Utu Ni Kristian​—Teimatoa N “Taratara” Raoi

“Ti na taratara ao ni kawanawanaira.”​—1 I-TETARONIKE 5:6.

1, 2. Tera ae kainnanoaki ngkana a na teimatoa ni marurung n te onimaki kaain te utu?

E KOREA ae kangai te abotoro Bauro ni kaineti ma “ana bong Iehova are kakanato are kakamaku” nakoia Kristian i Tetaronike: “Taari kam aki mena n te rotongitong, bwa tiaki ai aroia taan iraa ngkami ake a na kauiaaki n te bong arei, bwa natin te oota ao te ngaina ngkami ni kabane. Tiaki ana bwai te roo ke te tairiki ngaira.” E a manga reitia riki ni kangai Bauro: “Mangaia ae ti na tai matunako n aroia tabemwaang, ma ti na taratara ao ni kawanawanaira.”​—Ioera 2:31, BG; 1 I-Tetaronike 5:4-6.

² E roko raoi n taina ae riai ana reirei ni kairiri Bauro nakoia I-Tetaronike ae kaineti ma Kristian aika maeka n “tain te toki.” (Taniera 12:4, BG) E kakorakoraa Tatan ngkai e a kaan tokin ana waaki ae buakaka ni katannakoia taan taromauri ni koaua aika bati man aia beku iroun te Atua n aron ana kona. Ma ti wanawana ni mutiakinan ana kaungaunga Bauro are ti na teimatoa ni marurung n te onimaki. N aron ae kabwarabwaraaki n te Baibara, e rangi ni kakawaki bwa a na kakororaoa mwiokoaia kaain te utu n tatabemania nako are a anganaki iroun Iehova, ngkana e na teimatoa n te onimaki te utu ni Kristian. Tera ngkanne mwiokoaia buumwaane, buuaine, ao rooro n rikirake ni buoka aia utu bwa a na teimatoa n “taratara” raoi?

Buumwaane​—Kakairi Iroun “te Tia Kawakintiibu ae Raoiroi”

3. Ni kaineti ma 1 Timoteo 5:8, tera ae irekereke ma mwiokoan te mwaane ngkai atun te utu?

³ E taekinaki n te Baibara bwa “atun te aine te mwaane.” (1 I-Korinto 11:3) Tera ae irekereke ma mwiokoan te buu te mwaane ngkai atun te mwenga? E kaotaki iteran te waaki ni kairiri teuana n te Baibara ni kangai: “Ngkana iai temanna ae e aki karekei kainnanoia ana koraki ake e bon riai n tabeakinia, ai moarara riki ake boni kaaini batana, ao e kakeaa te onimaki ao e buakaka riki nakon te aomata ae aki onimaki.” (1 Timoteo 5:8) Ni koauana, e riai te mwaane ni katauraoi baika a kainnanoaki n ana utu. Ma ngkana e na buokiia ana utu bwa a na marurung n aia onimaki, e bati riki ae e riai ni karaoia nakon tii te kareketianti ibukini boutokaan ana utu. E riai ni karikirakeia kaaini batana n te onimaki ni buokiia ni kabane bwa e na kakorakoraaki aia iraorao ma te Atua. (Taeka N Rabakau 24:3, 4) E na kanga ni karaoa anne?

4. Tera ae kona ni buoka te mwaane bwa e na tokanikai ni karikirakea aia reitaki kaain ana utu ma te Atua?

⁴ Kioina ngkai “te buu te mwaane bon atuni buuna, n aron naba te Kristo ngkai atun te ekaretia,” e riai te mwaane ae e a tia ni mareaki n neneri ao ni kakairi n te waaki ni kairiri are e katauraoia Iesu ibukin te ekaretia. (I-Ebeto 5:23) Iangoa aron Iesu ni kabwarabwaraa reitakina ma taan rimwina. (Wareka Ioane 10:14, 15.) Tera te bwai ae kakawaki are e na tokanikai iai te mwaane are e kani karikirakea aia onimaki kaain ana utu? Bon aio: Karaoa am ukeuke n reirei i aon te bae taekinna ao ni karaoia Iesu n aron “te tia kawakintiibu ae raoiroi,” ao “toua raoi mwini mwanekana.”​—1 Betero 2:21.

5. Tera ana atatai te tia Kawakintiibu ae Raoiroi ibukin te ekaretia?

⁵ N te aro ni kaikonaki, e boto te reitaki i marenan te tia kawakintiibu ao ana tiibu i aon te atatai ao te onimakinaki. E atai aroia ana tiibu te tia kawakintiibu ao tiibu a kinaa ao a onimakinna. A kinaa ao n ongeaba nakoni bwanaan te tia kawakintiibu. E taku Iesu: “I ataiia au tiibu ao a ataai au tiibu.” E rababanako ana atatai ibukin te ekaretia. Te taetae ni Kuriiti ae rairaki bwa “ataia” e nanonaki iai “kinaaki raoi.” Eng, e boni kinaia raoi ana tiibu te tia Kawakintiibu ae Raoiroi. E atai kainnanoia n tatabemania nako, mamaaraia ao korakoraia. E nori bwaai ni kabane ibukia ana tiibu Teuare ara Banna ni Katoto. Ao tiibu a kinaa raoi te tia kawakinia ao a onimakina ana waaki ni kairiri.

6. A na kanga buumwaane ni kakairi iroun te tia Kawakintiibu ae Raoiroi?

⁶ Ni kaotan ana waaki ni kairiri te buu te mwaane are e katotonga Kristo, e riai n iangoia bwa te tia kawakintiibu ngaia ao te koraki ake e tararuaiia bon tiibu. E riai ni kakorakoraa bwa e na kinaia raoi kaain ana utu. E kona te buu te mwaane ni karekea raoi te atatai anne? Eng, e katea te katoto ae raoiroi n ana mwakuri ao e taraia raoi bwa e na karaoi babaire ibukini baike e na kaungaia ao ni kariaia karaoana irouia kaain ana utu. Ngkana e mutiakina Ana Taeka te Atua ao ni kinaia raoi kaain ana utu te buu te mwaane ae te Kristian, n arona ni katea te banna ni katoto ao ni karaoi babaire aika raoiroi, a bae kaain te utu n rangi n onimakina ana waaki ni kairiri ao e na karauaki nanona n noraia ana utu n teimatoa ni katiteuanaaki n te taromauri ae koaua.

7, 8. E na kanga te buu te mwaane ni kakairi iroun te tia Kawakintiibu ae Raoiroi ni kaotiota te tangira nakoia te koraki ake e tararuaiia?

⁷ E tangiriia naba ana tiibu te tia kawakintiibu ae raoiroi. Ti kairaki bwa ti na kakaitau n ana tangira Iesu ibukia taan rimwina, ngkana ti reiakin Euangkerio aika rongorongoni maiun Iesu ao ana mwakuri ni minita. E bon ‘anga naba maiuna ibukia ana tiibu.’ A riai buu mwaane ni kakairi iroun Iesu ni kaotiota te tangira nakoia te koraki ake a tararuaiia. E riai n teimatoa n tangira buuna te buu te mwaane are e kan akoaki iroun te Atua, “n aron naba te Kristo ngkai e tangira te ekaretia” n oneani mwin are e na kaira buuna ma te iowawa. (I-Ebeto 5:25) E na taetae ma te akoi ao ni mutiakina buuna n aron te aomata ae tau ni karineaki.​—1 Betero 3:7.

⁸ Ibukini kataneiaia rooro n rikirake, e riai atun te utu ni boutokai booto n reirei mairoun te Atua. Ma e aki riai ni kabwaka ni kaotiota tangiraia natina. E riai ni karaoaki te reirei ni kaetieti ae kainnanoaki ma te tangira. A kainnanoa te tai ae maan riki tabeman rooro n rikirake nakoia ake temwangina ibukini kaotaaia n te bae e kantaningaaki ibukia. Ibukin anne, e riai te karo ni kaota te taotaonakinnano ae korakora nakoia. Ngkana a teimatoa mwaane ni kakairi n ana katoto Iesu, a a karekea iai kamanoaia ao mweraoia ni mwengaia. A na karekea mweraoin aia onimaki kaain aia utu are e aneneia te tia areru.​—Wareka Taian Areru 23:1-6.

9. N aron te baatua are Noa, tera mwiokoaia buumwaane aika Kristian, ao tera are e na buokiia ni kakororaoa mwiokoaia?

⁹ Te katoto teuana riki ae raoiroi ibukin atun te utu ni Kristian bon Noa. E maiu te baatua ae Noa ni kabanean tokin te waaki n te aonnaba n ana bong. Ma e teimatoa Iehova “ni kamaiua ma raona ake itiman ngke e karokoa te ieka irouia kaain te aonnaba ake a aki karinea te Atua.” (2 Betero 2:5) Iai mwiokoan Noa bwa e na kamaiuia ana utu man te Ieka. Ai aroia naba atun utu aika Kristian ni kabaneani boong aikai. (Mataio 24:37) Ai kakawakira irouia reiakinan ana katoto “te tia kawakintiibu ae raoiroi” ao ni kakorakoraia ni kakairi irouna!

Buuaine​—‘Katei Ami Auti’

10. Tera ae nanonaki n ae e na aantaeka te buu te aine irouni buuna?

¹⁰ E korea ae kangai te abotoro Bauro: “Ke a aantaeka buuaine nakoia buuia, n aroia n aantaeka nakon te Uea.” (I-Ebeto 5:22) E aki nanonaki n te kibuntaeka aei bwa a mangori aine. E taekina ae kangai te Atua ae koaua imwaini karikan te moan aine ae Nei Ewa: “E aki riai te aomata aei ni mena n ti ngaia; N na karaoa te tia buobuokia ba raona ae riai.” (Karikani Bwaai 2:18, BG) Bon te mwioko ae karineaki taben ‘te tia ibuobuoki’ ao ‘te rao’ are e buoka buuna ni karaoi mwiokoana n ana utu.

11. E na kanga te buu te aine ae moanibaan te raoiroi ni ‘katea ana auti’?

¹¹ E mwakuri ibukini kabwaiaia kaaini batana te buu te aine ae moani baan te raoiroi. (Wareka Taeka N Rabakau 14:1.) Ni kaitaraan te aine ae nanobaba are e aki karinea te babaire ibukin te waaki ni kairiri, e korakora karinean te babaire aei iroun te aine ae wanawana. N oneani mwin are e na kaotiota te aki ongotaeka ao te kan inaomata ae taabangaki n te aonnaba, e bon aantaeka nakoni buuna. (I-Ebeto 2:2) E kai taekin taeka aika aki kaunganano ibukini buuna te buu te aine ae nanobaba, ma te buu te aine ae wanawana e karaoi mwakuri aika a karikirakea karineani buuna irouia natiia ao tabemwaang. E katea naba te katoto te buu te aine ae karaoa anne rinanoni karinean ana waaki ni kairiri buuna n aki kabinekaau ao ni kauntaeka. E aki naba bakatae. Ma te buu te aine ae nanobaba, e bae ni bakataei baika a karekei kaain ana utu n te mwakuri korakora. Ma e aki karaoa anne te buu te aine ae boutokaa buuna. E mamaroro ma buuna ni kaineti ma te kataumwane. E kinaaki n ana mwakuri ake e karaoi bwa e iangoraoi ao e kaiko mwane. E aki karawawataa buuna n te aro are e a riai ni mwakuri imwin te tai.

12. Tera ae kona ni karaoia te buu te aine ni buokiia iai ana utu bwa a na teimatoa n “taratara” raoi?

¹² E buokia kaain ana utu te buu te aine ae moanibaan te raoiroi, bwa a na teimatoa n “taratara” raoi rinanoni buokani buuna n reiakinia natiia taekan Iehova. (Taeka N Rabakau 1:8) E rangi ni boutokaa te kaetieti ibukin te Taromauri n Utu. Irarikin anne, e boutokaa buuna ngkana e anga te reirei ni kairiri ao te reirei ni kaetieti nakoia natiia. Ai boni kaokorora aron neiei ma te buu te aine ae kabwaka n ongeaba, ike a a rotakibuaka iai marurungia ao aia onimaki natiia!

13. E aera bwa e kakawaki iroun te buu te aine boutokaani buuna ni katabeana n te ekaretia?

¹³ Tera ana namakin te buu te aine ae boutokaa buuna n norana ni karaoa tabena ae kakawaki n te ekaretia ni Kristian? E bon rangi ni kukurei! E rangi ni kukurei ni mwiokoani buuna e ngae ngke tao tabonibain te ekaretia, te unimwaane, ke tao kaain te Komete Ibukin te Reitaki ma te Onnaoraki, ke te Komete Ibukin te Kateitei n te Aono. E irekereke boutokaani buuna n ana taeka ao n ana mwakuri ma te anga boni ngaia. Ma e ataia raoi bwa katabeani buuna n te ekaretia ao te botaki e buoka te utu ae bwanin bwa a na teimatoa n tantani n te aro n taamnei.

14. (a) Tao tera ae kona ni kangaanga iroun te buu te aine ae e boutokaa buuna, ao e na kanga ni kaitaraa te kangaanga anne? (b) E na kanga te buu te aine ni boutokaa te mweraoi nakon te utu ae bwanin?

¹⁴ Tao e kona ni kangaanga iroun te buu te aine ae moanibaan te raoiroi boutokaan tabeni buuna, ngkana te buu te mwaane e karaoa te babaire ae a aki boraoi n iango iai. Ma e ngae n anne, e kaotiota “te nano ae nimamannei ma n rau” te buu te aine ao ni buoka buuna ni kanakoraoi ana babaire. (1 Betero 3:4) E kataia naba te buu te aine ae raoiroi ni kakairi n aia katoto aine aika mamaaka te Atua rimoa, n aron Tara, Ruta, Abikaira, ao tinan Iesu ae Maria. (1 Betero 3:5, 6) E kakairi naba irouia aine aika a kara ni boong aikai aika “arona te aroaro ae riai ae bwabwainaki irouia taan onimaki.” (Tito 2:3, 4) E boutokaa nakoraoin te mare ao mweraoin te utu ae bwanin te buu te aine ae moanibaan te raoiroi ni kaotiotan tangiran ao karineani buuna irouna. Bon te tabo ni kamanomano ao ni kabebetenano mwengana. E rangi ni kakawaki ana boutoka te buu te aine iroun te buu te mwaane ae tangira Iehova ao ni mwakuri korakora ibukina!​—Taeka N Rabakau 18:22.

Rooro n Rikirake​—“Teimatoa n Tatarai Baika Aki Nonoraki”

15. A na kanga rooro n rikirake ni karaoi tabeia ao ni buokiia aia karo n te aro ae a na teimatoa aia utu n “taratara” raoi?

¹⁵ Kam na kanga ngkami rooro n rikirake ni karaoi tabemi ao ni buokiia ami karo n te aro are a na teimatoa ami utu n “taratara” raoi ni kaineti ma te onimaki? Iangoa te kaniwanga are e a tia ni katauraoia Iehova ibukimi. Tao a a tia ami karo ni kaotii nakoimi taian taamnei ibukin te maiu n te Bwaretaiti ngke kam uarereke. Ngkai kam a ikawai, a bae ni kamanena te Baibara ao booki aika aanaki n te Baibara bwa a na buokingkami ni kataamneia n ami iango aron te maiu n aki toki n te waaki ae boou i aon te aba. Kam na buokaki n teimatoa n “taratara” raoi ni kaatuuan ami iango n te mwakuri ibukin Iehova ao baireani maiumi ni kaineti ma anne.

16, 17. Tera ae a kona ni karaoia rooro n rikirake bwa a aonga n tokanikai n te kabobirimwaaka ibukin te maiu?

¹⁶ Ti riai ni mutiakin ana taeka te abotoro Bauro aika n 1 I-Korinto 9:24. (Warekia.) Ira te kabobirimwaaka ibukin te maiu ao iangoa raoi reken te kaniwanga. Rinea te kawai ae karekea te kaniwanga ae te maiu are e aki toki. A bati aika a kariaia ukoukorani bwaikorakin te maiu aei bwa a na katabetabeia mani kateimatoaan tarataraan te kaniwanga. Ai bon nanobabara anne! E aki kairiri nakon te kukurei ni koaua karekean te kaubwai ibukin te maiu. A aki teimaani baika a kona ni karekeaki n te mwane. Mangaia ae kam na teimatoa n tatarai “baika aki nonoraki.” Bukin tera? Ibukina bwa “a teimatoa n aki toki baika aki nonoraki.”​—2 I-Korinto 4:18.

¹⁷ A irekereke “baika aki nonoraki” ma kakabwaia man te Tautaeka n Uea. Bairea maium n te aro are a na reke iai iroum. E reke te kukurei ni koaua mani kamanenaani maium ni beku iroun Iehova. E karekei aanga ibukin uaiakinan tiia n te tai ae uarereke ao n te tai ae maan te beku iroun te Atua ae koaua.a A kona ni buokiko katean tiia ni kaineti ma te onimaki bwa ko na kaatuua am iango i aon te beku iroun te Atua, ao iangoani karekean te kaniwanga ibukin te maiu are e aki toki.​—1 Ioane 2:17.

18, 19. E na kanga te roro n rikirake ni motinnanoia bwa tao e a tia ni karikirakea ana iraorao ma te Atua ke e tuai?

¹⁸ Te moani mwaneka ibukin te kawai nakon te maiu ae kam kona ni karekea rooro n rikirake, boni karikirakean ami iraorao ma Iehova. Kam a tia n toua te mwaneka anne? Titirakiniko ni kangai: ‘Te aomata ae I maiuakina te onimaki ni koaua ngai, ke I boutokai mwakuri aika irekereke ma te onimaki ibukia au karo? I karikirakei aroaro aika e na kukurei iai irou te Atua? I kakorakoraai ni kateimatoaa au babaire ibukini boutokaani mwakuri aika reitaki ma te taromauri ae koaua n aron te tataro ni katoatai, te ukeuke n reirei, kakaaeani bobotaki ao te mwakuri ni minita? I kaaniaki riki ma te Atua rinanoni karikirakean au iraorao ma ngaia?’​—Iakobo 4:8.

¹⁹ Iaiangoa ana katoto Mote. E ngae ngke e a tia Mote n rinanon te katei ae ianena iai, ma e rineia bwa e na kinaaki bwa te tia taromauria Iehova n oneani mwin are e na kinaaki bwa natin natini Barao te aine. (Wareka I-Ebera 11:24-27.) Kam riai naba ngkami rooro n rikirake ni motinnanoia bwa kam na kakaonimaki ni beku iroun Iehova. Ni karaoan anne, kam na karekea iai te kukurei ni koaua, te maiu ae te kabanea n tamaroa ngkai, ao te kantaninga ibukin “[tauan] raoi te maiu ni koaua.”​—1 Timoteo 6:19.

20. Antai aika a na karekea te kaniwanga n te kabobirimwaaka ibukin te maiu?

²⁰ N takaakaron rimoa ae te kabobirimwaaka, bon tii temanna ae e kona n tokanikai iai. Ma tiaki aron anne te kabobirimwaaka ibukin te maiu. Bon ana kantaninga te Atua bwa ‘a na kamaiuaki, ma ni karekea te atatai ae eti ibukin te koaua aeka n aomata nako.’ (1 Timoteo 2:3, 4) A bati imwaim aika a tia n tokanikai n te kabobirimwaaka, ao a bati naba aika ko kaai ni biri ma ngaiia. (I-Ebera 12:1, 2) E na reke te kaniwanga nakoia aomata nako ake a aki bwarannano. Ngaia are motinnanoia bwa ko na tokanikai!

21. Tera ae na maroroakinaki n te kaongora ae imwina?

²¹ E bon aki kona n tukaki “rokon ana bong Iehova ae kakanato ma ni kakamaku.” (Maraki 4:5, BG) A riai ni kantaningaa te bong anne utu ni Kristian. E rangi ni kakawaki ibukia kaain te utu ni kabane, bwa a na aonnangai tabeia ake a taekinaki n te Baibara. Tera riki ae ko kona ni karaoia bwa ko na teimatoa n taratara raoi ao ni kakorakoraa am iraorao ma te Atua? N te kaongora ae imwina, e na maroroakinaki iai baika tenua aika kakawaki ake a na kanakoraoa marurungin aia onimaki kaain te utu ae bwanin.

[Kabwarabwara ae nano]

Tera ae Ko a Tia n Reiakinna?

• E aera bwa e rangi ni kakawaki irouia kaain te utu ni Kristian bwa a na teimatoa n “taratara” raoi?

• E na kanga te buu te mwaane ni kakairi iroun te tia Kawakintiibu ae Raoiroi?

• Tera ae kona ni karaoia te buu te aine ae moanibaan te raoiroi ni boutokaa buuna?

• A na kanga rooro n rikirake ni buokiia aia utu bwa a na teimatoa n nene n te onimaki?

[Taamnei n iteraniba 12]

E rangi ni kakawaki iroun te mwaane ae onimaki te buu te aine ae boutokaa buuna