Antai te Tia Ongoraei Tataro?

NGKANA iai te tia Ongoraei tataro, ni koauana ngkanne bon iai te tia Karikiriki. Antai riki irarikin Teuare e kona ni karaoa kaburoron te aomata ae e atai baika ko iaiangoi? Antai riki ae e kona ni kaekai aia tataro botannaomata ao n angania te ibuobuoki ae a kainnanoia? Ma ko kona n iango ni kangai: ‘E riai kakoauaan ae bon iai te tia Karikiriki?’

A bati ake a iangoia bwa ngkana ko kakoauaa ae iai te tia Karikiriki, ko bae ni kakewei bwaai ni kakoaua n te rabakau n aonnaba ni boong aikai. Ma e kairua te iango ae e aki boraoi kakoauaan te Atua ma te rabakau n aonnaba. Iangoi baikai:

◼ N te kakaae n taai aikai i buakoia taan rabakau n te rabakau n aonnaba ae te science, aika 1,646 mwaitiia ni kuura aika rietata aika 21 n te United States, ao e kuneaki bwa tii teuana te katenimwakoro mai buakoia ake a rinea ae kangai ni kabwarabwaraa aia iango: “I aki kakoauaa te Atua.”

E kakoauaaki n anne bwa a bati taan rabakau n te aonnaba ake a kakoauaa ae iai te Atua.

Bwaai ni Kakoaua Ibukin te Tia Karikiriki

Ti riai ni butimwaea te koaua ae iai te tia Ongoraei tataro ngkana akea bwaai ni kakoaua? Tiaki ngaia anne. E aki koaua te iango ae e reke te onimaki n taai nako man akeani bwaai ni kakoaua. E kabwarabwaraaki te onimaki n te Baibara bwa e “kaotii kakoauaani baika boni koaua, e ngae ngke a aki noraki.” (I-Ebera 11:1) E taekinaki n te rairai teuana bwa te onimaki bon “te aki nanokokoraki nakoni baika kaantaningaki, ae kakoauani baika aki noraki.” (TE BAIBARA) N te katoto, ko aki kona n nora te ang, ma ko kona n nori baani kaai aika mwainging n ukin te ang, ngaia are ko a kakoauaa bwa bon iai te ang. N aron anne, e ngae ngke ti aki kona n nora te tia Ongoraei tataro ma ngkana ti iaiangoi bwaai ni kakoaua ake ti nori, ti a kakoauaa iai bwa bon iai ngaia.

Ti na karekea ia te bwai ni kakoaua ae iai te Atua? Ti riai moa n tarai baika a otabwaninira. E kabwarabwaraaki n te Baibara ni kangai: “E koaua bwa a kateaki auti nako iroun te aomata, ma ane katei bwaai ni kabane bon te Atua.” (I-Ebera 3:4) E boraoi am iango ma anne? Tao ngkana ko karaua n iangoa aroni barongaan raoi te iuniweeti, moan rikin te aomata ke aroni karaoan ana kaburoro te aomata ae te bwai ae rangi ni kangaanga i buakoni baika karikaki n te aonnaba, ko a kona n iangoia bwa iai ae rangi n rietata riki nakoia aomata.a

Ma iai tian reireiara ibukin te Atua mani baika karikaki. Ibukin norakini bwaai ni kakoaua ni kaineti ma te Atua n te karikibwai, kaanga aron ae ko ongo kamwakaikain te aomata ae bakatetea te mataroa ae in. Ko ataia ae iai kaain tinaniku ma antai ngkanne? Ngkana ko kan ataia, ko riai ni kauka te mataroa. Ti riai ni karaoa naba anne ngkana ti kan ataa te Aomata ae kariki bwaai ni kabane.

Te Baibara boni mataroan te atatai ibukin te Atua. Ngkana ko kauka te mataroa anne ao n rinanoi taetae ni burabeti tabeua ake a kabwarabwaraaki iai ma kakoroani bukia, ko na boni kakoauaa ae iai te Atua.b Ma irarikini bwaai ni kakoaua akanne, iai rongorongon reitakin te Atua ma aomata ae kaotaki iai aroaron te tia Ongoraei tataro.

Tera Aroaron te Tia Ongoraei Tataro?

E taekinaki n te Baibara te tia Ongoraei Tataro bwa bon te aomata ae ko kona ni kinaa. Ni koauana, bon tii te aomata ae kona ni kakauongo ao n oota. E karaunano warekan ae kangai: “Ngkoe ae Ko ongo tataro, A na bane ni kawariko aomata.” (Taian Areru 65:​2, BG) E kakauongo nakoia te koraki aika a tataro ma te onimaki. Ao bon iai naba arana. E taekinaki ae kangai n te Baibara: “E raroa Iehova mairouia akana buakaka: Ma E ongo aia tataro akana raoiroi.”​​—Taeka N Rabakau 15:​29, BG.

Iai ana namakin Iehova. Bon “te Atua ae nibwan te tangira” ao e taekinaki naba bwa “te Atua ae kukukurei.” (2 I-Korinto 13:11; 1 Timoteo 1:​11) E taekinaki ae kangai n te Baibara ni kaineti ma ana namakin ngke e rangi ni korakora te buakaka: “E nanokawaki iai.” (Karikani Bwaai 6:​5, 6, BK) Bon te kairua te koaua are e karikii rawawata te Atua bwa kataakia aomata. E taekinaki ae kangai n te Baibara: “E bon raroa mairoun te Atua karaoan te buakaka.” (Iobi 34:​10, BG) E ngae n anne, ko bae n iango ni kangai: ‘Ngkana moan te mwaaka te Atua ae te tia Karikiriki, e aera ngkai e tuai ni katoka te rawawata?’

E angania botannaomata Iehova te konabwai ni kamanena inaomataia n rinea ae a na karaoia, ike ti a tuangaki iai aroaron te Atua. Tiaki ti bon riai ni kabonganai raoi inaomatara n rinea ae ti na karaoia ni maiura? E kananokawaki bwa a bati ake a aki kabonganai raoi inaomataia ao a a karikii rawawata nakoia ao nakoia naba tabemwaang. Aio te titiraki ae riai ni kaatuuaki iaiangoana: E na kanga te Atua ni kamauna te rawawata ngkai e aki taui inaomatara? Ti na nenera kaekaan te titiraki aio n te kaongora ae imwina.

[Kabwarabwara mai nano]

[Bwaoki n iteraniba 5]

Ko Nanououa Bwa Iai te Atua Ibukin Aia Mwakuri Aika Bubuaka Aaro?

E kananokawaki bwa bon te Aro ae karika nanououaia aomata aika bati, bwa iai te tia Ongoraei tataro ae mwamwannano ke akea. Ibukin irekerekeia Aaro ma te buaka, ao te tiritiri ao aki katabuani mwakuri n iowawa nakoia ataei, a a kairaki iai aomata ake a tatataro bwa a na kangai: “I aki kakoauaa ae iai te Atua.”

Bukin tera bwa a aki toki Aaro ni kairiri nakon te buakaka? Ni kauarerekeana: A karaoi mwakuri aika bubuaka aomata aika buakaka ni bukina iai te Aro. E a kaman taekinaki n te Baibara bwa e na kabonganaaki ma te matoa te Aro ni Kristian ni kaitaraa nanon te Atua. E tuangia mataniwi aika Kristian te abotoro Bauro ni kangai: “A na teirake mai buakomi mwaane aika a na taekin reirei aika kewe bwa a aonga ni katikiia taan rimwin Iesu bwa a na rimwia.”​​—Mwakuri 20:​29, 30.

E rangi n ribai Aaro aika kewe te Atua. Ni koauana, e taekinaki n Ana Taeka te Atua ae te Baibara bwa a riai ni bukinaki Aaro aika kewe ibukin “raraaia . . . te koraki nako ake a a tia ni kamateaki i aon te aba.” (Te Kaotioti 18:24) A katuturaraa i matan te Atua Aaro aika kewe, ibukina bwa a kabwaka n reireinia aomata aroaron te Atua ni koaua ae te tangira.​​—1 Ioane 4:8.

A nanoangaaki iroun te tia Ongoraei tataro te koraki ake a karawawataaki irouia Aaro aika ribuaka. N te tai ae waekoa, e na kairaki te Atua n tangiran te botannaomata ni motiki taekaia Aaro nako ake a baka n tangiria, rinanon Iesu. E taku Iesu: “Ane a na kangai aomata aika bati nakoiu n te bong arei, ‘Te Uea, te Uea, tiaki ti taetae ni burabeti n aram?’ . . . Ao ngai N na kangai nakoia: I bon aki kinaingkami naba teutana! Naako mairou, ngkami aika taani kakaraoa ae buakaka.”​​—Mataio 7:​22, 23.