2 Nakon Antai?

E ONGORAEI tataro nako te Atua n aki ongeia bwa antai ae a mwaneweia n aia tataro? N angiin te tai, e taabangaki kakoauaan anne ni boong aikai. A anaaki nanoia aomata aika bati n te iango anne, ake a boutokaa te ibuokanibwai n te taromauri irouia Aaro ao a tangiriia Aaro nako bwa a na butimwaeaki n aki ongea kakaokoroia. Ma e kona ni kakeweaki te iango anne?

E reiakinaki n te Baibara bwa a aki nakon te Atua angiin aia tataro aomata. N te tai are e koreaki iai te Baibara, e rangi n taabangaki te tataro nakoni boua aika kaaraki. Ma e okioki te Atua n anga te kauring bwa ti na aki karaoa te mwakuri anne. N te katoto, e taekinaki ae kangai ibukini bouannanti n Taian Areru 115:4-6: “Iai taningaia, ma a aki ongongo.” E mataata te reirei aei. E aera ngkanne bwa ko na tataro nakon te atua ae e aki kona n ongo?

E kabwarabwaraaki riki te iango aei n te rongorongo teuana ae mataata n te Baibara. E kaewenakoia ana burabeti Baara te burabeti ni koaua ae Eria, bwa a na tataro nakon atuaia, imwina e a tataro nakon Atuana. E taekinna Eria bwa e na kaeka te Atua ni koaua ma e na aki te atua ni kewe. A maan ao ni korakai n tataro ana burabeti Baara ni butimwaean te kakaewenako, a takakaa n tang ma a aki kaekaaki! E warekaki ae kangai n te rongorongo: “Akea ae kaeka te aba, ao akea naba ae muti.” (1 Uea 18:29, BG) Ma tera ae riki ngke e tataro Eria?

Imwin ana tataro Eria, e a kaeka Atuana n te tai ae waekoa ni kabwakaan te ai mai karawa ni kabueka te karea are e katauraoia. Tera te kaokoro? Iai te ibuobuoki teuana ae kakawaki n ana tataro Eria n 1 Uea 18:36, 37. Bon te tataro ae rangi ni kimototo bwa tao tii 30 te taeka iai n te taetae n Ebera n te moantai. Ma e ngae n anne, tenua ana tai Eria ni wetea te Atua n arana ae Iehova n taeka akana tabeua akanne.

Baara ae nanona “te tia bwaibwai” ke “te toka” bon atuaia kaaini Kanaan ao a bati riki oin aia kabwarabwara ibukin atuaia aei. Ma e ngae n anne, e onoti te ara ae Iehova bwa e tii kaineti Nakoina ni kabutaa te iuniweeti. E tuangia ana aomata te Atua aei: “Bon Iehova Ngai; bon arau aei: ao N na aki angan temanna arou ae te neboaki.”​—Itaia 42:8, BG.

E ongoraeaki ana tataro Eria ao aia tataro ana burabeti Baara? E kamwaraeia aomata taromauriani Baara ae te waaki n taromauri ae irekereke ma te wewene ni bure ao kareanakia aomata. Ni kaitaraan anne, e tuangia ana aomata Iehova aika I-Iteraera bwa a na taromauria n te aro ae korakora iai karineana, bwa a aonga ni kainaomataaki mani mwakuri aika kammaira aikai. Iangoa aei: Ngkana ko kororeta nakon raoraom ae ko rangi n tatangiria, ko kantaningaia bwa e na nikiraki iroun temanna ae bubuaka aroarona ae kauntaba ma baike e iangoi raoraom bwa a kakawaki? Ko na bon aki!

Ngkana ko tataro nakon Iehova, ko bon tataro nakon te tia Karikiriki ae Taman te botannaomata.a E taku te burabeti ae Itaia n ana tataro: “Iehova, bon Tamara Ngkoe.” (Itaia 63:16, BG) Bon aio Teuare e taekinna Iesu Kristo nakoia taan rimwina ngke e kangai: “N na rierake nakon Tamau ao Tamami, ao nakon Atuau ao Atuami.” (Ioane 20:17) Iehova bon Taman Iesu. Bon te Atua are e tataro nakoina Iesu ao e reireinia naba taan rimwina bwa a na tataro nakoina.​—Mataio 6:9.

E koaua bwa ti tuangaki n te Baibara bwa ti na tataro nakon Iesu, Maria, tianto ke anera? Tiaki, bwa bon tii Iehova. Iangoi bukina aika uoua aikai. Te moan, te tataro bon te taromauri naba teuana ao e taekinaki n te Baibara bwa tii Iehova ae riai n taromauriaki. (Te Otinako 20:5) Te kauoua, e kaotaki n te Baibara bwa nakoana bon te tia “ongo tataro.” (Taian Areru 65:2, BG) E ngae ngke e tituaraoi Iehova n anga mwioko aika bati nakoia tabemwaang ma e aki anga nakoana aei nakon temanna. Bon te Atua ae e berita bwa e na ongoraei ara tataro n tatabemanira.

Ngaia are ngkana ko tangiria bwa a na ongoraeaki am tataro iroun te Atua, uringa te kaungaunga ae n te Baibara aei: “Ane taboa aran Iehova e na kamaiuaki.” (Mwakuri 2:21) Ma e ongoraei tataro nako Iehova n akea te bae e kantaningaia mairoura? Ke iai riki te bwai ae ti riai n ataia ngkana ti tangiria bwa e na ongoraei ara tataro Iehova?