5 N Ningai ao n te Tabo Raa?

AKEA te nanououa bwa ko bae n tia n noriia angiia Aaro aika a kaatuui iangoan umwa aika kangaanga karaoaia ibukin te tataro ao ni bairei taai aika onoti ibukin te tataro. E koaua bwa iai taabo ao taai aika katauaki n te Baibara ibukin ara tataro?

E kaotia te Baibara bwa bon iai taai aika riai ibukin te tataro. N te katoto, e kaitaua te Atua n te tataro Iesu imwain amwarakena ma taan rimwina. (Ruka 22:17) Ao ngke a botaki ana abotoro ibukin te taromauri, a uaia n tataro. Mangaia are a kateimatoa kateia are a a kamani karaoi n aia tinakoka I-Iutaia ao n tembora i Ierutarem. E iangoa te tembora te Atua bwa “te umwa n tataro ibukia botannaomata ni kabane.”​—Mareko 11:17.

E bae n uaana aia bubutii ana toro te Atua ngke a botaki ao n uaia n tataro. E kukurei te Atua ngkana e katiteuanaaki te botaki n aroaroia ao te tataro are e taekinaki ibukia e boraoi ma booto n reirei n te Baibara. E kona ni kairaki temanna n te tataro bwa e na karaoa te bwai teuana are e na aki iangoa karaoana mai mwaina. (I-Ebera 13:18, 19) A katoatai n tataro Ana Tia Kakoaua Iehova n aia bobotaki. Ko kaoaki bwa ko na roko n te Tabo n Taromauri ae kaani ma ngkoe ao ni bon ongoraei tataro akanne.

Ma e aki kataua te Baibara te tataro n tii te tai teuana ke te tabo teuana. Ti wareka taekaia ana toro te Atua n te Baibara bwa a tataro n taai ao n taabo aika kakaokoro. E taku Iesu: “Ngkana ko tataro, naako n am ruu ae onoti ao imwini kainakin am mataroa, tataro nakon Tamam ae raba ae aki nonoraki ma e nori bwaai ni kabane, ao e na anganiko kaniwangam.”​—Mataio 6:6.

Tiaki ngkanne te kakao ae anainano anne? Ko kona n tataro nakon te tia Tautaeka i aoni bwaai ni kabane n te tai teuana are ko taku ao ni kakoauaa bwa e na ongo iroum. Maroaka ae e aki toki ni kakaaea te tabo ae e na tataro iai Iesu n tii ngaia! N te tai teuana, e kangaina n tataro nakon te Atua ibukin ukoukoran te kairiri i aon ana motinnano ae kakawaki.​—Ruka 6:12, 13.

A koreaki n te Baibara taekaia mwaane ao aine tabeman aika tataro ngkana a kaaitara ma motinnano aika kakaiaki ke kangaanga aika katabeaianga. N tabetai a tataro ni kabaibati ao a tataro i nanoia, a tataro ni botaki ao ngkana tii ngaiia. Te bwai ae kakawaki bwa a bon tataro. E kaoia ana toro te Atua ngke e kangai: “Kam na tataro n aki toki.” (1 I-Tetaronike 5:17) E kan ongoraei aia tataro n aki toki akana karaoa nanona. E aki ngkanne kaotaki ana tangira Iehova n te kakao anne?

Ni koauana, a bati kaain te aonnaba ni boong aikai aika nanokokoraki ni manenan te tataro. Ko kona n titiraki ni kangai: ‘E na boni buokai?’