1 Bukin Tera?
TE TATARO. Aei te reirei teuana man te Baibara ae e kauekea te kan ongora ae korakora ao te kan atatai. Iangoi titiraki aika itua ake a taneiai n tabekaki ibukin te tataro, imwina raonira n neneri kaekaaia aika katauraoaki n te Baibara. A katauraoaki kaongora aikai ibukini buokan arom n tataro, ni moanna n tatataro ke n uaana riki am tataro.
A TATATARO aomata ni katobibia te aonnaba, ni katei ao n Aaro nako. A tataro ngkana tii ngaiia ke ni botaki. A tataro n umwantabu, tembora, tinakoka, aia tabo n taromauri Mutirim ao taabo ake a kateaki iai bouannanti. A kona ni kamanenai ibukin aia tataro burangketi, korona, prayer wheels, banna, booki n tataro ke tataro aika a koreaki i aon te baba ao ni katineaki.
Te anga teuana ae kaokoroia aomata ma baika maiu ni kabane n te aonnaba aei bon te tataro. Ni koauana, iai baika titeboo iroura ma maan. Ti kainnanoa te amwarake, te ea ao te ran n aroia maan. Ti bungiaki, ti maiu, ao ti mate n aroia naba. (Te Minita 3:19) Ma tii aomata n tataro. Bukin tera?
Tao te kaeka ae te kabanea ni bebete, iai kainnanoan te tataro iroura. Ni koauana, n angiin te tai e iangoaki te tataro bwa te anga teuana ae a kona iai aomata n reitaki ma te bwai ae taromauriaki ke e tabu ae aki nonoraki. E kaotaki n te Baibara bwa ti karikaki ma tangirani baikai. (Te Minita 3:11) E taku Iesu Kristo n te taina: “A a kukurei akana ataia bwa a kainnanoa te Atua.”—Mataio 5:3.
Ibukini ‘kainnanoan te Atua,’ a a riki baikai: umwantabu, bwain rimoa aika kamanenaaki n te taromauri ngkai, ao taai aika bati aika kabaneaki ibukin te tataro. Ni koauana, tabeman a onimakinia i bon irouia ke raoia ibukini kakororaoani kainnanoan te Atua irouia. Tiaki bwa ko a tia n namakinna ae e a manga aki tau aia konabwai aomata ibukini buokam? Ti boni mamaara, e uarereke maiura ao e reme ara taratara. Bon tii ane e rangi ni wanawana, e rangi ni mwaaka, ao n rangi n nanomwaaka nakoira ae e kona ni karekei baika ti kainnanoi. Ao tao baikara kainnanoan te Atua iroura aika a kairira bwa ti na tataro?
Iangoa aei: Ko a tia n rangi n tangira te kairiri, te wanawana, ke kaekaan titiraki aika a taraa n riaon aia atatai aomata? Ko a tia n namakina kainnanoan te kabebetenano n rotakim n te kabuanibwai, te kairiri n aitaram ma te motinnano ae kakaiaki, ke kabwaraan am bure ibukini karawawataam n te bure?
Ni kaineti ma te Baibara, akanne bukina aika manena ae ti tataro iai. Te boki ae te kabanea ni manena n te reirei aei bon te Baibara, ao iai i nanona rongorongon aia tataro mwaane ao aine aika bati ake a kakaonimaki. A tataro ibukin te kabebetenano, te kairiri, kabwaraani buure ao kaekaan titiraki aika a rangi ni kangaanga kaekaaia.—Taian Areru 23:3; 71:21; Taniera 9:4, 5, 19; Abakuka 1:3.
A kakaokoro tataro ake n te Baibara ma iai te bwai ae a titeboo iai. Aomata aika a bane n tataro, iai irouia kiingin te tataro ae uaana, are e okioki ni mwanuokaki ke n tinanikuaki i nanoni boong aikai. A ataia bwa antai ae a riai n tataro nakoina.