Te Taetae ni Burabeti te Rongorongo ae Eti Raoi

“Bon akea te bwai teuana ae bwaka mai buakoni bwaai aika raraoi ni kabane ake E taekiningkami iai Iehova ae Atuami.”—IOTUA 23:14, BG.

E KANGA NI KAOKORO TE BAIBARA? A rangi n ataaki n aroia aika a bubuaka mitinaren rimoa n taekini baika a aki kai oota iai aomata man aki onimakinaki ao ai uana naba ma bwaai ni kaiwa aika boou. A kakoauai kanoan taai aika a na roko i aoni baika riiriki n taai aikai, ma a aki katerei baika a na riki n tienture aika imwaia. Ni kaitaraan anne, a boni kokoro bukin taetae ni burabeti ake a kabwarabwaraaki n te Baibara, e ngae ngke a kaotii naba “ma ngkoangkoa baika tuai ni karaoaki.”—Itaia 46:10, BG.

TE KATOTO: N te kaonoua n tienture B.C.E., ao e nora te miitara te burabeti are Taniera are e a kaman taekinaki iai, bwa e na waekoa ni konaaki Miria ma Botia irouni Kuriiti. E taetae ni burabetinaki naba iai bwa ngkana e a rikirake ni “korakora” ueani Kuriiti ae totokanikai, e na manga “maoto,” ae nanona e na bwaka ana tautaeka. Antai ae e na onea mwina? E korea ae kangai Taniera: “A na tei rake aua te uea mai buakon te botanaomata arei, ma tiaki ni korakorana.”—Taniera 8:5-8, 20-22, BG.

AIA TAEKA TAANI KORO RONGORONGO RIMOA: E raka i aon 200 te ririki imwin ana tai Taniera, ao e a riki Alexander te Kakannato bwa ueani Kuriiti. Inanon tebwina te ririki, e a tokanikai Alexander i aon te Embwaea ni Miria ma Botia, ao e karakaa nako te tautaeka ni Kuriiti nakon te Indus River ae (Pakistan ni boong aikai). Ma e karina ni mate ngke 32 ana ririki. N tokina, e a kamaunaaki ana embwaea n te buaka are e uakaan ma te kaawa ae Ipsus i Asia Minor. E a bwenauaaki te Embwaea ni Kuriiti i marenaia naake aman, ake a tokanikai n te buaka anne. Ma akea mai buakoia ae e korakora mwaakana n aron Alexander.

TERA AM IANGO? Iai riki te boki ae kona n taekinaki iai bwa a kokoro bukin taetae ni burabeti ake iai? Ke e kaokoro te Baibara ma booki nako?

[Reirei ae kakawaki n iteraniba 4]

“A rangi ni bati n te Baibara taetae ni burabeti, ae akea temanna ae na iangoia bwa a manennanti ke a kangaanga ni koro bukia.”

—A LAWYER EXAMINES THE BIBLE, MAIROUN IRWIN H. LINTON

[Taamnei n iteraniba 4]

© Robert Harding Picture Library/SuperStock