Tai Karikirakea ‘Ngurenguren Nanom Nakon Iehova’
“E katekebuaka te aomata arona n nanobaba; Ao ngkanne e ngurengure nanona nakon Iehova.”—TAEKA N RABAKAU 19:3.
1, 2. E aera ngkai ti aki riai ni bukina Iehova n aia kangaanga aomata? Kabwarabwaraa.
TI NA iangoia bwa aongkoa te mwaane ngkoe ae ko a tia n tekateka n taanga ma te kukurei i nanon ririki aika bati. Ma n te tai teuana ngke ko a okira mwengam, ko a kunea bwa a mangaongao bwain nanon am auti ni kabane. A uruaki bwain nanona, a tabwenaua bwainnamwarake ao e raeraeaki te taaera. E a riki mwengam are ko rangi n tararuaia raoi bwa te tabo ae rangi ni mangaongao. Ko na taetae ma marakin nanom ni kangai: “E aera ngkai e karaoa aei buu?” Ke ko na bae n titiraki moa ni kangai: “Antai ae karaoa aei?” Akea te nanououa bwa e na waekoa n rio moa n am iango te kauoua n titiraki. Bukin tera? Ibukina bwa ko ataia ae e aki kona buum ae ko tangiria ni karaoa te aeka ni mwakuri n iowawa anne.
2 N ara bong aikai, ti nora te aonnaba bwa e rotakibuaka. E a baareka te ea, te tano ao te ran. A iowawa aomata ao a babakanikawai. Ngkai taan reirei ngaira n te Baibara, ti ataia bwa e bon aki kona Iehova ni karikii kangaanga aikai ni kabane. E a tia ni karaoa te buraneti aei bwa te bwaretaiti ae kakukurei. (Karikani Bwaai 2:8, 15) Bon te Atua n tangira Iehova. (1 Ioane 4:8) Ti buokaki man ara ukeuke n reirei n te Baibara bwa ti na ataa raoi bukin rikini kangaanga aika rangi ni bati n te aonnaba. Bon akea riki ae karikii kangaanga aikai bwa bon Tatan te Riaboro are “te tia tautaekania kaain te aonnaba.”—Ioane 14:30; 2 I-Korinto 4:4.
3. E na kanga ni mwamwanaaki ara iango?
3 E ngae n anne, ti aki riai ni bukina Tatan n rawawatara ni kabane. Bukin tera? Ibukina bwa a riki tabeua ara kangaanga man ara kairua. (Wareka Te Tua-Kaua 32:4-6.) E ngae ngke tao ti kakoauaa anne, ma ibukina bwa ti aki kororaoi, a a kona ni moanna ni kairua ara iango ni kaineti ma ara kangaanga are a kairira nakon te kabuanibwai. (Taeka N Rabakau 14:12) N te aro raa? N oneani mwin are ti na bukinira ke ni bukina Tatan ibukin te kangaanga, ti a kona ni bukina iai Iehova. Ti a kona ni karikirakea ‘ngurenguren nanora nakon Iehova.’—Taeka N Rabakau 19:3, BG.
4, 5. E na kanga te Kristian ni karikirakea ‘ngurenguren nanona nakon Iehova?’
4 E koaua ae ti kona ni karikirakea ‘ngurenguren nanora nakon Iehova’? Ni koauana, bon akea uaara ngkana ti karaoa anne. (Itaia 41:11) Ma tera ae ti kantaningaia bwa e na reke? E taekinna ngkoa te tia kario temanna ni kangai: “Ko bon aki kona n orea te Atua bwa a kimototo baim.” Ngaia are ti aki riai ni kaota ngurengurera nakon Iehova. Ma e taekinaki n Taeka N Rabakau 19:3, (BG) bwa aron te aomata n nanobaba ‘e a katekebuaka iai ao ngkanne e a ngurengure nanona nakon Iehova.’ Eng, e kona te aomata ni karikirakea ngurenguren nanona nakon te Atua. E kona ni kaotiotaki te aeka n aroaro aei n aaro aika raba. E kona temanna ni karaoa anne, kaanga ai aron ae e kaikoa unna nakon Iehova. Ao ibukin anne, e a kona ni kerikaaki man te ekaretia ke n aki kani boutokai babaire nako ibukin taromaurian Iehova.
5 Tera ae kona ni kairira bwa ti na karikirakea ‘ngurenguren nanora nakon Iehova’? Ti na kanga n rarawa nakon te bwai ni kamwane anne? E rangi ni kakawaki bwa ti na atai kaekaan titiraki aikai. Eng, e irekereke iai ara iraorao ma te Atua ae Iehova!
TERA AE KONA NI KARIKIRAKEA ‘NGURENGUREN NANORA NAKON IEHOVA’?
6, 7. Bukin tera ngke a moana ngurengureia nakon Iehova tibun Iteraera ake n ana tai Mote?
6 Tera are e kona ni kaira nanon ana toro Iehova ae kakaonimaki bwa e na moanna ni ngurengure ibukin Atuana? Ti na rinanoi baika nimaua ao n neneri katoto man te Baibara ake a katuruturuaki iai aroia tabeman ni bwaka n te bwai ni kamwane aei n taai ake rimoa.—1 I-Korinto 10:11, 12.
7 Ti kona n iraraang n aia taetaenikawai aomata aika bubuaka. (Wareka Te Tua-Kaua 1:26-28.) A a tibwa tia ni kainaomataaki tibun Iteraera man te tautoronaki i Aikubita. E a tia ni karokoi rekenikai aika tebwina Iehova n te aro ni kakai i aon te natannaomata ae karitei anne ao imwina e a kamauna Barao ma ana taanga ni buaka n Taari ae Uraura. (Te Otinako 12:29-32, 51; 14:29-31; Taian Areru 136:15) A a tauraoi n te tai anne ana aomata te Atua n rin n te Aba ni Berita. Ma e ngae n anne, a moana ngurengureia nakon Iehova tibun Iteraera n te tai ane kakawaki anne. Tera ae e karika mamaaran aia onimaki? E kerikaaki ungan nanoia man te rongorongo ae aki raoiroi mairouia tabeman tibwaai ake a kanakoaki bwa a na tuoa te aba. (Warekaia Iteraera14:1-4) Tera mwina? A aikoa kariaiakaki te natannaomata anne ni kabane bwa a na rin n te “aba are raoiroi.” (Te Tua-Kaua 1:34, 35, BG) E kona ni kamamaraaki ara onimaki n taai tabetai ni butimwaean taeka ni kabwaranano mairouia tabeman ao ni kairira bwa ti na ngurengure ni baike e karaoi Iehova ibukira?
8. Tera te bwai are e kairiia ana aomata te Atua n ana tai Itaia bwa a na moanna ni bukina Iehova n aia kangaanga?
8 Karawawata ao kangaanga ake ti kona ni bwarannano iai. (Wareka Itaia 8:21, 22, BG.) N ana tai Itaia ao a rinanoni kangaanga aika korakora te botannaomata are Iuta. A otabwaniniaki irouia taani kairiribai. E karako te amwarake. A bati ake a bora ni baki. Ma ae kakaiaki riki, a a rotaki n te rongo ibukin te kan ongora n ana taeka te Atua. (Amota 8:11) N oneani mwin are a na onimakina Iehova ibukini buokaia ni kaaitarai karawawata aikai, a moanna ni “karereanti” nakon aia uea ao Atuaia. Eng, a a boni bukina Iehova n aia kangaanga. Ngkana ti taonaki n te kabuanibwai ke n oin ara kangaanga, ti kona ni kakairi n aroia nakanne ao ni kangai i nanora: ‘E mena ia Iehova n te tai are I kainnanoia iai?’
9. E aera ngke a karikirakea te iango ae kairua tibun Iteraera ake n ana tai Etekiera?
9 A aki tabwanin raoi rongorongo iroura. Ibukina bwa e aki tabwanin raoi te rongorongo irouia tibun Iteraera n ana tai Etekiera, a a namakinna bwa a “bon aki eti ana babaire” Iehova. (Etekiera 18:29, BK) Titeboo ma a boni karikiia bwa taani motikitaeka ibukin te Atua, n aroia ni katei oin aia kaetieti ibukin te kaetitaeka are a a riaon iai ana motikitaeka Iehova ao ni motika taekana man otaia ae aki tabwanin raoi ni baike a riki. Ngkana ti aki ota raoi n te rongorongo man te Baibara ke aroni baika riki ni maiura, e riai bwa ti na iangoia bwa a “bon aki eti ana babaire” Iehova ao n ribuaka?—Iobi 35:2.
10. E na kanga temanna ni kakairi n ana katoto Atam ae kairua?
10 Ti bukinia tabeman n oin ara bure ao ara kairua. Ni moani karikaia aomata, ao e bukinaki te Atua iroun Atam ibukin oin ana bure. (Karikani Bwaai 3:12) E ngae ngke bon nanon Atam ao e bon ataia raoi bwa iai tuuaana ngkana e urua ana tua te Atua, ma e boni bukina naba iai Iehova. Ao n te aro anne, e taekinna bwa e a tia Iehova n anganna buuna ae buakaka. Man te tai anne ni karokoa ngkai, a a tia tabeman ni kakairi n ana katoto Atam ni bukina te Atua ibukin aia kairua. Ti wanawana ngkana ti titirakinira ni kangai: ‘E kona bwaran nanou ao uringaabau n au kairua ni kairai bwa N na aki kukurei n ana kaetieti Iehova?’
11. Tera reireiara mairoun Iona?
11 Ti karikirakea tabeakinan oin nanora. Iai ana kangaanga te burabeti are Iona ni kaineti ma ana nanoanga Iehova ibukin Ninewe. (Iona 4:1-3) Bukin tera? E taraa n ae e karikirakea kaatuuan iangoan are e na karako karineana ngkana e tataekina kamaunaan Ninewe ao e aki roko n te koro bukina. E kariaia Iona bwa e na tabeaianga ibukin taekana bwa e na taonakinako ana nanoanga are e riai n namakinna ibukin rairan nanoia kaain Ninewe. Ti kona naba ngaira ni karikirakea tabeakinan oin nanora n te aro are e a rikirake ‘ngurenguren nanora nakon Iehova’ ngkai e aki waekoa ni karokoa te toki? Ngkana ti a tia n uarongorongo i nanon ririki aika rangi ni bati ibukin ana bong Iehova ae e a kaan roko, ti kona ni moana karikirakean te taotaonakinnano nakon Iehova ngkana a kakanikoira aomata ibukin tataekinan te baere e taekinaki n te Baibara?—2 Betero 3:3, 4, 9.
ARORA N RARAWA NI KARIKIRAKEA ‘NGURENGURERA NAKON IEHOVA’
12, 13. Tera ae ti riai n ururingnga ngkana ti a moanna n nanououa ibukin ana mwakuri Iehova tabeua?
12 Tera ae ti na karaoia ibukin aki kororaoin nanora ngkana ti a moanna n nanououa ibukin ana mwakuri tabeua Iehova? Uringnga are bon te nanobaba karaoan anne. E rairaki riki anne n Taeka N Rabakau 19:3 ni kangai: “E kaburea arona te aomata i bukin nanobabana, ao e bukina Iawe iai.” (Te Baibara ni Katorika) N iaiangoan anne, ti na rinanoi baika nimaua ake a na buokira bwa ti na aki kariaia uringaabara ni baika riki ni maiura ni bukina iai Iehova.
13 Tai kakeaa bongan am iraorao ma Iehova. Ti kona n rarawa ni karikirakea ngurengurera nakon te Atua ibukin aki kororaoira ngkana ti kateimatoa te iraorao ae kaan ma ngaia. (Wareka Taeka N Rabakau 3:5, 6.) Ti riai n onimakina Iehova. Ti riai naba n rarawa ni karikirakea te kani wanawana n oini matara ke n tabeakin oin nanora. (Taeka N Rabakau 3:7; Te Minita 7:16) Ni karaoan anne, e na kerikaaki riki iai bukinan Iehova iroura ngkana a riki baika bubuaka.
14, 15. Tera ae na buokira bwa ti na aki rotakibuaka n aia taetaenikawai aika bubuaka aomata?
14 Tai kariaia taetaenikawai aika bubuaka bwa a na rotiko. Iai bukina aika bati ngkai a kakoauaa tibun Iteraera n ana bong Mote bwa e boni kona Iehova ni kairiia nakon te Aba ni Berita. (Taian Areru 78:43-53) Ma ngke a ongo te ribooti ae aki raoiroi mairouia tibwaai ake tengaun aika aki kakaonimaki, a bon aki roko n te “uringa korakorana.” (Taian Areru 78:42, BK) Ngkana ti kananoi ara iango n ana mwakuri nako Iehova, n ururingi baike a raraoi ni kabane ake e a tia ni karaoi ibukira, e na kakorakoraaki iai ara iraorao ma ngaia. Ao ni karaoan anne, ti na aki kariaia aia iango aomata aika bubuaka bwa a na karaurenakoira ma Iehova.—Taian Areru 77:11, 12.
15 Ma tera arora ngkana ti karaoi aroarora aika bubuaka nakoia raora n taromauri? E kona n rotakibuaka ara iraorao ma Iehova n aaro akanne. (1 Ioane 4:20) Ngke a nanououa tibun Iteraera ibukin rinean ao mwiokoan Aaron, e taraa Iehova te aroaro anne bwa te ngurengure nakoina. (Warekaia Iteraera 17:10) Ai arora naba ngkana ti moanna ni ngurengure ao ni bwangantaeka ibukia ake a rineaki iroun Iehova bwa a na kaira ana botaki i aon te aba, ti kona n iangoia bwa ti a ngurengure nakon Iehova.—I-Ebera 13:7, 17.
16, 17. Tera ae ti riai n ururingnga ngkana iai ara kangaanga?
16 Uringnga bwa e aki karikii ara kangaanga Iehova. E ngae ngke a tia n tannako mairoun Iehova tibun Iteraera n ana bong Itaia, ma E bon teimatoa naba kani buokiia. (Itaia 1:16-19) N aki ongeia bwa tera te kangaanga ae ti kaitaraa, ti kona ni kabebeteaki n ataan ae e bon tabeakinira Iehova ao e kani buokira. (1 Betero 5:7) Ni koauana, e berita nakoira bwa e na anganira te korakora are ti kainnanoia bwa ti na teimatoa iai n nanomwaaka.—1 I-Korinto 10:13.
17 Ngkana ti karawawataaki n aeka ni kaetitaeka aika aki riai n aron are e rinanona te aomata are kakaonimaki ae Iobi, ti riai n ururingnga bwa e aki karikii mwakuri n ribuaka Iehova. E ribaa te kaetitaeka ae aki riai ao e tangira te raoiroi. (Taian Areru 33:5) Ti bia katotonga aroaron raoraon Iobi are Eriu ngke e kangai: “E aki kona ni ioawa te Atua, e aki kona ni babakanikawai.” (Iobi 34:10, BK) N oneani mwin ae ti na karikii ara kangaanga, e anganira Iehova “bwaai n tituaraoi aika raraoi ma bwaintangira aika kororaoi [ni kabane].”—Iakobo 1:13, 17.
18, 19. Bukin tera bwa ti riai n aki nanououa iroun Iehova? Kabwarabwaraa.
18 Tai nanououa iroun Iehova. E kororaoi te Atua ao a rietata riki ana iango nakoira. (Itaia 55:8, 9) Ngaia are ti buokaki man te nanorinano ao te nimamannei bwa ti na kakoauaa iai tianakin ara atatai. (I-Rom 9:20) E burenibwai n tabwanin raoi iroura rongorongo ni kaineti ma rikin te bwai teuana. Akea te nanououa bwa ko a tia n nora koauan te taeka n rabakau aei: “E na bae n eti ane e moani kaota ana kangaanga, ni karokoa rokon temanna riki ni keerake ao n titirakinna.”—Taeka N Rabakau 18:17, New International Version.
19 Ngkana iai raoraora ae ti onimakinna are karaoa te bwai teuana ae ti kona n aki oota iai n te moantai ke ti kona n iangoia bwa e burenibwai n riki, ti na waekoa ni bukinna bwa e a tia ni karaoa ae kairua? Ke ti na aki nanououa iroun raoraora anne, moarara riki ngkana ti rangi ni kinaa i nanon ririki aika bati? Ngkana ti karaoa te mwakuri n tangira nakoia raoraora aika aki kororaoi, ai batira riki ngkanne riaira n onimakina Tamara are i karawa ae a rietata riki kawaina ma ana iango nakoira!
20, 21. E aera ngkai e kakawaki bwa ti na aki bukina temanna?
20 Tai bukina temanna. E aera ngkai ti riai ni karaoa anne? Ni koauana, boni ngaira aika ti karikii ara kangaanga tabeua. Ngkana ngaia anne, ti riai ni kakoauaa te iango anne. (I-Karatia 6:7) Tai kataia ni bukina Iehova ibukini kangaanga. Bukin tera ngkai e aki raoiroi anne? Iangoa te katoto aei: E kona te kaa n rangi ni butimwaaka. Iangoia bwa e rangi n riaon te buti ae riai te turaiua ngke e a roko n te kawai ae e karina naba ni kabwao ao e a kurati naba. E riai ni bukinaki te tia karao kaa n te kabuanibwai? E bon aki! N aron naba anne, e a tia Iehova ni karikira ma te inaomata n rinea ae ti na karaoia. Ma e katauraoi naba kaetieti ibukin arora ni karaoi ara motinnano ma te wanawana. Ngaia are e aera ngkai ti na bukina ara tia Karikiriki n ara kairua?
21 Ni koauana, a aki riki ara kangaanga ni kabane man ara kairua ao ara mwakuri aika bure. A riki bwaai tabeua ibukina bwa “a tii roko naba aia bong ma aroia aika aki ataaki.” (Te Minita 9:11, BG) N tokina, ti riai n aki mwaninga te koaua are bon Tatan te Riaboro ae karika te buakaka. (1 Ioane 5:19; Te Kaotioti 12:9) Boni ngaia te tia kairiribai ao tiaki Iehova!—1 Betero 5:8.
KAWAKINA AM IRAORAO AE RANGI NI KAKAWAKI MA IEHOVA
22, 23. Tera ae ti riai n ururingnga ngkana ti rotaki n te bwarannano ibukin ara kangaanga?
22 Ngkana ko rinanoni kangaanga ke karawawata aika bati, uringi aia katoto Iotua ao Kareba. A kaokoro aroia tibwaai ake tengaun ma mwaane aika uoman aika kakaonimaki aikai ake a oki rikaaki ma te ribooti ae raoiroi. (Warekaia Iteraera 14:6-9) A kaota onimakinan Iehova. E ngae n anne, a a tiotionako n te rereua i nanon 40 te ririki n ikotaki ma nikiraia tibun Iteraera. A ngurengure Iotua ao Kareba ke a rangi n un n iangoan ae e aki eti karaoan aei? A aki. A bon onimakina Iehova. A kakabwaiaaki? Eng! A boni bane ni mate te botannaomata arei n te rereua ma a maiu mwaane aika uoman aikai ao n tokina a a rin n te Aba ni Berita. (Warekaia Iteraera 14:30) N aron naba anne, ti na kakabwaiaaki iroun Iehova ngkana a “aki bwara nanora” ni kakaraoa nanona.—I-Karatia 6:9; I-Ebera 6:10.
23 Tera ae ko riai ni karaoia ngkana e bwara nanom ibukini kangaanga, aki kororaoia tabeman ke boni ngkoe? Kaatuui iaiangoan aroaron Iehova aika rangi n tamaroa. Kataamneia te kantaninga are e a tia Iehova n anganiko. Titirakiniko ni kangai: ‘N na mena ia ngkana e aki buokai Iehova?’ Teimatoa ni kaania n taai nako ao tai kariaia bwa ko na karikirakea ngurenguren nanom nakoina!