabeua akana i etan aei ao nori ana taeka n Ioane 14:1. Taiaoka ma ko kona ni wareka ana taeka Iesu ni kabanean te kibu anne?

Tim: Ngaia. E kangai: “Onimakina te Atua ao onimakinai naba.”

Anthony: Ko rabwa. Ko na taekinna ngkanne bwa te onimaki ni koaua boni bwaai aika uoua ke tii teuana? Bon te titiraki ibukin onimakinan Iesu ni kaitaraa onimakinan Iehova?

Tim: Tiaki ngaia anne. E taku Iesu bwa ti kainnanoi ni kauoua.

Anthony: Eti anne. Ao I kakoauaa bwa ko boraoi n iango ma ngai bwa e aki tau tii taekinan ae ti onimakina te Atua ao Iesu. Ni koauana, ti riai ni kaboraoa maiura n te aro are e a kaotaki iai bwa ti onimakinia ni kauoman.

Tim: Boni ngaia raoi anne.

Anthony: Ma e na kanga temanna ni kaotiotia bwa e onimakina raoi te Atua ao Iesu? Tao ti kona ni maroroakina te titiraki anne n te tai teuana.a

Tim: I kukurei n anne.