KAONGORA IBUKIN TE REIREI

N te kaongora aei ao e kamatoaaki n taekinaki ae e bon Uea Iehova n taai nako ao e na kaotiotaki naba arona ni kamataataa ueana ibukia ana karikibwai i karawa ao i aon te aba. E kaungaira naba bwa ti na kakairi n aia katoto te koraki rimoa ake a motinnanoia bwa a na taromauria Iehova ae te Uea ae akea tokina.

N te kaongora aei ao e a kakorakoraa riki ara kakaitau ibukin te bwai are e a tia ni kakororaoia te Tautaeka n Uea iroun te Mesia i nanon ana moan ririki aika 100 maanna. A kaungaaki nanora n tatabemanira nako bwa ti na riki bwa ana toro aika kakaonimaki ni koaua i aan te Tautaeka n Uea aei ao ni kaumakaki bwa ti na iaiangoa raoi nanon ara kibu ibukin te ririki 2014.

Tera ae I riai ni karaoia ni maiu? Aio te titiraki ae rangi ni kakawaki nakon temanna ma temanna are e a tia ni katabua maiuna nakon Iehova. Ni kaongora aikai, ti na maroroakini booto n reirei ake a na kairia Kristian aika rooro n rikirake ake a beku ma nanoia ni kabane ibukin te Atua, n ikotaki naba ma aia aanga tabeua Kristian ake a a ikawai riki ni karababaa nako aia mwakuri ni minita.

Ni boong aikai, a bati aomata ake a katikakinako ni waakin te aonnaba ke a uaiakini baike a bon tangiri. E kaotaki n te kaongora aei aanga aika tenua aika bwaai ni kakoaua ake a na buokiia Kristian n onimakina ae e na waekoa ni kamauna te waaki ae buakaka aei Ana Tautaeka n Uea te Atua.