Tera “te Toki”?

“. . . ao ngkanne e a roko naba te toki.”​—MATAIO 24:14.

E RANGI ni bati tataekinan tokin te aonnaba n taai aika tibwa nako. A taekinaki kaokoroni kabuanibwai aika kakamaaku ni booki, birim ao maekatin, ni moa mani booki ibukia ataei ni karokoa rabakaun aonnaba. A taekinaki iai naba te kamaunaaki mani bwaai ni buaka aika mwaakaroiroi, orean te aonnaba n te buraneti teuana, manin aoraki aika tiritiri, bibitakini kanoani boong ake a aki kona n toki, ke baika roko man te buraneti teuana bwa a na taua taekan te aonnaba.

A kakaokoro naba aia iango Aaro i aon aei: a bati aika reiakina ae ngkana e roko “te toki” ao a nangi bane ni kamaunaaki baika maiu i aon te aba. E korea ana iango temanna te tia rabakau i aon te Baibara ibukini Mataio 24:14 ni kangai: “Te kibu aei bon teuana mai buakoni kiibu aika rangi ni kakawaki n Ana Taeka te Atua . . . A boni kaaitara ara roro ma te kamaunaaki ae e na riki n te aro are a a kataia tabeman mai buakora n iangoia bwa te bwai ae kakamaaku ni koaua.”

A aki toki n tarariaoaki koaua aika kakawaki aikai n aekan iango akanne: E karika te aonnaba Iehova ae te Atua ni “kamatoa,” e “aki matebuaka karaoana i Rouna, [ma] E karaoia ba e na maekanaki.” (Itaia 45:​18, BG) Ngaia are ngke e taekina “te toki” Iesu, e aki nanonna bwa e na kamaunaaki te aonnaba; ao e aki naba nanonna bwa a na kamaunaaki aomata ni kabane. Ma e nanonna bwa a na kamaunaaki aomata aika buakaka ake a imanono n rawa ni kaboraoi maiuia ma ana kairiri ae tatangira Iehova.

Iangoa te kaikonaki aei. Iangoia bwa aongkoa iai am auti ae moan te tamaroa ao ko kamaekaia aomata iai n aki kabooa. A maeka n rau i marenaia ao n tararuaa raoi am auti tabeman mai buakoia. Ma tabeman a karikii kangaanga aika bati, a unun i marenaia, ao a bwainikirinia raoia ni maeka ake a raraoi aroaroia n te aro ae riao. A urui am bwai ao a imanono n rawa n ongo ngke ko katokiia.

Tera ae ko na karaoia ibukini kaetani baikanne? Ko na urua am auti? Ko na bae n aki. Tao ko na bae ni kakioianako taani maeka ake a bubuaka ao n onobwai nakoni baike a urui.

E na boni karaoa naba anne Iehova. E kairaki rinanon te taamnei te tia areru bwa e na korea ae kangai: “A na teweaki nako taani kakaraoa ae buakaka: Ao akana kaantaninga Iehova a na abana te aba. Ba ai ti teutana riki, ao akea naba te aomata ae buakaka: Eng, ko na tarataraa raoi ana tabo, ao akea naba. Ma a na abana te aba akana nimamanei; ao a na kukurei ni kabatian te raoi.”​—Taian Areru 37:9-​11, BG.

E taekina naba te reirei anne te abotoro Betero. E kairaki rinanon te taamnei bwa e na korea ae kangai: “Iai karawa ma ngkoangkoa ao iai naba te aonnaba ae matoatoa ae otirake man te ran ao e katobibiaki naba n te ran, are a kamaunaaki iai kaain te aonnaba n te tai arei ngke e iekaki n te ran.” (2 Betero 3:5, 6) E taekina ikai te Ieka are n ana bong Noa te abotoro. A kamaunaaki aomata ake a aki karinea te Atua, ma e aki kamaunaaki te aonnaba. E katea te ieka are kabutaa te aonnaba bwa “te katoto ibukini baika a na roko ibukia aomata aika aki karinea te Atua.”​—2 Betero 2:6.

E a manga taku riki Betero: “E kawakinaki karawa ma te aonnaba ae ngkai ibukin te ai.” E kona ni kairua ara iango ngkana ti a toki naba ikanne. Ma noria e reitakinako te kibu anne ni kangai: “Ao bongini kamaunaaia aomata ake a aki karinea te Atua.” A na kamaunaaki ake a aki karinea te Atua ma tiaki te aonnaba. Tera are taekinaki imwina? E korea ae kangai Betero: “Ma ni kaineti ma ana berita, ti kariariaa karawa ae boou [ae Ana Tautaeka n Uea te Atua iroun te Mesia] ao te aonnaba ae boou [ae aia waaki ae raoiroi aomata], ae e na mena iai te raoiroi.”​—2 Betero 3:7, 13.

E kaotaki naba n te taetae ni burabeti bwa e a kaan roko “te toki.” Wareka Mataio 24:3-​14 ao 2 Timoteo 3:1-5 bwa ko aonga n nori kanikina ake a kaotia bwa e boni koaua aei.a

E aki ngkanne kamimi iroum ngkai a bati aika aki ota raoi n te kibu ae Mataio 24:14, are e kona n ota naba iai te ataei ae uarereke? Iai bukina ngkai e riki aei. E a tia Tatan ni kamataki nanoia aomata nakoni koaua aika kakawaki ake n Ana Taeka te Atua. (2 I-Korinto 4:4) E a tia naba te Atua ni karabai ana kantaninga mairouia aika kainikatonga ao e kaotia nakoia aika nanorinano. E taku Iesu ni kaineti ma aei: “I karaoiroiko i mataia aomata Tamau ae Ueani karawa ma aonnaba, bwa ko karabai baikai mairouia aika wanawana ao aika rabakau, ma ko kaotii nakoia merimeri.” (Mataio 11:25) Ai kakabwaiaakira ngaira ngkai ti a mena i buakoia ake a nanorinano aika a ataa raoi Ana Tautaeka n Uea te Atua, ao ake a kona ni kantaningai kakabwaia ake e na karokoi nakoia aomata nako ake a boutokaia!

[Kabwarabwara ae nano]

[Taamnei n iteraniba 9]

E na ‘kamauna’ te buakaka ni kabane mai aon te aba te Tautaeka n Uea