E Aera Ngkai E Aki Kaekai Tataro ni Kabane te Atua?
E rangi ni kan ongoraei ara tataro aika nako mai nanora Tamara are i karawa ae Iehova ae te Atua, ao e kukurei iai. Ma iai bwaai tabeua aika e aki kani kaekai iai ara tataro. Baikara baikanne, ao tera ae ti riai n ururingnga ngkana ti tataro? Aikai tabeua ana kaetieti te Baibara.
“Ngkana ko tataro, tai mwanewei taeka aika titeboo ni kaokiokii.”—Mataio 6:7.
E aki tangirira Iehova bwa ti na kaokiokii ara tataro aika kamatenikunaaki ke ni wareki man te boki n tataro. Ma e tangirira bwa ti na tataro mai nanora. Tera am namakin ngkana iai raoraom ae e a okioki naba ana taeka nakoim ni katoabong? Raao ni koaua, a kakaotii nanoia i marenaia n oin aia taeka. Ngkana ti kamanenai oin ara taeka n tataro iai nakon Tamara are i karawa, ti kaotia iai bwa ti iangoia bwa raoraora.
“Ngke kam bubutii ao kam aki anganaki ae kam tangiria, ibukina bwa kam bubutii ma te kantaninga ae kairua.”—Iakobo 4:3.
Ti na bon aki kantaningaa te Atua bwa e na kaekai ara tataro, ngkana ti bubutii baika ti atai bwa e aki tangiria bwa ti na karaoi ke ni karekei. N te katoto, e na kani kaekaa Iehova ana bubutii te tia takaakaro n te mwane bwa e na tekeraoi, ngkai E a tia kauringira bwa ti na aki nanonrang ao n aki kakoauai baika akea koauaia n aron te katekeraoi? (Itaia 65:11; Ruka 12:15) Ti bon aki kona ni kantaningaia bwa e na kani kaekai aeka n tataro aikai Iehova! Ngkana e na kaekaa ara tataro te Atua, ti riai n taraia raoi bwa a na boraoi ara bubutii ma kanoan te Baibara.
“Ane e aki kan ongo te tua ao e riribaaki naba ana tataro.”—Taeka N Rabakau 28:9.
N taai ake a karakinaki n te Baibara, ao e aki kaekai aia tataro te Atua naake a ekinako ana tua. (Itaia 1:15, 16) E aki bibitaki te Atua. (Maraki 3:6) Ngkana ti tangira te Atua bwa e na kaekai ara tataro, ti riai ni kabanea ara konaa n ongeaba n ana tua. Ma tera arona ngkana ti kakaraoi baika bubuaka n taai aika nako? Nanona bwa e na teimatoa n aki kan ongo iroura Iehova? Tiaki ngaia anne! E tatangira te Atua ni kabwarai ara bure ngkana ti raira nanora ao ni bitii maiura ao ni kabanea ara konaa ni kakukureia.—Mwakuri 3:19.