Karekea Reireiam Man Ana Taeka Te Atua

Ti na Kanga ni Kakabwaiaaki n Ana Tua te Atua?

Iai titiraki n te kaongora aei ake ko bae n tia n tabeki, ao a kaotaki naba kaekaaia n am Baibara. A kukurei Ana Tia Kakoaua Iehova ni maroroakini kaekaaia ma ngkoe.

1. E aera ngkai ti riai n ongeaba iroun te Atua?

E riai te ongeaba tii iroun te Atua ngkai e boni karikiira. E ongeaba naba Iesu iroun te Atua n taai nako. (Ioane 6:38; Te Kaotioti 4:11) E anganira ana tua te Atua bwa ti aonga ni kaota tangirana.—Wareka 1 Ioane 5:3.

A bane n raoiroi ibukira ana tua Iehova ae te Atua. A reireinira aroni maiura ae moan te tamaroa ngkai, ao a kaota naba aroni karekeani kaniwangara aika akea tokia n te tai ae na roko.—Wareka Taian Areru 19:7, 11; Itaia 48:17.

2. E na kanga ana tua te Atua ni kamarurungira?

E kamanoira ana tua te Atua ni kaineti ma te koro ni manging man aoraki aika kamamate, ao kabuanibwai aika karina. E reke te tautoronaki n tangiran te moi manging ae riao, ao e kairiri nakoni mwakuri n nanobaba. (Taeka N Rabakau 23:20, 29, 30) E kariaia Iehova te moi n te kamanging ma tii n te aro ae riai.—Wareka Taian Areru 104:15; 1 I-Korinto 6:10.

E kauringira naba Iehova bwa ti na kawakinira man te bakantang, te aki taubaang n un, ao aroaro riki tabeua aika karuanikai. E na buoka marurungira kabatiaani maiuakinan ana taeka n reirei.—Wareka Taeka N Rabakau 14:30; 22:24, 25.

3. E na kanga ana tua te Atua ni kamanoira?

E katabua te wene n taanga i tinanikun te mare ana tua te Atua. (I-Ebera 13:4) A namakina te rau taanga ngkana a ongeaba n te tua aei, ao e a nakoraoi riki mwengaia ibukia natiia. N te itera are teuana, e aki toki n reke te aoraki, te raure, te iowawa, te rawawatannano, ao utu aika tii temanna te karo iai, n te wene n taanga i tinanikun te mare.—Wareka Taeka N Rabakau 5:1-9.

E na kamanoaki ara iraorao ma te Atua, ngkana ti rarawa nakon aroaro aika a kairaraangira nakon te wene n taanga i tinanikun te mare. Ti kona naba iai n rarawa n urui aroia tabemwaang.—Wareka 1 I-Tetaronike 4:3-6.

4. E na kanga ni kakabwaiaira karinean te maiu?

A karekea marurungia aomata aika karinea ana bwaintituaraoi te Atua ae te maiu ngkana a katoka te moko, ao aroaro ni maiu riki tabeua aika karuanikai ake a tautoronaki iai. (2 I-Korinto 7:1) E kakawaki naba iroun te Atua maiun te teei are e tabe n rikirake i nanoni biroton tinana. (Te Otinako 21:22, 23) Ngaia are ti aki riai ni kataia ni kabwakaa. A tarai raoi naba baika a na karuanikaia te maiu n aia tai ni mwakuri, ni mwengaia, ao n aia kaa, te koraki ake a ataa kakawakin ana iango te Atua ibukin te maiu. (Te Tua-Kaua 22:8) Irarikin anne, a aki karuanikaia maiuia n takaakaro nako ngkai te maiu bon te bwaintituaraoi mairoun te Atua.—Wareka Taian Areru 36:9.

5. E na kanga ni kakabwaiaira katabuan te raraa?

E tabu te raraa ibukina bwa e taekinna te Atua bwa e tei ibukin te maiu. (Karikani Bwaai 9:3, 4) Ti kakabwaiaaki n ana tua te Atua ni katitebooani kakawakin te raraa ma te maiu. N te aro raa? E reke iai kabwaraani buure.—Wareka Nakoaia Ibonga 17:11-13; I-Ebera 9:22.

E rangi ni kakawaki raraan Iesu ibukina bwa e kororaoi. E anga raraana ae tei ibukini maiuna Iesu nakon te Atua. (I-Ebera 9:12) E karekea nakoira te maiu are akea tokina kawawaean raraana.—Wareka Mataio 26:28; Ioane 3:16.

Ibukin rongorongona riki tabeua, nora mwakoro 12 ao 13 n te boki Tera Ana Reirei ni Koaua Te Baibara?, aei are boreetiaki irouia Ana Tia Kakoaua Iehova.