7 E Ongoraei ao ni Kaekai te Atua?

E KAUEKEA te ingaingannano ae korakora ao te kiriuriu n nano te titiraki ae i eta. E kaotaki n te Baibara bwa e bon ongoraei tataro Iehova ni boong aikai. Ngkana e ongoraei ara tataro ke e aki ma e boboto i aon aroarora.

E boaia mataniwi n Aaro n ana bong Iesu ake a baka n raoiroi n tataro, bwa a tii kani kakaraoa ae raoiroi i mataia aomata. E taekinia mwaane akanne bwa “akea riki kaniwangaia,” ae nanona karekean tii te bae a rangi n tangiria ae tangiraia irouia aomata, ao tiaki te bae a kainnanoia ae ongoran te Atua irouia. (Mataio 6:5) N aron anne, a bati ni boong aikai ake a tataro ni kaineti ma oin nanoia ma tiaki nanon te Atua. E na bon aki ongora irouia te Atua ngkana a katinanikui booto n reirei n te Baibara ake ti a tia ni maroroakin.

Ma tera arom iai? E ongoraei ao ni kaekai am tataro nako te Atua? E aki boto te kaeka i aon am reeti, abam, ke ngkana ko kaubwai ke ko aki. E karaunanora te Baibara ni kangai: “E aki inanonano te Atua, ma a butimwaeaki irouna aomata ni kabaneia aika maakua ma ni kakaraoa ae raoiroi, mai buakoia botannaomata nako.” (Mwakuri 10:34, 35) A kaineti taeka akanne nakoim? E nanonaki ni maakan te Atua korakorani karineana ao kararoaani karaoan ae e aki kukurei iai. Ngkana e raoiroi am mwakuri nanona bwa ko ukera karaoan te bae raoiroi are e taekinna te Atua n oneani mwin ae ko ira nanom ke nanoia raom. Ko bon tangiria bwa e na ongoraei am tataro te Atua? E kaotaki n te Baibara arom ae e na ongoraea iai am tataro te Atua.a

Ni koauana, a bati aika tangira te Atua bwa e na kaekai aia tataro n te kakai. Ma e ngae n anne, e burenibwai naba karaoani kakai iroun te Atua n taai ake a karakinaki n te Baibara. E riki te kakai teuana are e koreaki taekana imwaini bwakanakon tienture aika bati ao e a manga riki are teuana imwina. Irarikin anne, e kaotaki n te Baibara bwa a toki taini kakai imwini mateia abotoro. (1 I-Korinto 13:8-10) E nanonaki n aei ngkanne bwa e aki kaekai tataro nako te Atua ni boong aikai? E bon aki! Iangoi tataro tabeua ake e kaekai.

E anga te wanawana te Atua. Bon Nibwan te wanawana ae koaua ni kabanea Iehova. E tituaraoi n angania ake a kani kairaki irouna ao ni kataia ni maiuakinna.​—Iakobo 1:5.

E anga te taamnei ae raoiroi te Atua ao kakabwaia ni kabane mai iai. Te taamnei ae raoiroi boni mwaakan te Atua ae kakammwakuri. Akea te mwaaka ae korakora riki. E kona ni buokira n tokanikai i aoni kataaki. E kona n anganira te rau ngkana ti tabeaianga. E kona naba ni buokira ni karikirakei aroaro aika raraoi ao n tatangiraki. (I-Karatia 5:22, 23) E karau nanoia taan rimwina Iesu bwa e tituaraoi te Atua n anga te bwaintangira aei.​—Ruka 11:13.

E anga te atatai te Atua nakoia akana kakorakoraia n ukeria. (Mwakuri 17:26, 27) A a bati aomata ni katobibia te aonnaba ake a ukera te koaua ma nanoia ni kabane. A kani kinaa te Atua bwa antai arana, tera ana kantaninga ibukin te aonnaba ao te botannaomata, ao a na kanga ni kaania riki. (Iakobo 4:8) A aki toki Ana Tia Kakoaua Iehova ni kaitiboo ma aeka n aomata akanne ao a kukurei ni buokiia ni kaekai titiraki akanne man te Baibara.

Anne bukina ae ko karekea iai te maekatin aei? Ko ukoukora te Atua? Tao aio arona ni kaekaa am tataro.