Tera Aron Te Maiu Ni Kainnano Ae Karawawata?
E KARUANIKAI te maiu ni kainnano ae karawawata. E nanonaki n aei aki taun te amwarake, te ran, ao te bwaa ao ai auti ni maeka aika aki rangi n raraoi, tararuaan te marurung, ao te reirei. A taonaki n aei aomata aika teuana te birion mwaitiia ae katautauaki bwa e kuri n titeboo ma mwaitiia kaain Amerika. Ma e ngae n anne, a tuai man nora te aomata ae maiu ni kainnano n te aro ae karawawata angiia aomata n taabo n aron Eurobe Maeao ma Amerika Meang. Ti na ongoraei tabeua ngkai.
Mbarushimana E maeka teuaei ma buuna ao natina aika niman i Rwanda i Aberika. E mate natiia are te kaonoman n te maraeria. E taku: “E riai n tibwai abana tamau nakoira ngaira aika onoman. Moan te uarereke tibwau n te aro are I a riai ni mwaing ma au utu nakon te kaawa ae bubura riki. I uraki baeki n tano ao atibu ma kaainnabau ibukini karekeani maiura. Akea kamaamaan ara auti. Ti karerekea ara ran man te mwanibwa n aia tabo bureitiman. Ti taneiai n ara tai n amwarake ae tii teuana n te bongina ma ngkana akea te tabo ae ti na kammwakuraki iai, ti a aikoa amwarake ni kabongnga. Ngkana e riki anne, I otinako man te auti bwa I rangi n rawawata n ongongo tangitangia natiu n tangira te amwarake.”
Victor ma Carmen E boto karekeani maiuia naakai ni karaoani kaau aika uruaki. A maeka ma natiia aika niman n te kaawa ae raroanako i Bolivia. A kabooa te ruu teuana bwa a na maeka iai, n te auti ae uruaki ae karaoaki man te bokaboka ao taubukina te tiin ae raran ao akea te iti iai. A rangi ni bati ataei n te reirei ao a aikoa toa baia ataei ni bwaai n reirei, ike e a boni karaoa ana tetike natina Victor bwa e aonga n reirei. A riai n ririanna n te raroa ae 10 te kiromita te taanga aei n tabeaia ibukini kuukanani kanaia ao kaburoan nimaia. E taku Carmen: “Akea ara kainnakotinaniku. Ngaia are ti a kamanena te karaanga are kamanenaaki naba ibukin te tebotebo ao te tabo ni kabwaro maange. A aki toki n ituaki natira n te aoraki.”
Francisco ao Ilídia A maeka taanga aikai i buki i Mozambique. A maiu natiia aika aman ao e mate are temanna n te maraeria bwa e aki karinaki n te onnaoraki ibukini bwainnaorakiana. A unika te raiti ao te kumwara ae bon tau n abaia ae uarereke ibukini kanaia i nanon tenua te namwakaina. E taku Francisco: “N tabetai, akea te karau ao a a mate arokara ke a iraeaki irouia taan ira, ngaia are I a karekea te mwane ae karako man te koro kaibwabwaa are I kaboonakoi ibukin te kateitei. Ti tatabeaia naba n te buakonikai n te raroa ae uoua te aoa te nakonako iai. Ti kaai n uota kaka teuana te bwantoro n aia ngai ma buu, teuana ibukin ara kuuka i nanon teuana te wiki ao ti kaboonakoa are teuana.”
A iangoia aomata aika bati bwa e rangi ni kairua te aro aei, ao bon te aro n ribuaka ngkai 1 mai buakoia 7 n te aonnaba aei ae ai aron Mbarushimana, Victor, ao Francisco, ma a a rangi n riao kaubwaia birion ma birion aomata riki tabeman. A a tia tabeman ni kataia ni karaoa ae a kona ni kaineti ma aei. E na maroroakinaki n te kaongora ae imwina aia kakorakora ao te bae a kantaningaia.
[Taamnei n iteraniba 2, 3]
Carmen ma natina uoman ngke a itiran man te karaanga