Te Reitaki ma te Aba n Taamnei
E a tia te Atua ae Moan te Mwaaka n anga mwioko tabeua nakoia anera riki tabeman. N te katoto, e angan Iesu Kristo te mwaaka n tautaekana te aonnaba ao e rineia naba anera aika kakaonimaki bwa a na ibuobuoki ni kaira tataekinan te rongorongo ae raoiroi. (Te Kaotioti 14:6) Ma e ngae n anne a kakaokoro tataro. E aki mwiokoa temanna ibukin ongoraean tataro. A riai ara tataro ni kaineti nakon te Atua n tii ngaia.
Iehova bon te tia “ongo tataro.” (Taian Areru 65:2, BG) E ongoraei ara tataro ao e kaekai. E koroboki te abotoro Ioane ni kaineti ma te tataro nakoia raona n toro iroun Iehova ni kangai: “Ngkana ti bubutiia te bwai teuana ae boraoi ma nanona ao e bon ongo [te Atua] iroura. Ao ngkana ti a ataia bwa e ongo iroura ni kaineti ma baike ti butiia, ao ti ataia bwa a na bon reke iroura baike ti bubutii, kioina ngkai ti bubutii nakoina.”—1 Ioane 5:14, 15.
A bon aki tangirira anera aika kakaonimaki bwa ti na kataia n reitaki ma ngaiia ke n tataro nakoia. A ota ao a aantaeka n ana babaire te Atua ibukin te tataro, are a kona n irekereke iai n tabetai. N te aro raa? Ngke e tataro te burabeti are Taniera nakon Iehova ibukini kamaroaean Ierutarem, ao e kaekaa ana tataro Taniera te Atua ngke e kanakoa te anera are Kabiriera ma te rongorongo ae kaunganano.—Taniera 9:3, 20-22.
E Koaua Bwa Bon Aia Rongorongo Maate?
Ti riai ni kataia n reitaki ma te koraki ake a a tia ni mate? A bati karaki aika kaotii taekaia aomata bwa aongkoa a maroro ma taamneia maate. N te katoto, e reitaki te aine temanna i Ireland ma te ibonga, ao e taku te aomata arei bwa e maroro ma Fred ae buun neiei n te tairiki are mai mwaina. Ma e a bon tia ni mate Fred tabeua te wiki n nako. E reitaanako ana taeka te ibonga n taekina are e taku Fred, ae baika e kakoauai buuna, bon tii ngaia ae e atai. E bae ni bebete iroun neiei iangoan ae e boni maiu Fred n te aba n taamnei ao e kataia n reitaki ma ngaia rinanon te aomata are e aki kinaa arei. E ngae n anne, e kauntaba te iango aei ma ae taekinaki n te Baibara n te aro ae mataata ibukin aroia maate.—Nora te bwaoki ae i nano.
A na kanga ngkanne ni kabwarabwaraaki karaki aika ai aron aikai? Aia anga teuana taimonio ni kataia ni mwamwanaiia aomata, bon man aroia ni karikiia bwa aongkoa aomata ake a a tia ni mate, n aron Fred ae taekinaki ikai. Tera bukini karaoan aei? A na katannakoia aomata man ae reiakinaki n te Baibara ao ni kamamaraa onimakinan ao mwiokoan Iehova. Bon akea te nanououa bwa a mwamwanaia aomata Tatan ao taimonio “n te mwakuri ni kakai ni kabane, ao kanikina ni kewe ma baika kamimi ao aeka ni mwakuri aika buakaka nako aika mwamwanaa te aba. A karaoaki baikai nakoia te koraki ake i aoni kawaia ni mauna.”—2 I-Tetaronike 2:9, 10.
E koaua bwa iai ibonga ao te koraki ake a reitaki ma ngaiia ake a kakoauaa raoi bwa a reitaki ma aomata ake a a tia ni mate. Ni koauana, ngkana a reitaki ma ake a a tia ni mate, a bon reitaki iai ma taamnei ake a kaitaraa Iehova. N aron anne, iai aika a kakoauaa bwa a taromauria te Atua ma a boni kairua. E kairaki te abotoro Bauro rinanon te taamnei bwa e na korea te kauring ae matoatoa ae kangai: “Baike a kareani botannaomata bwa a kareani nakoia taimonio, ao tiaki nakon te Atua.”—1 I-Korinto 10:20, 21.
E aera bwa ti kan tataro nakoia tabeman riki, ngkana ti ataia bwa ti kona n tataro nakon Teuare Moan te Rietata ae tangirira man tabeakinira? Ni koauana, ti anganaki man te Baibara te karaunano ae kangai: “A biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.”—2 Rongorongo 16:9, BG.
[Kabwarabwaraan n iteraniba 9]
E aera bwa ti kan tataro nakoia tabeman riki, ngkana ti ataia bwa ti kona n tataro nakon Teuare Moan te Rietata ae tangirira man tabeakinira?
[Te Bwaoki/Taamnei n iteraniba 8, 9]
RONGORONGO AIKA KOAUA AO AIKA KEWE
TE RONGORONGO AE KOAUA: BON TE AOMATA NI KOAUA TATAN
“E oninikia Tatan bwa te anera ae kaotiota te oota.”—2 I-Korinto 11:14.
“Kam na kawanawanaingkami ao n taratara raoi, bwa e nakonako teuare kairiribai nakoimi are te Riaboro ni bekorara n ai aron te raian, n ukoukora ae e na ongnga.”—1 Betero 5:8.
“Ane kakaraoa ae bure ao e nako mairoun te Riaboro, bwa bon te Riaboro are e bubure man te moantai.”—1 Ioane 3:8.
“Mangaia ae kam na aantaeka nakon te Atua, ma kam na rarawa nakon te Riaboro, ao ane e na birinako mairoumi.”—Iakobo 4:7.
“Te Riaboro . . . te tia tiriaomata ngaia mangke e moani moana ana mwakuri, ao e aki teimatoa n te koaua, ibukina bwa akea te koaua irouna. Ngkana e taekina te kewe, ao e taetae ni kaineti ma anuana bwa bon te tia kewe ngaia, ao taman te kewe.”—Ioane 8:44.
TE RONGORONGO AE KEWE: A NAKON TE ABA N TAAMNEI AOMATA NI KABANE NGKANA A MATE
“Ko na amarake n te amarake ma maononi moam, ni karokoa okim nakon te tano; ba ko anaki mai nanona: ba bon te tano ngkoe, ao ko na manga okira te tano.”—Karikani Bwaai 3:19, BG.
“Akana maiu a bon ataiia ba a na mate: ma a bon aki ata te bwai teuana akana mate.”—Te Minita 9:5, BG.
“Makuri ni kabane aika ko riai ni karaoi ni baim, ao karaoi ni korakoram; ba bon akea te makuri, ma te aro ni kukune, ma te ataibwai, ma te rabakau, i nanon Tiore [ae te ruanimate], ike ko na nako iai.”—Te Minita 9:10, BG.
“E oti nako ikeikena, e okira tanona; A mauna nanona n te bongi naba arei.”—Taian Areru 146:4, BG.
TE RONGORONGO AE KOAUA: A TABEAKINIRA ANERA AIKA KAKAONIMAKI
“E katea umana ni buaka ana anera Iehova i rarikiia akana makua ni kawakinia, Ao E kamaiuia.”—Taian Areru 34:7; 91:11, BG.
“Tiaki bon taamnei [aika anera] ngaiia ni kabane aika tabonibai, aika kanakoaki bwa a na beku ibukia te koraki ake e na reke irouia te kamaiuaki?”—I-Ebera 1:14.
“I nora te anera riki temanna ae kibakiba i nukani karawa, ao iai irouna te rongorongo ae raoiroi ae teimatoa n aki totoki, ae e na taekinna bwa te rongorongo ae kakimwareirei nakoia aomata ake a maeka n te aonnaba, ao nakoia botannaomata nako ao baronga ao taian taetae ao natannaomata, ao e kangai n te bwanaa ae korakora: ‘Kam na maaka te Atua ao anganna te neboaki.’”—Te Kaotioti 14:6, 7.
TE RONGORONGO AE KEWE: E BORAOI IESU MA TE ATUA
“I tangiringkami bwa kam na ataia bwa atuia mwaane nako bon te Kristo, ao atun te aine te mwaane, ao atun te Kristo te Atua.”—1 I-Korinto 11:3.
“Ngkana a a tia ni kamenaaki i aana bwaai ni kabane, ao e na kairia i bon irouna te Nati bwa e na aantaeka iroun Teuare e kamenai bwaai ni kabane i aan te Nati, bwa e aonga n riki te Atua bwa bwaninin bwaai ni kabane nakoia aomata nako.”—1 I-Korinto 15:28.
“I tuangingkami raoi te koaua, bwa e aki kona ni karaoa te bwai teuana te Nati i bon irouna, ma tii ngkana e noria bwa e karaoia te Tama.”—Ioane 5:19.