KAONGORA IBUKIN TE REIREI

KAONGORA IBUKIN TE REIREI

▪ Bwaina te Ninikoria Bwa E Memena Iehova Iroum!

A bati aomata ake a taekinaki n te Baibara bwa a kaotiota te onimaki ao te ninikoria. Ngkana ti neneri rongorongoia tabeua, ti na kakorakoraaki iai ni kaotiota te onimaki ao ni beku ibukin Iehova ma te ninikoria. E katuruturuaki n te kaongora aio ara kibu ibukin te ririki 2013.

▪ Tai Kariaia te Bwai Teuana Bwa E na Karaurenakoko ma Iehova

▪ Teimatoa ni Kaania Iehova

A rangi ni bati bwaai ni maiura aika ti aki kona n rinei n ikotaki naba ma ara karo, tarira, mwaanera ao ai te aba are ti bungiaki iai. E kaokoro arora ni kaania Iehova. Ti kona ni motinnanoia bwa ti na kaania ke ti na aki. A maroroakinaki ni kaongora aikai iterani maiura aika itiua aika ti na aki kariaia iai te bwai teuana bwa e na karaurenakoira ma Iehova.

▪ Te Beku n Aki Uringaaba Ibukin te Atua

Ti a bane n tia ni karaoi bwaai ake ti kona ni manga kani karaoi riki n te aro ae kakaokoro. Ma e ngae n anne, ti riai n aki kariaia aekan uringaaba akanne bwa a na kona n tuka ngkai ara beku ibukin te Atua. N te kaongora aio, ti na karekea reireiara man ana katoto te abotoro Bauro ni kaineti ma arora n teimatoa ni beku ibukin Iehova n aki uringaaba.

▪ Bon ‘Raao ni Mwakuri Ibukini Kimwareireira’ Unimwaane n te Ekaretia

N ana kauoua n reta Bauro nakoia I-Korinto, e kabwarabwaraa iai bwa bon ‘raao ni mwakuri ibukini kimwareireia,’ ngaia ma raona ake a rangi ni kaan ma ngaia. (2 I-Korinto 1:24) A na kanga ana taeka Bauro akanne n rotiia riki unimwaanen te ekaretia? Ao ti na kanga ngaira n tatabemanira nako ni karakaa riki te nanoni kimwareirei n te ekaretia? Ana rinanoaki kaekaan titiraki aikai n te kaongora aio.