Ko Na Mutiakin Ana Kauring Iehova Aika Mataata?

“Aio te kawai, kam na nakonako i nanona.”​—ITAIA 30:21, BG.

1, 2. Tera ae e motinnanoia Tatan bwa e na karaoia, ao ti kanga ni buokaki man Ana Taeka te Atua?

E KONA ni kairiko nakon te kawai ae kairua te kanikina ae kotea te tabo ae kairua n am tai ni buti n te kawai. E kona ni karuanikai aei. Iangoia bwa e anga te kauring nakoim raoraom bwa iai te aomata ae iowawa ae e bita te kanikina anne bwa e tangiriia aomata bwa a na bua kawaia. Ko na mutiakina te kauring anne?

² Ni koauana, e motinnanoia Tatan are ara kairiribai ae buakaka bwa e na mwamwanaira. (Te Kaotioti 12:9) A bane n riki mairouna kariri ni kabane ake a bubuaka ake a maroroakinaki n te reirei are mai mwaina, ao e uaiakinira bwa ti na bita kawaira man te maiu are aki toki. (Mataio 7:13, 14) Ti rangi ni kakaitaua Atuara ae tatangira ngkai e anganira te kauring bwa ti na aki toui ‘kanikinaeani kawain’ Tatan aika mwamwanaa te aba. Ti na maroroakini ngkai tenua riki ana kariri Tatan aika bubuaka. Ngkana ti iaiangoa aron Ana Taeka te Atua ni buokira bwa ti na rarawa ni mwamwanaaki, ti kona ni kakoauaa iai bwa e nakonako Iehova i akura ao e kaetietii kawaira nakon te kawai ae eti, ngke e kangai: “Aio te kawai, kam na nakonako i nanona.” (Itaia 30:21, BG) Kananoan ara iango n ana kauring Iehova ake e anga aika mataata e na boni kakorakorai nanora ni kani mutiakin.

Tai Kakairi Irouia “Taan Angareirei ni Kewe”

3, 4. (a) A kanga taan angareirei ni kewe n riki n ai aroni mwanibwa aika mwauteretere? (b) A nako mai ia taan angareirei ni kewe ao tera ae a tangiria?

³ Iangoia bwa ko mwananga n te rereua. Ko nora te mwanibwa mai kiraroa ao ko a kainetia, ni kantaningaia bwa ko na karekea te ran teutana mai iai ni katoka takam. Ma n rokom iai ao ko a noria bwa e mwauteretere nanona. Ai boni kabwarananora! Ai aroni mwanibwa aika mwauteretere taan angareirei ni kewe. A na rangi n rotaki n te aki raunnano te koraki ake a kawariia aomata akanne ibukini karekean ranin te koaua. E anga ana kauring Iehova rinanoia abotoro aika Bauro ma Betero i aon taekaia taan angareirei ni kewe aikai. (Wareka Mwakuri 20:29, 30; 2 Betero 2:1-3.) Antai taan angareirei aikai? Ti buokaki n aia taeka abotoro aika uoman aikai aika a kairaki koreaia rinanon te taamnei n ataa te tabo ae a roko mai iai taan angareirei ni kewe, ao aroia ni mwamwanaia aomata.

⁴ E taekina ae kangai Bauro nakoia unimwaanen te ekaretia i Ebeto: “A na teirake mai buakomi mwaane aika a na taekin reirei aika kewe.” E korea ae kangai Betero nakoia raona ni Kristian: “Ane a na iai taan angareirei ni kewe i buakomi.” Mangaia are a nako mai ia taan angareirei ni kewe aikai? A na boni kaoti man te ekaretia. Te koraki akanne bon taan tannako man te onimaki.a Tera ae a tangiria? A aki tii kukurei ni kitana te botaki are a a tia ngkoa n tangiraki iai. Ma tiaia are e kabwarabwaraa Bauro bwa a na “katikiia taan rimwin Iesu bwa a na rimwia.” Nora te kamataata n te taeka ae “taan rimwini Kristo.” N oneani mwini karekeaia raoia taan tannako man te onimaki aikai, a kataia ni kairiia taan rimwini Kristo bwa raoia. Ai aroia “kameaanti aika kaakang” taan angareirei ni kewe aikai ake a kaotinakoia taari aika kakaonimaki man te ekaretia, n uruana aia onimaki ao ni katannakoia man te koaua.​—Mataio 7:15; 2 Timoteo 2:18.

5. Baikara aanga ake a kabonganai taan angareirei ni kewe?

⁵ A kanga ni mwamwanaiia aomata taan angareirei ni kewe? A karaoa aei man aia mwakuri n nanowanawana. A uotii iango aika bubuaka taan angareirei ni kewe “n te aro ni karaba” nakon te ekaretia, n aroia taani kakeru ake a uotii baika a iraei nako abaia n te aro ni karaba. A kabonganai “taeka ni kewe” taan angareirei ni kewe aikai, are nanona bwa a taekini baika aongkoa a koaua ma a boni kewe, kanga ai aroia taani karitei ake a korei rongorongo aika aongkoa a koaua ma a boni kairua. A kabutii nako “reirei aika kewe,” ni ‘kabwaoua te Koroboki ae Tabu’ ni kaboraoi ma oin aia iango. (2 Betero 2:1, 3, 13; 3:16) E teretere iai bwa a aki tabeakinira ma nanoia ni koaua taan tannako man te onimaki. Te kakairi irouia e na katannakoira man te kawai are kairira nakon te maiu are aki toki.

6. Baikara reirei ni kairiri aika mataata aika ti tuangaki n te Baibara ni kaineti ma taan angareirei ni kewe?

⁶ Ti na kanga ni kamanoira mairouia taan angareirei ni kewe? E rangi ni mataata ana reirei ni kairiri te Baibara ni kaineti ma arora ni kaaitaraia. (Wareka I-Rom 16:17; 2 Ioane 9-11.) E taekinaki ae kangai n Ana Taeka te Atua, ‘Kararoaia.’ E rairaki te taeka anne n rairai tabeua bwa “tannako mairouia,” “kawakiningkami mairouia,” ao “rarawa nakoia!” Akea kairuan te reirei ni kairiri anne are kairaki koreana rinanon te taamnei. Iangoia bwa e tuangko te taokita bwa ko na aki kaaniko ma te aomata ae ituaki n te aoraki ae ewewe, ae kamamate. Ko ataa raoi te bwai ae e nanonna te taokita, ao ko mutiakina raoi ana kauring. Eng, a ‘babaeakina te bwai teuana’ taan tannako man te onimaki, ao a ukoukoriia tabemwaang bwa a na ituaki n aia reirei aika kewe. (1 Timoteo 6:3, 4) Ti tuangaki iroun Iehova ae te Taokita ae Kakannato bwa ti na rarawa n reitaki ma ngaiia. Ti ataa te bwai ae e nanonna, ma ti motinnanoia bwa ti na mutiakin ana kauring n iterani maiura ni kabane?

7, 8. (a) Tera ae irekereke ma te rarawa nakoia taan angareirei ni kewe? (b) Bukin tera bwa ko motinnanoia bwa ko na tei n nene n rarawa nakoia taan angareirei ni kewe?

⁷ Tera ae irekereke ma te rarawa nakoia taan angareirei ni kewe? Ti aki riai ni kamauriia ke ni kaoia nakoni mwengara. Ti rarawa naba ni wareki aia boki, ni matakuakinia n te terewitin, n neneri aia tabo ake a kawari n te Internet, ke ni korei ara taeka ni kaineti ma baike a taekin n te Internet. E aera ngkai ti karaoa te aeka ni motinnano anne? Ibukin te tangira. Ti tangira “Atuan te koaua” ai ngaia are e aki anaaki nanora n reirei aika kewe ake a kauntaba ma ana Taeka ae koaua. (Taian Areru 31:5, NW; Ioane 17:17) Ti tangira naba ana botaki Iehova are ti reiakinaki iai koaua aika kakimwareirei are e irekereke ma aran Iehova ao nanon arana, ana kantaninga te Atua ibukin te aonnaba, aroia maate, ao te kantaninga ibukin te mangauti. Ko kona n uringa aron am namakin ngke ko moan reiakini baikai ao koaua riki tabeua aika rangi ni kakawaki? Tai kariaia ngkanne aia kewe taan angareirei ni kewe bwa a na kairiko bwa ko na kaitaraa te botaki are ko reiakin iai koaua aikai.​—Ioane 6:66-​69.

⁸ Ti aki riai ni kakairi irouia taan angareirei ni kewe n aki ongeia bwa tera ae a taekinna! Akea bukina iroura bwa ti na ongo irouia aomata aika ai aroni mwanibwa aika mwauteretere. A na aki rau nanoia te koraki ake a ongo irouia te koraki aikai. Ti motinnanoia bwa ti na kakaonimaki nakon Iehova ao ana botaki. Ti aki kona ni karawawataaki n te botaki aei ao e teimatoa n anganganira ranin te koaua ae bati ae itiaki man Ana Taeka te Atua.​—Itaia 55:1-3; Mataio 24:45-47.

Tai Mutiakini “Karaki Aika Aki Koaua”

9, 10. Tera te kauring are e anga Bauro nakon Timoteo ni kaineti ma “karaki aika aki koaua,” ao tao tera ae e iangoia Bauro? (Nora naba te kabwarabwara mai nano.)

⁹ E kona ni mwamwanaira te kanikina n te kawai, are e bitia temanna bwa e na kotea te kawai ae kairua. N tabetai e bebete iroura noran te kanikina ae kairua, ma e kona n aki bebete n taai tabetai. Titeboo naba ma ana kariri Tatan aika bubuaka; a kai ootara ana kariri tabeua nakon ake tabeua. E anganira te kauring te abotoro Bauro i aon taekan teuana mai buakon ana waaki ni kamwane Tatan ae aki ataaki ae boni “karaki aika aki koaua.” (Wareka 1 Timoteo 1:3, 4.) Baikara karaki aika aki koaua aikai, ao ti na kanga n rarawa ni mutiakin? Ti kainnanoi kaekaan titiraki aikai bwa ti aonga n teimatoa n toua te kawai nakon te maiu are aki toki.

¹⁰ Ni kanoan ana moan reta Bauro, ao e anga iai te kauring ibukini karaki aika aki koaua nakon Timoteo ae te mataniwi n te ekaretia are e katabeaki bwa e na kateimatoa itiakin te ekaretia, ao e na buokiia raona n onimaki bwa a na teimatoa ni kakaonimaki. (1 Timoteo 1:18, 19) E nanonaki n te taetae ni Kuriiti are e kabongana Bauro ibukini “karaki aika aki koaua” bwa “te kewe” ke “te karioiango.” N aron ae taekinaki n te International Standard Bible Encyclopaedia, e kaineti te taeka aei nakon “ana karaki (te Aro) ae aki irekereke ma te bwai ae koaua.” Tao e iangoi aia reirei ni kewe Aaro Bauro bwa a rio mani karaki aika kakannongora ke karaki aika oteaki aika aki koaua.b Aeka ni karaki akanne a tii “katauraoi taian titiraki ibukin te kakaae,” bwa a aonga ni karioaki titiraki aika akea uaaia aika kabanetai are e na kairiri nakon te kakaae ae akea manenana. Karaki aika aki koaua aikai bon ana aanga ni kariri Tatan are te tia mwamwanaiia aomata ni kabonganai aia reirei ni kewe Aaro, ao karaki aika bobuaka ma nanon te Atua ni kakerikaakiia iai ake a raoiroi nanoia. E rangi ni mataata ana reirei ni kairiri Bauro ae kangai: Tai mutiakini karaki aika aki koaua!

11. E kanga Tatan ni wanawana ni kabonganaia Aaro aika kewe ni mwamwanaiia iai aomata, ao te kauring raa are ti riai ni mutiakinna bwa e na buokira n rarawa nakoni mwamwanaakira?

¹¹ Baikara karaki tabeua aika aki koaua ake a kona ni burebureiia te koraki aika aki taratara raoi? N te boto n reirei, e kona ni kamanenaaki te taeka ae “karaki aika aki koaua” nakon aia reirei ni kewe Aaro ke otokaraki ake a kona ni katannakoira “man te koaua.” (2 Timoteo 4:3, 4) E rangi ni wanawana ni kabonganai Aaro aika kewe ni mwamwanaiia iai aomata Tatan are e baka n riki bwa “te anera ae kaotiota te oota.” (2 I-Korinto 11:14) N te katoto, a taku Aaro ake aongkoa Kristian ngaiia bwa a kakairi irouni Kristo, ma a angareirei n reirei aika kewe n aron te Temanna n teniman ao te ai ni moone. A reirei naba bwa iai iterani maiuia aomata ae maiu nako naba imwini maten te aomata. A kauekei naba boongi ni motirawa n aron te Kiritimati ao te Itita ke te Bwakate, ake a taraa ni mwamwanaaki iai ni katei aika boto i aon taian otokaraki ao mairouia beekan. Ti na bon aki mwamwanaaki n reirei aika kewe ngkana ti mutiakin ana kauring te Atua ake e anga n arora ni kaokoroira ao ni “katoka ringakin te bwai ae kamwara.”​—2 I-Korinto 6:14-17.

12, 13. (a) Baikara keewe ake e karikirakei Tatan, ao tera te koaua ni kaineti ma keewe akanne? (b) Ti na kanga n rarawa ni mwamwanaaki n ana karaki Tatan aika aki koaua?

¹² E a tia Tatan ni karikirakei keewe riki tabeua are ti na kona ni mwamwanaaki iai ngkana ti aki taratara raoi. Iangoi katoto tabeua. A uki bwaai ni kabane aika eti ao aika kairua. E a nakon am motinnano. Ti aki toki n ongongo aei n te terewitin, n taian taamnei, ni maekatin, n nuutibeeba, ao n te Internet. Ibukina bwa ti aki toki n ongongo te kewe aei, e a bebete iroura bwa ti na iango n aron anne ao ni kakairi n ana iango te aonnaba aika bubuaka. Ma ni koauana, ti kainnanoa te Atua bwa e na tuangira te aroaro ni maiu ae riai. (Ieremia 10:23) E aki kona ni kaeta ana waaki te botannaomata te Atua. E kona ni karirira te aeka n iango ae ti na tii tabe ma te maiu ae ngkai bwa ti na “taningaroti iai ke n aki uaa.” (2 Betero 1:8) Ni koauana, e a rangi ni kaan ana bong Iehova ao ti riai n ­teimatoa n tataningaa rokona. (Mataio 24:44) E bon aki tabeakiniko te Atua. Kakoauaan ana kewe Tatan aei e kona ni kairira bwa e na bwara nanora, n namakinan ae ti aki kona n tangiraki iroun te Atua. Ni koauana, e tangiriia ao a kakawaki iroun Iehova taan taromauria n tatabemania nako.​—Mataio 10:29-31.

¹³ Ti riai n teimatoa n taratara raoi n aki iango n aroia aomata aika n ana aonnaba Tatan. N tabetai, e bon taraa ni koaua te baere a taekinna ma n iangoia. Ma uringnga ae e rangi n rabakau ni mwamwanaiia aomata Tatan. Tii mani mutiakinan reirei ni kairiri ao kauring ake n Ana Taeka te Atua ae ti kona iai n rarawa ni mwamwanaaki n ana “karaki n ototo aika kewe” Tatan.​—2 Betero 1:16.

Tai “Rimwin Tatan”

14. Tera te kauring are e anga Bauro nakoia aine ake a ataei riki ake a a tia ni mate buuia, ao e aera ngkai ti riai ni bane ni mutiakin ana taeka?

¹⁴ Iangoia bwa e koreaki i aon te kanikina n te kawai ae kangai: “Te Kawai Aei Ibukin Rimwian Tatan.” Antai mai buakora ae kani mutiakina te kanikina anne? Ma e anganira te kauring Bauro i aon taekan aanga aika bati ike a kona iai Kristian ake a a tia ni katabui maiuia n “rairakinako n rimwin Tatan.” (Wareka 1 Timoteo 5:11-15.) A kaineti ana taeka Bauro aikai nakoia “aine ake a ataei riki ake a a tia ni mate buuia,” ma a boni kaineti naba nakoira ni kabane booto n reirei ake e taekin. Tao a aki iangoia aine aika Kristian ake n te moan tienture bwa a na rimwin Tatan, ma e oti karaoan anne irouia man aroaroia. Ti na kanga n rarawa n rimwin Tatan n akea ataakina iroura? Ti na neneri ngkai ana kauring Bauro ake e anga ni kaineti ma te winnanti.

15. Tera tian Tatan, ao e kanga Bauro ni kabwarabwarai ana kunemwaan Tatan?

¹⁵ Tian Tatan bwa ti na aki tataekina ara koaua ao ni katoka tataekinan te rongorongo ae raoiroi. (Te Kaotioti 12:17) Ibukini kateimatoaan aei, e kataia ni kairira nakon uaiakinani mwakuri aika kabanetai ke aika a na karekea te bobuaka i marenara. Nora aroni Bauro ni kabwarabwarai ana kunemwaan Tatan. “Te aro ae akea uaana, ni kabanetai.” N te katoto, ti kona ni kabanei ara tai aika bati ao aia tai naba tabemwaang ni warekan ao kanakoan e-mail ibukini baika aki rangi ni manena, ao a aki naba koaua. “Taan taekinia tabemwaang.” E kona te winnanti ni karika te kauntaeka ae kauekea te un. (Taeka N Rabakau 26:20) E ngae ngke tao a ataa raoi te rongorongo ke a aki taan uarao aika riribai aikai, ma a boni kakairi iroun Tatan te Riaboro.c “Taan reberake n roko n tabeia aomata.” Tiaki tabera tuangakia tabemwaang aroia ni bairei bwaai i bon ibukia. E kona te aroaro n taningaroti ao te kangaanga aei ni katabetabeira man te mwakuri are mwiokoira iai te Atua ae tataekinan te Tautaeka n Uea. Ngkana ti katoka ara mwakuri ao n aki boutokaa te mwakuri are mairoun Iehova, ti a kakairi iai ngkanne iroun Tatan. Ti riai ni bane n rineia bwa antai ana itera ae ti na boutokaia.​—Mataio 12:30.

16. Tera te taeka n reirei ae ti riai ni mutiakinna ae kona ni buokira n rarawa n “rairakinako n rimwin Tatan”?

¹⁶ E kona ni buokira mutiakinan ana taeka n reirei te Baibara bwa ti na rarawa n “rairakinako n rimwin Tatan.” Iangoi tabeua ana reirei ni kairiri Bauro aika manena. “Kakorakoraingkami n ana mwakuri te Uea ni kamwaiti.” (1 I-Korinto 15:58) Ti na kamanoaki mani kangaanga aika raba ao man uaiakinan te bwai teuana ae kabanebuakai ara tai, n teimatoara ni katabetabeira n te mwakuri ibukin te Tautaeka n Uea. (Mataio 6:33) Taekin ‘taeka nako aika raraoi ibukini kateimatoaan te aba.’ (I-Ebeto 4:29) Motinnanoia bwa ko na aki ongora n te winnanti ao n aki naba tataekinna.d Karikirakea onimakinaia ao karineaia raom n te onimaki. Ti na kairaki iai ngkanne bwa ti na taekin taeka aika kateimatoa te aba n oneani mwin taeka aika kauruakinano. “Katea . . . tiami ae . . . te aki reberake n roko n tabeia aomata tabeman.” (1 I-Tetaronike 4:11) Kaotiota tabeakinaia tabemwaang, ma karaoa aei n aanga aika ko tabeakin iai kainnanoia aika aki ataaki ao ni karineia. Uringnga naba ae ti aki riai ni kairoroia tabemwaang n oin ara iango ni kaineti ma baike a riai n iangoi i bon ibukia.​—I-Karatia 6:5.

17. (a) Bukin tera bwa e anganira Iehova kauring ni kabane aika ti maroroakin? (b) Tera ae ti riai ni motinnanoia bwa ti na karaoia?

¹⁷ Ai kakaitaura ngaira iroun Iehova ngkai e kamataatai raoi bwaai aika ti aki riai ni kakairi iai! Ti riai n teimatoa n ururingnga ae ti anganaki iroun Iehova kauring ni kabane aika ti maroroakin aikai, ibukina bwa e rangi n tangirira. E aki tangiria bwa ti na mwamwanaaki ma ni karawawataaki iroun Tatan. E reme te kawai are e tangiria Iehova bwa ti na toua, ma bon tii ngaia te kawai nakon te maiu are aki toki. (Mataio 7:14) Ti bia teimatoa n aki kerikaaki man ara motinnano ni mutiakinan ana taeka Iehova are kangai: “Aio te kawai, kam na nakonako i nanona.”​—Itaia 30:21, BG.

[Kabwarabwara ae nano]

Tera Am Kaeka?

Ko na kanga ni maiuakini kauring aika taekinaki ni kiibu aika i nano?

• 2 Betero 2:1-3

• 1 Timoteo 1:3, 4

• 1 Timoteo 5:11-15

[Te Bwaoki/​Taamnei n iteraniba 23]

Buraeniman Aika Kamaenakoaki n te Ang

E kaotaki karuanikain te winnanti ni karakinan temanna te I-Iutaia rimoa. E taekinaki te boto n iango n te karaki aei n aanga aika kakaokoro.

E taekini keewe nakoia aomata aika bati temanna te mwaane, ibukin te aomata ae te kabanea ni wanawana n ana kaawa. Tabeua te tai imwina ao e a bubutii kabwaraan ana bure teuare e kewe arei nakon te aomata are e wanawana. Ai ngaia are e a kangai nakon teuare wanawana:

“Tera ae I kona ni karaoia ni kaotia nakoim iai bwa I bon nanokawaki n te bae I taekinna ibukim?” E taku teuarei nakoina: “Iai te bwai teuana ae ko na karaoia. Ko na anaa te uninga ae on n te buraeniman. Koreia ni kaukia, ao a na ukakinako n te ang.” E aki ataa bukini karaoan anne irouna teuanne ma e tii karaoa are e tuangaki bwa e na karaoia. Imwina, e a manga nakon naba te aomata are wanawana arei ao e titirakinna:

“E a bwara ngkai au bure iroum?” E taku teuare wanawana:

“Naako moa kakaaei buraeniman ni kabane.” E taku teuarei:

“Ma e a rangi ni kangaanga karaoan anne. A a tia n ukakinako buraeniman n te ang nakon taabo nako. I a aikoa kona ni kunei.” E kaeka ni kangai teuare wanawana:

“Ngkai a a tia n ukakinako buraeniman nakon taabo aika mwaiti, ao ai aron naba am kewe bwa a a tia ni bane n ongo aomata aika mwaiti. Ao ngkai ko a aki kona ni kakaaei buraeniman akanne, ko a aki kona naba n tuangia aomata bwa a na mwaninga baike ko a tia n taekin.”

E mataata raoi te reirei iai. Ti aki kona ni bitii baike ti a tia n taekin. Ao n tabetai, ti aki kona naba ni kaoka karuanikain te bwai are ti a tia n taekinna. Mangaia are imwain taekinan ae buakaka ibukia tabeman, e tamaroa ururingan are ara taeka ai aroni buraeniman aika maenako n te ang.

[Taamnei n iteraniba 23]

A kanga tabeman ni kaoia taan tannako man te onimaki nakoni mwengaia?