E Kakawaki te Kaeka Nakon te Titiraki Anne?

“I moana au iraorao ma ataeinimwaane ngke tebwina au ririki. N te moantai, ti tataubai ao ni kaboria. Ma tabeua te tai imwina, ti a tautaui bwain rabwatara ao ni karaoi baika irekereke ma te wene ni bure. Ngke ai tebwi ma nimaua au ririki, I a moana au mwakuri ni kareketianti ao I a kawaraki irouia mwaane n au tabo ni mwakuri aika a kani wene ni bure ma ngai. I kani kaotia bwa I kukurei n reitaki ma raou ni mwakuri ni bwaai ni kabane ake a karaoi. I tangiriia raou ni mwakuri bwa a na tatangirai ao ibukin anne, e a kairai nakoni karaoani baika bati riki ni kaineti ma karaoan te wene ni bure.”—NEI SARAH,a AOTITERIA.

TIAKI ko na boni mimi ngkana ko ataia ae e kaikawaaki Nei Sarah n te mwenga ae a matoatoa kaaina n aia Aaro? A kekeiaki ana karo ni kaikawaia bwa e na maiuakin ana kaetieti te Baibara ni kaineti ma te aroaro ni maiu ae riai. Ma e rinea te aroaro ni maiu ae kaokoro Nei Sarah.

A bati aika boraoi n iango ma ana rinerine Nei Sarah. A kakoauaa bwa e a bane tain ana reirei te Baibara ibukin te wene n taanga. A iangoia tabeman bwa akea kauntaban ae ko atongko bwa ko matoatoa n am onimaki ao ko boni wewene ni bure naba.

E kakawaki ataakin ao maiuakinan ae taekinaki n te Baibara ibukin te wene n taanga? E taekinaki n te Baibara bwa ‘e kairaki koreana iroun te Atua ao e manena ibukin te angareirei.’ (2 Timoteo 3:16) Ngkana ko kakoauaa bwa e karikiia aomata te Atua ao te Baibara bon ana Taeka ae e kaira koreana, e kakawaki ngkanne ataakin te bwai ae taekinaki iai ibukin te wene n taanga.

E kananokawaki bwa a bati aika mangaongao aia iango ni kaineti ma ae e reiakinaki n te Baibara ibukin te wene n taanga. A taekinna mataniwi n Aaro bwa a karinea ae taekinaki n te Baibara ma a boutokai naba iango aika kakaokoro ni kaineti ma te wene n taanga. Ni koauana, e a tia te iango aei ni bwenauai Aaro aika bubura aika bati.

N oneani mwin onimakinan aia taeka aomata, e aera ko aki neneria i bon iroum taekan te wene n taanga ae taekinaki n te Baibara? A na rinanoaki n te kaongora ae imwin aei, titiraki aika a rangi n ataaki aika tebwina ni kaineti ma ana reirei te Baibara ibukin te wene n taanga. Ko na nori kaekaaia n te kaongora anne, aika mataata aika boto man ana reirei ni koaua te Baibara. E na maroroakinaki n te kabanea ni kaongora n te maekatin aei kakawakin ara rinerine iai.

[Te Kabwarabwara mai nano]