Boni Nnera Ni Maeka Iehova

1, 2. Tera aia namakin ana toro te Atua n te waaki ae ngkai i aon te aba, ao tera aia tabo ni maeka?

KO NAMAKINNA bwa ko kamanoaki ao ni mwengaraoi n te waaki ae ngkai i aon te aba? Ngkana ko aki, titeboo naba am namakin ma ana toro Iehova ake tabeman! Inanon ririki aika bati, a bane n tia n namakinna aika tangira Iehova ma nanoia ni koaua, bwa kaanga iruwa ke ianena ngaiia n te waaki ae ngkai i aon te aba. N te katoto, ngke a mwaing taan taromauria te Atua ake a kakaonimaki man te kaembwa teuana ma teuana i Kanaan, a a “kaotiotiia i mataia aomata bwa ianena ngaiia, ao taani maeka n iruwa n te aba are a maeka iai.”​—I-Ebera 11:13.

² N aron anne, a iangoiia naba taan rimwini Kristo aika kabiraki ake “boni kaaini karawa” bwa ‘iruwa ao taani maeka n iruwa’ n te waaki ae ngkai i aon te aba. (I-Biribi 3:20; 1 Betero 2:11) A ‘aki arona aroia kaain te aonnaba n aron Iesu ae e aki arona aroia kaain te aonnaba’ ana “tiibu tabemwaang” Kristo. (Ioane 10:16; 17:16) Ma e ngae n anne, bon iai aia “tabo ni maeka” ana aomata te Atua. Tiaki te tabo ni maeka ae ti kona n noria, ma bon te tabo ni maeka ae te kabanea ni mano raoi ao ni korakora tangirara iai. E korea ae kangai Mote: “Te Uea, boni nera ni maeka Ngkoe n rooro nako ni bane.”a (Taian Areru 90:​1, BG) E kanga Iehova ni kaota koauan ae ‘boni ngaia nneia ni maeka’ ana toro ake a kakaonimaki rimoa? E kanga Iehova n riki bwa ‘nneia ni maeka’ ana aomata ni boong aikai? Ao e na kanga ni kaota koauan ae bon tii ngaia te nne ni maeka ae mano raoi n taai aika imwaira?

IEHOVA​—‘BONI NNEIA NI MAEKA’ ANA TORO RIMOA

3. E kabotauaki Iehova ma tera n Taian Areru 90:​1, ao bukin tera?

³ N tabetai, e kabotauaki Iehova n te Baibara ma baika ti kona n nori bwa ti aonga ni kona n ota raoi n anuana. N te katoto, e kabotauaki Iehova n Taian Areru 90:1 ma te “nne ni maeka,” ke te tabo ni maeka. Ngkana ti iangoa te tabo ni maeka, ti a iangoa ngkanne te tabo ae kaotiotaki iai te tangira, te rau ao te kamanomano. Bukin tera bwa e kabotauaki Iehova ma te tabo ni maeka? E taekinaki Iehova n te Baibara bwa bon te tangira. (1 Ioane 4:8) Bon Atuan naba te raoi are e ‘kamaekaia raoi’ ana toro aika kakaonimaki. (Taian Areru 4:​8, BG) N te katoto, ti na rinanon arona n riki bwa te tabo ni maeka ibukia baatua ake a kakaonimaki, ao ti na moanna mairoun Aberaam.

4, 5. E kanga te Atua ni kaota koauan ae ‘bon te nne ni maeka” ngaia ibukin Aberaam?

⁴ E bae ni mimi Aberaam ngke e tuangnga Iehova ni kangai: “Naako mai abam, ao mairouia am bu . . . nakon te aba ae N na kaotia nako im.” Ngkana arona bwa iai raraoman Aberaam, akea te nanououa bwa e karauaki nanona n ana taeka Iehova ake imwina riki aikai: “N na karaoiko ba te botanaomata ae ababaki, ao N na kakabaiako, ao N na kakanatoa aram . . . ao N na kakabaiaiia akana taetae ni kakabaiako, ao N na karekea kain ane karereantiko.”​—Karikani Bwaai 12:​1-3, BG.

⁵ E berita Iehova bwa e na kakabwaiaa ao ni kamanoa Aberaam ma kanoana ao e boni kakoroa bukin anne. (Karikani Bwaai 26:​1-6) N te katoto, e tuka te Barao mai Aikubita ao Ueani Kera are Abimereka man tiringan Aberaam ao anaakini buuna are Tara. E kamanoa naba Itaaka ma Rebeka n te aro anne. (Karikani Bwaai 12:​14-20; 20:​1-14; 26:​6-11) Ti wareka ae kangai: “E tuki bainikirinakiia iroun te aomata [Iehova]; Ao E boaiia uea i bukiia; Ao E kangai, Tai ringia au aomata aika kabiraki, Ao tai tabareia au burabeti.”​—Taian Areru 105:​14, 15, BG.

6. Tera are e tuangaki Iakoba bwa e na karaoia iroun Itaaka, ao tao tera ana namakin Iakoba?

⁶ E nanonaki naba tibun Aberaam are Iakoba i buakoia burabeti akanne. Ngke e a roko ana tai Iakoba ni karekea buuna, e taku tamana are Itaaka nakoina: “Ko na tai karekea bum mai buakoia aineni Kanaan. Tei rake, nako Batan-aram, nakon ana auti Betuera are taman tinam, ao karekea bum mai iai mai buakoia natin Raban.” (Karikani Bwaai 28:​1, 2, BG) E waekoa Iakoba ni karaoa are e tuangnga tamana. E kitania ana utu ni kaan i Kanaan ake e kamanoaki i buakoia ao ni mwananga n tii ngaia n te raroa ae bubua ma bubua te maire nakon te tabo ae Aran. (Karikani Bwaai 28:10) E bae n iango ni kangai: ‘A na maanra ngai ni kitania au utu? E na kukurei ai tamau ngkana I roko irouna ao n anganai buu ae mamaaka te Atua?’ Ngkana e raraomaeakin baikanne Iakoba, akea te nanououa bwa e karauaki nanona ngke e a roko i Ruti ae tao 100 te kiromita raroana mai Beera-teba. Tera are riki i Ruti?

7. E kanga te Atua ni karaua nanon Iakoba rinanon te mii?

⁷ E kaoti Iehova rinanon te mii nakon Iakoba i Ruti ao e taku: “Noria, I memena i roum, ao N na kawakiniko n taabo nako akana ko na nako iai, ao N na manga kairiko nakon te aba aei; ao N na aki kitaniko ngkai I tuai ni karaoa ae I a tia n tuangko taekana.” (Karikani Bwaai 28:​15, BG) Ai kabebetera ma ni karaunano taeka aika irianaki ma te akoi akanne nakon Iakoba! Ko kona ni kataamneia n am iango mwanangana ma te ingainga ni kan nora aron te Atua ni kakoroi bukin Ana taeka? Ngkana ko a tia ni kitana abam tao ni beku n te aba teuana, ko bae n raraoma naba n aron Iakoba. Ma akea te nanououa bwa ko a tia n nori bwaai ni kakoaua ake a kaotaki iai bwa e tabeakiniko Iehova.

8, 9. N aaro raa are e kaotia iai Iehova bwa boni ngaia ‘te nne ni maeka’ ibukin Iakoba, ao tera reireiara iai?

⁸ Ngke e a roko Iakoba i Aran, e a butimwaeia ai tamana ma te akoi ao imwina e anganna Rea ao Rakera bwa buuna. Ma imwin tabeua te tai, e a manga moanna n ribuaka Raban nakon Iakoba bwa tebwina ana tai n oniki boon ana mwakuri! (Karikani Bwaai 31:​41, 42) Ma e ngae n anne, e nanomwaaka Iakoba i aan aaro n ribuaka aikai bwa e onimakina Iehova bwa e na teimatoa n tabeakinna ao bon anne are E karaoia! Ni koauana, n te tai are e tua iai te Atua nakon Iakoba bwa e na okira Kanaan, a a tia n reke irouna “nanai aika ababaki, ma tooro aine ma tooro mwane, ma kamero ma aati.” (Karikani Bwaai 30:​43, BG) E rangi ni kaitaua Iehova Iakoba ao e tataro ni kangai: “I aki riai n anganaki am akoi teuana ae moan te uarereke ma am koaua teuana mai buakon aika Ko kaoti nakon am toro; ba I ri nanon Ioretan aei rimoa ma okou; ao I riki n ua koraki ngkai.”​—Karikani Bwaai 32:​10, BG.

⁹ A kaotaki ni katoto aikai koauan raoi ana taeka Mote aei: “Te Uea, boni nera ni maeka Ngkoe n rooro nako ni bane”! (Taian Areru 90:​1, BG) Bon anne naba ae riki ni boong aikai ibukina bwa e teimatoa Iehova are “e aki bibitaki n ai aron te nuu ae kai mwainging,” n riki bwa te nne ni maeka ae mano raoi ibukia ana toro aika kakaonimaki. (Iakobo 1:17) Ti na noria bwa n te aro raa.

‘BONI NNERA NI MAEKA’ IEHOVA NI BOONG AIKAI

10. E aera ngkai ti kona ni koaua raoi bwa e teimatoa n riki Iehova bwa te nne ni maeka ae mano raoi ibukia ana toro?

¹⁰ Iangoa aei: Aongkoa ko a riki bwa te tia kakoaua n te kaboowi ni kaitaraa te mwaane ae rangi ni wanawana ao ni korakora. Bon te tia kewe ae iowawa ao te tia tiritiri ao a bane aomata n te aonnaba ni mwakuri ibukina. Tera am namakin ngkana ko a otinako man te tabo ni kaboowi ngke e a bwara? Ko namakinna bwa ko mano raoi? Ko na bon aki! Ni koauana, iai bukina ae riai bwa ko na bubutii kamanoam. E boni kaikonakaki n te rongorongo aei aroia ana toro Iehova aika ninikoria n riki bwa taani kakoaua ibukina, ao n aki maaku ni kaotaraea teuare karoton te riribai ae Tatan! (Wareka Te Kaotioti 12:17.) Ma e koaua bwa e kona Tatan ni kaini wia ana aomata te Atua? E bon aki! Ni koauana, ti teimatoa n tataekina te rongorongo ae raoiroi nakoia aomata aika bati ni kabutaa te aonnaba. E kanga ni kona n riki aei? Bon tii teuana te anga ae kona ni kabwarabwaraaki iai ni kangai: ‘Boni nnera ni maeka’ Iehova. E kamanoia ao ni kakabwaiaia ana aomata ai moarara riki ni kabaneani boong aikai. (Wareka Itaia 54:​14, 17.) Ma e kona n teimatoa n riki Iehova bwa ‘nnera ni maeka’ ae mano raoi, ngkana ti aki kariaia Tatan bwa e na mwamwanaira.

11. Tera reireiara mairouia baatua akanne?

¹¹ Ti na karekea reireiara riki teuana mairouia baatua aika Aberaam, Itaaka ao Iakoba. E ngae ngke a maeka n te aba ae Kanaan, ma a teimatoa ni kaokoroia ma kaain te aba ake a ribai aroaroia bwa a kammaira ao ni bubuaka. (Karikani Bwaai 27:46) A aikoa kainnanoi tuua aika bati ibukin ataan ae eti ma ae bure. A bon atai baika e tangiri ao n ribai Iehova. Ibukina bwa boni ngaia nneia ni maeka, a a karaoi aia kabanea ni kona n aki arona aroia kaain te aonnaba. Ai raoiroira te katoto aei ibukira! Ko kakorakorako ni katotongia baatua aika kakaonimaki aikai n rineaia raoraom ao am kaakibotu? E kananokawaki bwa n itera tabeua, iai tabeman n te ekaretia aika a namakinna bwa a kamanoaki ao ni mwengaraoi n ana aonnaba Tatan. E ngae naba ngkana iai teutana namakinan anne iroum, tataroakinna. Uringnga bwa bon ana aonnaba aei Tatan ao e bangaomata ma n aki tabeakinira.​—2 I-Korinto 4:4; I-Ebeto 2:​1, 2.

12. (a) E kanga Iehova ni katauraoi bwaai n ibuobuoki ibukin aia onimaki kaain ana utu n taamnei? (b) Tera am namakin ni kaineti ma bwaai n ibuobuoki aikai?

¹² Ngkana ti na rarawa nakon ana kunemwaan Tatan, ti riai ni kamanenai raoi bwaai n ibuobuoki ibukin ara onimaki ake e a tia ni katauraoi Iehova ibukia kaain ana utu ake a onimakinna bwa nneia ni maeka. N te katoto, e anganira buokara rinanoni bobotaki ni Kristian, te taromauri n utu ao “mwaane ake a a riki bwa bwaai n tituaraoi,” aika taani kawakintiibu ake a rineaki iroun te Atua bwa a na anganira te kabebetenano ao ni boutokaira bwa ti aonga n nanomwaaka i aani kangaanga ni maiura. (I-Ebeto 4:​8-12) E korea ae kangai Brother George Gangas are kaain naba te Rabwata n Tautaeka i nanon ririki aika bati: “Ngkana I mena i buakoia [ana aomata te Atua] I namakinna bwa I kamanoaki ao ni mwengaraoi ma au utu n te bwaretaiti n taamnei.” Ko namakina naba anne?

13. Tera reireiara ae kakawaki man I-Ebera 11:13?

¹³ Teuana riki reireiara mairouia baatua akanne, bon arora n aki maaku ni kaokoroira ma aomata aika otabwaninira. N aron ae ti noria ni barakirabe 1, a boni “kaotiotiia i mataia aomata bwa ianena ngaiia, ao taani maeka n iruwa n te aba are a maeka iai.” (I-Ebera 11:13) Ko motinnanoia bwa ko na kaokoroko ma aomata n te aonnaba aei? Ni koauana, e kona ni kangaanga karaoan aei n tabetai. Ma ko kona n tokanikai man ana ibuobuoki te Atua ao aia boutoka raao ni Kristian. Uringnga bwa tiaki tii ngkoe ni karaoa aei. A buakana Tatan ao te aonnaba aei aomata nako aika a kani beku ibukin Iehova! (I-Ebeto 6:12) Ma ti kona n tokanikai n te buaka aei ngkana ti onimakina Iehova ao ni karikia bwa nnera ni maeka ae mano raoi.

14. Tera “te kaawa” are e kariariaa Aberaam?

¹⁴ Aio te bwai ae kakawaki naba: Katotonga Aberaam n arom n teimatoa n tataraa te kaniwanga. (2 I-Korinto 4:18) E korea taekan Aberaam te abotoro Bauro “bwa e kariariaa te kaawa ae iai aana ae matoatoa, ae te tia kateia te Atua ao te tia karaoia.” (I-Ebera 11:10) “Te kaawa” anne bon te Tautaeka n Uea iroun te Mesia. Ni koauana, e riai ni kariariaa “te kaawa” anne Aberaam ma ti aki riai ngaira ni kariariaa bwa e a tautaeka ngkai i karawa. Ao e kamatataaki n te taetae ni burabeti n te Baibara bwa e na waekoa n tautaekana te aonnaba. E koaua bwa e kaotaki n aroaroni maium bwa ko kakoauaa raoi te Tautaeka n Uea anne? Ko moanibwaia ao n teimatoa ni kaokoroko ma kaain te aonnaba aei?​—Wareka 2 Betero 3:​11, 12.

“BONI NERA NI MAEKA” NGKAI E A UAKAAN TE TOKI

15. Tera ae mena imwaia te koraki aika onimakina te waaki ae ngkai i aon te aba?

¹⁵ A na teimatoa ni kakaiaki riki “kangaanga” n te aonnaba aei, ngkai e a uakaan tokin ana waaki Tatan. (Mataio 24:​7, 8) Ao ngkana e a moanaki te rawawata ae korakora, e na rangi ni kangaanga riki iai aron te maiu. E na buta n te aonnaba te urubwai, minotakin aia iango aomata ao ni korakora maakuia. (Abakuka 3:​16, 17) Ibukin raraomaia ae moan te korakora aomata, a nang ukoukora kamanoaia “n taian nangananga ao n taiani bwaa ake ni maunga.” (Te Kaotioti 6:​15-17) Ma bon akea te nangananga ma botaki ni bitineti aika bubura ke te tautaeka ae kona ni kamanoia.

16. Tera arora ae riai n iaiangoa te ekaretia ni Kristian, ao bukin tera?

¹⁶ A na teimatoa ni mano raoi ana aomata Iehova ae te Atua bwa ‘boni nneia ni maeka’ ngaia. A na “kakatonga iroun Atuani [kamaiuaia].” (Abakuka 3:​18, BG) N aaro raa are e na kaota koauana iai Iehova bwa ‘bon te nne ni maeka’ ngaia n taai ni kangaanga? Ti na tataninga man noria. Ma ti kona ni kakoauaa bwa e na teimatoa Iehova ni baireia “te koraki ae uanao” ao n angania kaetieti n aron are e karaoia nakoia tibun Iteraera ake a kitana Aikubita n aia tai n Otinako. (Te Kaotioti 7:9; wareka Te Otinako 13:18.) E na kanga Iehova n anganira kaetieti aikai? E tuangira te bwai ae ti riai ni karaoia rinanon te ekaretia. E taetae ni burabetinaki taian ‘ruu aika raba’ ake a na kamanoaki iai ana aomata te Atua n Itaia 26:20. (Warekia.) E kona n nanonaki iai taian ekaretia ni katobibia te aonnaba. A rangi ni kakawaki iroum bobotaki n ekaretia? Ko waekoa ni karaoa nanon te kaetieti ae e anga Iehova rinanon te ekaretia?​—I-Ebera 13:17.

17. N te aro raa are e a riki iai Iehova bwa ‘boni nneia ni maeka’ ana toro aika kakaonimaki ake a a tia ni mate?

¹⁷ E na teimatoa n riki Iehova bwa ‘boni neia ni maeka’ aika kakaonimaki, e ngae naba ngkana tao a mate imwain te rawawata ae korakora. N te aro raa? E a boni maan imwini mateia baatua aika kakaonimaki, ao e taku Iehova nakoni Mote: “Bon Atuan . . . Aberaam, ao Atuan Itaaka, ao Atuan Iakoba [Ngai].” (Te Otinako 3:​6, BG) E reitia ni kangai Iesu imwini mwanewean taeka aikai: “Bon Atuaia aika maiu ao tiaki Atuaia aika mate, bwa n ana taratara te Atua, a bane ni maiu.” (Ruka 20:38) A na boni kautaki ana toro Iehova ake a kakaonimaki, bwa irouna titeboo ma a a kamani maiu.​—Te Minita 7:1.

18. E na kanga Iehova ni kaota koauan ae e na riki bwa ‘boni nneia ni maeka’ ana aomata n te aro ae kaokoro n te waaki ae boou i aon te aba?

¹⁸ E na riki Iehova bwa ‘boni nneia ni maeka’ ana aomata n te aro ae kaokoro n te waaki ae boou i aon te aba ae e a kaan roko. E taekinaki ae kangai n Te Kaotioti 21:3: “Noria! E a mena ana umwanrianna te Atua irouia aomata.” E na kamanenaaki Iesu Kristo iroun Iehova bwa e na tautaekana te aonnaba i nanon tenga n ririki. N tokin tenga n ririki, e na kaoka te Tautaeka n Uea Iesu nakon Iehova imwini kakororaoan ana kantaninga Tamana ibukin te aonnaba. (1 I-Korinto 15:28) Imwin anne, a nang aki kainnanoa Iesu bwa te tia raoi te botannaomata ae kororaoi, bwa e a boni memena Iehova irouia. Ai tamaroara te kantaninga ae mena imwaira aei! Ti bia kakorakoraira n te tai aei ni karokoa rokon te bong anne, ni katotongia ana toro rimoa te Atua ake a kakaonimaki, n te aro are ti a karika iai Iehova bwa “boni nera ni maeka.”