Bukin Tera Bwa ti Riai ni Maiuakin Ana Kaetieti te Baibara?

E KOAUA bwa e a bane tain ana reirei te Baibara ni kaineti ma te wene n taanga ao ai akea naba riain tiatianakin inaomataia aomata iai? E aki. Ni kaitaraan anne, e kona ni buokira ana reirei te Baibara ni kaineti ma te wene n taanga bwa ti na aki rotakibuaka ni baikai:

▪ Aoraki aika ewewe n te wene ni bure

▪ Karikan te nati n tamwa

▪ Te rawawatannano imwin uruakin te mare

▪ Mataniwin te nano ae aki rau imwini karaoan te bure

▪ Tabeakinara irouia aomata tii ngkana a tangira te bwai teuana mairoura

E tangiria ara tia Karikiriki are Iehova ae te Atuaa bwa ti na kimwareirei ao ni kakabwaiaaki ni kabonganaan ana bwaintangira. E “reireiko [te Atua] arom ae ko na kabaia iai.” (Itaia 48:17, BG) E karekei baikai te aomata ae maiuakini ana kaetieti te Baibara ni kaineti ma te wene n taanga:

▪ E akoaki iroun te Atua

▪ E rau ana iango

▪ E teimatoa ni kaan ana iraorao ma kaain ana utu

▪ E raoiroi taekana

▪ E onimakinna i bon irouna

Tera ae ko na karaoia ngkana ko aki maiuakin ana kaetieti te Baibara ngkai? Ko kona ni bita maium? E na uringa aroarom ngkoa te Atua bwa e na manga katuuaaeko iai?

Iangoa te koaua aei: N te moan tienture, tabeman kaain te ekaretia ni Kristian bon taani wene ni bure ngkoa, taani wene ni kimoa ao taani wene n taanga i marenan te mwaane ma te mwaane ao te aine ma te aine. A motinnanoia bwa a na bitii maiuia ao a karekei iai kakabwaia aika bati. (1 I-Korinto 6:9-11) Ni boong aikai, a a tia ni motinnanoia nga ma nga aomata n tatabemania nako bwa a na karaoa naba anne ni katobibia te aonnaba. A a tia ni kainaomataaki mani maiuia ae te wewene ni bure ma aomata aika kakaokoro, ao a kakabwaiaaki mani kaboraoani maiuia ma ana kaetieti te Baibara. N te katoto, nora rongorongon Nei Sarah ane n te moani kaongora.

“I Waekoa n Namakina te Raunnano”

E noria Nei Sarah bwa e aki reke irouna te inaomata ao te raunnano are e bwarui ni maiuna ae akea te taubaang iai. E taku: “I namakinna bwa e rotakibuaka mataniwin nanou. I maamaa ao n raraoma bwa I kona ni bikoukou ke n ituaki n te aoraki ae kamamate. I tuai mani mwaninga au koaua ae bon iai te Atua ao I ataia naba bwa I kammaraka nanona n aroaroni maiu. I iangoia bwa I aki itiaki ao I rotakibuaka iai.”

Teutana imwin teutana, e a reke korakoran Nei Sarah ni bita maiuna. E ukera buokana mairouia ana karo aika Ana Tia Kakoaua Iehova. E bubutii buokana naba mairouia unimwaane aika Kristian n ana ekaretia. E taku Nei Sarah: “I rangi ni kukurei n nora aia akoi ao aia tangira au karo ao unimwaanen te ekaretia. Ao I waekoa n namakina te raunnano.”

E kaikawaiia natina aika uoman ngkai Nei Sarah. E taku neiei: “I bon tuangia natiu au motinnano ake I karaoi ni maiu. I tangiriia bwa a na ota ni baike I rotaki iai ngke I aki maiuakin ana kaetieti te Atua. Tiau boni buokaia bwa a na ota ni kakabwaiaan aia iango ao rabwataia ni maiuakinan ana kaetieti te Atua ni kaineti ma te wene n taanga. I kakoauaa bwa e anganira kaetieti te Atua ni kaineti ma te aroaro ni maiu ae riai bwa e aki tangirira bwa ti na rotakibuaka ni maiura.”

Ko kona naba ngkoe ni kakabwaiaaki n touani mwin ana kairiri ae tatangira te Atua. E beritanaki ae kangai n te Baibara: “A raraoi ana tua Iehova, ao a kakukureia te nano: E itiaki ana taeka Iehova, ao e kaootai maata. . . . Ao e bati booni kawakinaia.”—Taian Areru 19:8, 11, BG.b

[Kabwarabwara ae nano]

[Kabwarabwaraan n iteraniba 8]

A rotakibuaka ni maraki aomata aika a kakeai bongan ana kaetieti te Baibara

[Kabwarabwaraan n iteraniba 9]

A itiaki mataniwin nanoia aomata aika maiuakina ana kaetieti te Baibara, ao a karekea aia iraorao aika teimatoa ni kaan ma kaain aia utu