4 Tera ae Ti na Taekinna Iai?

E TAEKINAKI bwa te tataro ae bati riki mwaneweana mai buakon aia tataro Kristian bon are e atongaki n tabetai bwa Ana Tataro te Uea ke Tamara Are i Karawa. E ngae ngke e koaua ke e aki, ma angiia aomata a aki ataa raoi nanon ana tataro ni katoto Iesu. A taekinna ni kamatenanoa ni katoabong mirion ma mirion aomata, tao n taai aika bati n te bongina. Ma e aki nanonna Iesu bwa e na karaoaki anne nakon te tataro. Ti kanga n ataa anne?

E taku Iesu imwain raoi taekinan te tataro anne: “Ngkana ko tataro, tai mwanewei taeka aika titeboo ni kaokiokii.” (Mataio 6:7) E koaua bwa e na kaitaraa Iesu i bon irouna bwa a na kamatenanoaki ao ni kaokiokaki taekan te tataro anne? E bon aki! Ma e reireinira Iesu baika ti riai n tataroi ao e kauringira baika ti na moanibwai n te tataro. Ti na nora raoi te bwai ae e taekinna. E koreaki taekan te tataro anne ni Mataio 6:9-13.

“Tamara are i karawa, e bia katabuaki aram.”

E kauringia taan rimwina Iesu bwa a riai tataro nako ni kaineta Tamana ae Iehova. Ma ko ataia bwa e aera ngkai e rangi ni kakawaki aran te Atua ao e aera ngkai e riai ni katabuaki ke ni kaitiakaki?

E a kamani uaraoaki aran te Atua ae tabu mani moani karikaia aomata. E a tia te tia kairiribai ae Tatan n atonga Iehova bwa te tia Tautaeka ae kewekewe ao ni bangaomata ae akea riaina n tautaekania Ana karikibwai. (Karikani Bwaai 3:1-6) A bati aika boutokaa Tatan n angareirei bwa e ribuaka te Atua, e iowawa ao e karekekai, ke ni kakewea ae Iehova bon te tia Karikiriki. A a tia tabemwaang ni kabuakaka naba arana, ni kaaki aran Iehova mani Baibara tabeua ao ni katabua kamanenaana.

E kaotaki n te Baibara bwa e na kaetii mwakuri n ribuaka nako aikai te Atua. (Etekiera 39:7) Ni karaoan anne, e na karekei baika kam kainnanoi ao ni kaetii ami kangaanga naba. N te aro raa? E katauraoaki kaekaana n taeka ake imwina riki n ana tataro Iesu.

“E bia roko am tautaeka n uea.”

Ni boong aikai, e bati te aki ota raoi irouia taan angareirei n Aaro ibukin Ana Tautaeka n Uea te Atua. Ma a ataia naake a ongora iroun Iesu, bwa ana burabeti te Atua a a kaman taekina te Mesia ae te tia Kamaiu are e rineia te Atua bwa e na tautaeka n te Tautaeka n Uea are e na bita te aonnaba. (Itaia 9:6, 7; Taniera 2:44) E na katabua aran te Atua rinanoni kaotaraean ana kewe Tatan ao imwina ni kamauna ma ana mwakuri nako. E na katoka te buaka, te aoraki, te rongo ao te mate naba Ana Tautaeka n Uea te Atua. (Taian Areru 46:9; 72:12-16; Itaia 25:8; 33:24) Ngkana ko tataroa Ana Tautaeka n Uea te Atua bwa e na roko, ko a tataroa iai kakororaoani berita nako akanne.

“E na kakororaoaki nanom i karawa ao n te aonnaba naba.”

E kaotaki n ana taeka Iesu bwa e na boni kakororaoaki nanon te Atua n te aonnaba n aron are i karawa are e maeka iai. E kakoauaaki bwa akea tukani karaoan nanon te Atua i karawa, ike e a buakana Tatan ma raona Natin te Atua ao ni karenakoia nakon te aonnaba. (Te Kaotioti 12:9-12) E buokira te katenua ni bubutii n ana tataro ni katoto Iesu, n aron naba ake uoua ake imwaina bwa ti na teimatoa ni kaatuui ara iango i aoni baika kakawaki riki, ae nanon te Atua ao tiaki oin nanora. Bon nanona bwa e na katoatai ni karaoi baika moan raraoi ni baika karikaki ni kabane. Ngaia are e kangai naba te mwaane ae kororaoi ae Iesu nakon Tamana: “Tiaki nanou ae na iraki, ma nanom.”—Ruka 22:42.

“Anganira kanara ae ti a tau iai n te bong aei.”

E kaotia Iesu imwina riki bwa ti kona n tataro ibukini baika ti kainnanoi. Bon akea buren tataroan te bae ti kainnanoia ni maiura ni katoabong. Ni koauana, ni karaoan anne e a kauringira iai ae Iehova boni ngaia ae “anga te maiu ma te ikeike ao bwaai ni kabane nakoia aomata nako.” (Mwakuri 17:25) E kaotaki n te Baibara bwa bon te karo ae tatangira are e kukurei n angania natina baike a kainnanoi. Ma n aron te karo ae raoiroi, e na aki kaekai aia bubutii ake a na aki kabwaia iai.

“Kabwarai ara bure.”

Ko kainnanoa kabwaraan am bure iroun te Atua? A a bati ni boong aikai aika a aki ataia bwa tera te bure ao rawawatana. Ma e reiakinaki n te Baibara bwa te bure boni wakaan ara kangaanga aika riao, ibukina bwa boton rikini mateia aomata. Kioina ngkai ti bungiaki n te bure, ti aki toki ni bure ao e boboto reken te kantaninga ae te maiu are aki toki n te tai ae na roko, tii mani kabwaraan ara bure iroun te Atua. (I-Rom 3:23; 5:12; 6:23) E kabebetenano reiakinan ae taekinaki n te Baibara ae kangai: “Ko raoiroi, [Iehova], ao Ko kani kabara buure.”—Taian Areru 86:5, BG.

“Kamaiuira mairoun teuare buakaka.”

Ko ataia ae e rangi ni kakawaki, ao ko rangi ni kainnanoa ana kamanomano te Atua? A a bati aika kakewea bwa iai Tatan are “teuare buakaka.” Ma e angareirei Iesu bwa bon iai Tatan ao e atongnga bwa “te tia tautaeka i aoia kaain te aonnaba aei.” (Ioane 12:31; 16:11) E a tia ni kabuakakaa te aonnaba aei Tatan ngkai e tautaekanna ao e rangi ni kani kabuakakako naba, n tukiko mani karikirakean am iraorao ae kaan ma Tamam ae Iehova. (1 Betero 5:8) Ma e ngae n anne, e rangi ni korakora riki Iehova nakon Tatan ao e kukurei ni kamanoia akana tangiria.

A aki taekinaki bwaai ni kabane aika a kona n tataroaki n te kabwarabwara ae kimototo ibukini baika kakawaki n ana tataro ni katoto Iesu. Uringa are ti tuangaki n 1 Ioane 5:14 ibukin te Atua ni kangai: “Ngkana ti bubutiia te bwai teuana ae boraoi ma nanona ao e bon ongo iroura.” Ngaia are tai raraomaeakina ae akea bongan tataekinan am kangaanga nakon te Atua n te tataro.—1 Betero 5:7.

Ma tera ae ti riai n iangoia ibukin te tai ao te tabo? E kakawaki bwa n ningai ao n te tabo raa ae ti riai n tataro iai?